​"Үетэн" бүлэгэй тоглолто

Ирагуу хүгжэмтэ дуунуудаа уласай хэмжээндэ гүйсэдхэдэг «Үетэн» бүлэг энэ жэлдэ дүшэн жэлэйнгээ ойн баяр тэмдэглэжэ байна. Энэ ушараар декабриин 21-дэ тоглолто болохо.

Һайн сагай байхада, «Үетэн» бүлэг жэл бүхэндэ тоосоото тоглолто түрэл нютаг Хэжэнгэдээ үнгэргэдэг бэлэй. Үшөө тиихэдэ табан жэл болоод лэ ялас гэмэ тоглолто Улаан-Үдэдэ болодог юм. Тус ансамблиин анхан байгуулагдаһаар 25 жэлэй ойдо зорюулагдаһан тоглолто Улаан-Үдэдэ бүжэг, дууриин театрта болоһон байна.

- Анхан байгуулагдаһаар 25 жэлээ тэмдэглэжэ байхадамнай, Лубсан Митыпов, Роман Данзанов гэгшэд мэндэ ябаа. Залуу бэлигтэй дуушан, найруулагша, хүгжэм зохёогшо Мүнхэ Балданов тиихэдэ түлэг дундаа ябаа ха юм, - гэжэ «Үетэнэй» уран һайханай талаар хүтэлбэрилэгшэ Баир Шойдоков хөөрэнэ.

«Дангинамни», «Хэжэнгын хүбүүд, басагад», «Хажуудаш ошохол аад», «Хэжэнгэм һанагдаа», «Хүлеэлгэ» болон бусад дуунууд олохон буряадуудай зүрхэ сэдьхэлдэ дүтэ һанагдадаг ёһотой.

- Хаанашье холо ябахада, «Үетэн» бүлэгэймнай 25 жэлэй ойдо зорюулагдаһан тоглолто хараһан хүнүүд ушардаг. Нүгөө заримашуул «Үетэнэй» 30 жэлэй ойдо дашарамдуулагдаһан тоглолто хоёр нюдөөрөө хараһан, хоёр шэхээрээ шагнаһан байдаг, - гэжэ « Баир Шойдоков хөөрэнэ. - Харин мүнөө 40 жэлэйнгээ ой тэмдэглэхэмнай гээшэ. Бэлиг талаантай залуушуул манай Буряад орондо хододоо байха. Минии хүбүүн Зандан Шойдоков молор һайхан Монгол орондо долоодохи жэлээ һуража байна. Тэрэмни Улаан-Баатарай хүгжэмэй колледждо табан жэлэй туршада морин хуур шудалба. Хүгжэмэй талаар бакалавр болоод, магистратурын хоёрдохи курсда һуража байна. Энэ жэлдэ һуралсалаа дүүргэхэ. Минии мүнөө ябуулжа байһан хэрэг саашадаа хүбүүмни үргэлжэлүүлхэ байха гэжэ найданаб.