​Солонгос хэлэ шудалхада орёошог

Буряад орондо солонгос хэлэ 2007 онһоо хүн зон олоороо шудалжа эхилээ гэбэл, алдуу болохогүй. Эгээл тиихэдэ Буряадай гүрэнэй ехэ һургуулиин Зүүн зүгэй институдта солонгос хэлэн заагдажа эхилээ. Үнгэрһэн долоон хоногой эсэстэ эндэ эмхидхэгдэһэн солонгос үндэһэ яһатанай соёлдо зорюулагдаһан хэмжээ ябуулганууд олоной анхарал татаба.

Солонгосой “Ют” гэһэн наадантай болон сай уулгын заншалтай сугларагшад танилсаһан байна. Энэ арадай хэлэ шудалдаг оюутад харагшадта үзэгүүдые заажа, үгэнүүдые бэшүүлжэ һургаа. Олон залуушуул “Би шамдаа дуратайб!” гээд бэшэжэ һураа. Тус хэмжээ ябуулгада университедэй бусад факультедтэ һурадаг хүбүүд, басагад эдэбхитэйгээр хабаадалсаһан байна.

Автор: Борис Балданов
Описание: Сай аягалха ёһолол

Зүүн зүгэй институдай захирал Иннокентий Актамовай тэмдэглэһээр, солонгос хэлэ шудалха дуратай оюутадай тоо жэл бүри олошоржо байна.

- Түрүүшын жэлнүүдтэ 10-12 хүн һурахаяа ородог байгаа һаа, энэ жэлдэ аяар 20 дуратайшуулые нэгэдэхи курсда абаабди. Оюутаднай хэлэеэ хэрэглэхэ, мэргэжэлээ дээшэлүүлхэ зорилготойгоор Урда Солонгосой Пусанай гадаада хэлэнэй дээдэ һургуулида, Канвон хотын үндэһэ яһатанай дээдэ һургуулида заал һаа нэгэ семестрэй туршада ошожо һурана. Намарай эхиндэ Улаан-Үдэ хотын 350 жэлэй ойн баярта Аньян болон Енгволь хотонуудһаа ерэһэн айлшадтай манай оюутад уулзаһан байна. Тэдэнэртэй нягта харилсаа холбоотойгоор хүдэлхэ тухай хэлсээбди, - гэжэ Иннокентий Актамов хөөрэнэ.

Оюутадтай найман багшанар хүдэлнэ. Тэдэнэй олонхинь энэл таһагые дүүргэгшэд болоно бшуу. Урда Солонгосһоо ерэһэн нэгэ багша эндэ бии. Гурбадахи курсын оюутан Лидия Суворовагай хэлэһээр, бүхы багшанар бэлигтэй, эрдэмэй нэрэ зэргэтэй юм.

- Нэгэдэхи курсһаа эхилээд, бидэ солонгос хэлэ, литература шудалнабди. Минии һанахада, энэ хэлэ үзэхэнь орёо. Солонгос хэлээр долоон хоногтоо табан хэшээл үнгэргэгдэдэг, - гэжэ Лидия Суворова хөөрэнэ. – Урда Солонгосой зон өөрсэ ухаан бодолтой, ойлгосотой, манай ород, буряад хүнүүдһээ ехэ илгаатай. Солонгос мэдүүлэлнүүдшье ород мэдүүлэлнүүдһээ бүридэлөөрөө тад ондоо.

Һуралсалай үедэ оюутад Солонгосой түүхэ, экономико, улас түрын бодол (политика), ниигэмэй байдал, газар дэбисхэрынь шудалдаг юм.

Автор: Борис Балданов
Описание: Оюутад ханза бэшэгтэ һурана