​Домог суута дуушан

Москвада болон Санкт-Петербургда Улаан-Үдэ хотын Соёлой үдэрнүүд ноябриин 1-һээ 15 болотор үнгэрнэ гэжэ һануулая. Буряадаймнай урдаа хараха дуушан, СССР-эй арадай артистка, оперно сопрано, уласхоорондын олон тоото конкурснуудай лауреат, Зүүн Сибириин соёл болон уралигай академиин профессор Галина Шойдагбаевада Ородой хүгжэмтэ театрнуудай эблэлэй шагнал барюулагдаа.

Энэ дэмбэрэлтэ үйлэ хэрэг ноябриин 4-дэ Станиславскиин болон Немирович-Данченкын нэрэмжэтэ Москвагай академическэ Хүгжэмтэ театрай тайзан дээрэ “Хүгжэм хараха” гэһэн хүгжэмтэ театрнуудай бүхэроссиин фестивалиин гала-концертын үедэ болоо юм.

Галина Шойдагбаева “Домог суу” гэһэн шангай түрүүшын табан лауреадуудай нэгэн болобо гээшэ. Энэ шан хадаа амиды мэндэ сагтаа домог суутай болоһон, дэлхэйн түүхэдэ алтан үзэгүүдээр нэрэеэ мүнхэлүүлһэн хүгжэмтэ театрай элитэ ажал ябуулагшадта барюулагдадаг юм.

- Ород гүрэн дэлхэйдэ олон тоото эрхим һайн дуушадые бэлэглэдэг. Багшанарта, тэрэ тоодо танда баяраа мэдүүлнэбди – та элитэ профессорта, танай шабинарай тус конкурсдо хабаадахань болтогой, - гэжэ Изабелла Габор, Уласхоорондын дуунай конкурсын эмхидхэн байгуулагша болон юрэнхылэгшэ, шан барюулхадаа хэлээ.

Шан барюулалсаһан Дмитрий Бертманэй, “Геликон-Опера” гэһэн Москвагай хүгжэмтэ театрай уран һайханай талаар хүтэлбэрилэгшын тэмдэглэһээр, тэрэ Галина Шойдагбаевагай дуулаһан дуунуудые, гоё һайхан хоолойень ходо шагнадаг юм.

- Танай хоолой ехэ мэдээжэ, бидэ ходо шагнадагбди, өөһэдөө һурадагбди, оюутадаа һургадагбди. Гайхамшагта зохёохы ажалайтнай түлөө, залуу дуушадые һургадагайтнай түлөө ехэ гэгшын баярые хүргэнэбди, - гэжэ “Геликон-Оперын” уран һайханай талаар хүтэлбэрилэгшэ хэлээ.

Шагнал барюулалгын ёһололой урдахана Галина Шойдагбаева түрэл хэлэн дээрээ “Ярууна” гэжэ дуу гүйсэдхэһэн байна. Энэньшье гайхалгүй, Галина Бадмажаповна Ярууна аймагай Нарһатада түрэһэн ха юм.

Иимэ үндэр амжалта туйлахын тула хүдэлжэл, хүдэлжэл байха хэрэгтэй гэжэ “Домог суу” шангай лауреат тэмдэглэнэ.

- Хүдэлхэ хэрэгтэй. Уһан шулуу мүлидэг ха юм. Минии багшанар хэлэгшэ һэн: хүдэлмэригүйгөөр загаһашье сөөрэм сооһоо гаргахагүйш, - гэжэ Галина Шойдагбаева онсолоо.

Буряадай соёлой сайд Тимур Цыбиковэй хэлэһээр, Галина Бадмажаповнагай тус шагналда хүртэһэниинь – бултанаймнай омогорхол. Тэрэ анханһаа хойшо Буряадайнгаа соёл холо ойгуур суурхуулжа ябаа.

- Галина Шойдагбаевагай нэрэ бултанда мэдээжэ. Гүрэнэйнгөө хүгжэмтэ театрнуудаар албан хэрэгээрээ ябахадамни, Лхасаран Линховоин, Дугаржап Дашиев, Ким Базарсадаев, мүн тиихэдэ Галина Шойдагбаева гэгшэдые ходо дурсадаг. Ород гүрэнэй Ехэ театрай захирал Владимир Уриншье, Наталья Сацын нэрэмжэтэ хүгжэмэй театрай хүтэлбэрилэгшэ Георгий Исаакяншье Галина Бадмажаповнае домог суута дуушан гэжэ нэрлэнэ ха юм, - гэжэ сайд тэмдэглээ.