​Ивалгын дасанда - “Эхэ хэлэн –манай баялиг”

Заншалта болоһон буряад хэлээр “Эхэ хэлэн –манай баялиг” урилдаан мүнөөдэр, октябриин 28-да Ивалгын дасанда эхилбэ. Энэ ехэ нааданда Буряадай аймагуудһаа, Улаан-Үдэһөө, Эрхүү можоһоо, Үбэр-Байгалай хизаарһаа 60 команда ерээ.

10 сагта Бандида-Хамба лама Дамба Аюшеев нээлгын ёһолол үнгэргэжэ, хабаадагшад таһаг үрөөнүүдээр тарабад. Гол мүрысөөнүүд: “Буряад хэлэнэй нютаг аялгын толи” (гэрэй даабари), “Хоёр хэлэ тэгшэ мэдэе” (оршуулгын уран уншалга), Блиц-урилдаан” (“Будаадын шажанай нэрэ томьёонууд, Этигэлэй хамбын сургаалнууд, Буряад орон” гэһэн тестнүүдтэ харюусаха)), “Уран бэлигтэй, ульгам хэлэтэй” .(“Полисёнок” гэһэн хуудаһа бэлдэнэд), “Хэнэй хэлэн баян бэ?”, “Оньһон үгэ оностой, олоной үгэ тудастай” (оньһон хошоо үгэнүүдээр мүрысэнэд), “Уянгын шүрэ үлхэе” (нютагайнгаа шог зугаануудые зүжэглэн харуулнад), “Уран гартан, хониной арһаар бүтээл хэхэ” (эндэ ехэнхидээ заншалта малгайнуудые оёнод), “Этигэл хамбадаа зальбарал, Доншуур маани, Сагаан Дара эхын магтаал” (билет татажа харюусана) Будаадын шажанай ехэ һургуулиин ехэ, бага танхимууд болон һургалгын үрөөнүүд соо үнгэргэгдэнэ. “Уран гартан, модошо дархан” урашуулай мүрысөөн Ногоон Дара эхын дуганай дархашуулай цех соо үнгэрнэ. “Хамба ламын шан абалгын тэмсээн” Чойрын дуган соо 14 сагһаа үнгэрнэ. Түгэсхэлэй нааданууд, эрхимлэгшэдые шагналга ехэ һургуулиин ехэ танхим соо үнгэрхэ.

Үхибүүд ехэ дүршэлтэй болоо гэжэ абаһаар харагдана. Илангаяа “Уянгын шүрэ үлхэе” мүрысөөндэ багаханшье хүүгэд хабаадахадаа тон ехэ бэлигтэйгээ, айхабтар хурса хэлэтэйгээ гэршэлнэ. Жэшээлхэдэ, Бэшүүрэй Харланай 3-дахи ангиин һурагша Барас Байдаров “Мангартай тахяануудые” уран гоёор гүйсэдхэжэ, бултаниие хүхеэгөө. Ехэ ангинуудай һурагшад сооһоо Балдан Очиров ангуушад тухай (Захааминай хүбүүн ангуушад тухайл хөөрэхэл даа) бэрхээр хөөрэжэ магтуулаа. Улаан-Үдэдэшь һурагша үхибүүд эхэ хэлэеэ һайнаар мэдэнэ гэжэ харахада сэдьхэлдэ амар болоно. 54-дэхи һургуулиин Даша-Нима Андреев “Номоо үзэгты, а любовь - потом!” гэжэ Мүнхэ Нанзатович багшынгаа найруулгые уран гоёор харуулаа.

Булта хабаадагшадта үндэр амжалта хүсэе. Хамбынгаа наадануудта эдэбхитэйгээр хабаадажа, сэсэн бэрхэ хүнүүд боложо, хожомынь Эхэ Буряадаа суурхуулхат!