​"Тоска" оперо Ехэ театрай тайзан дээрэ

Пуччиниин “Тоска” оперые Ехэ театрай тайзан дээрэ амжалта түгэс харуулһанай удаа Буряадаймнай оперо болон баледэй театрай дуушад гүрэнэйнгөө гол театрта хүдэлхэ аргатай болоо. Энээн тухай Ехэ театрай захирал Владимир Урин мэдүүлээ юм. Тэрэ Буряадай “Тоскын” хүгжэмэй болон гүйсэдхэхы хэмжээндэ үндэр сэгнэлтэ үгөөд, юумэ ехээр гайхахаяашье болишоһон Москвагай харагшадай зүрхэ сэдьхэл манайхидай хүдэлгэһэниинь юунһээшье сэнтэй гэжэ онсолон тэмдэглээ.

Владимир Уринай һанамжаар, зүжэгэй түгэсхэлдэ харагшад юрэл ёһын тулада альгаа ташаа бэшэ. Үнэн зүрхэнһөө баяраа мэдүүлһэн нэрьемэ альга ташалган болоо. Ходо ерэжэ байдаг дэлхэйн эрхим театрнуудые хаража һурашаһан москвагаархинай манай театрые иимэ һайнаар угтаһаниинь ямар сэнтэйб!

- Энэ спектаклиин һүүлээр артистнуудайтнай нэгые Ехэ театрта уриха хүсэл түрөө, - гэжэ тус театрай захирал хэлээ. Энэнь хэн бэ гэбэл, Скарпиагай парти гүйсэдхэгшэ, Чайковскиин нэрэмжэтэ конкурсын Гран-придэ хүртэгшэ Ариунбаатар Ганбаатар болоно. Владимир Урин Буряадай театрые хэзээшье театрайнгаа тайзан дээрэ гаргахаар бэлэн байһанаа мэдүүлээ. Энэнь баһал тон үндэр сэгнэлтэ болоно гээшэ. Юуб гэхэдэ, Ехэ театрта можо нютагуудай театрнуудай зүжэгөө харуулхань хомор юм. Гансал “Алтан багай” лауреадуудта иимэ эрхэ үгтэдэг.

- Бидэ хододоо таанадые угтан абахаар бэлэмбди. Минии һанахада, ганса бэшэ, хоёр гү, али гурбаншье зүжэг харуулаа һаатнай, театрай танхим дахяад дүүрэн байха һэн, - гэжэ Ехэ театрай захирал хэлээ.

Автор: Анна Огородник
Описание: "Тоска" оперо

Ноябриин 3-да Буряадай “Тоскые” Ехэ театрта харуулхын тула Владимир Урин зүжэгүүдэйнгээ сагай хубаари хубилгаһан байна. Харин энээнһээ бүри урид Дрезденэй баал дээрэ Буряадай соёлой сайд Тимур Цыбиков Ехэ театрай захиралтай зорюута уулзаа юм.

- Владимир Уринтай уулзажа хэлсэхын тула байгша оной январиин эсэстэ амаралта абажа, өөрынгөө мүнгөөр Дрезденэй баалда ошоо һэм. Тэндэ танилсаад, һүүлдэ Москвада бүхы асуудалнуудаа зүбшэн хэлсээбди, - гэжэ Тимур Цыбиков хөөрөө. – Манай зүжэгтэ, дуушадта иимэ үндэр сэгнэлтэ үгэһэниинь Буряадай соёл нилээд үндэр хэмжээндэ гэжэ гэршэлнэ гээшэ.

Буряадай “Тоскын” Ехэ театрай тайзан дээрэ табигдаһаниинь гайхалгүй: тэрэ “Хүгжэм хараха” (“Видеть музыку”) гэһэн Бүхэроссиин хүгжэмтэ театрнуудай түрүүшын фестивалиин түгэсхэлэй зүжэг болоо юм. Найруулан табигшань – суута баритон, Ородой Холбооной арадай артист, Санкт-Петербургын болон Москвагай гүрэнэй консерваторинуудай, ГИТИС-эй, МГУ-гай профессор Юрий Лаптев.

- Юундэ имагтал “Тоскые” харуулха гээбибди гэхэдэ, энэ зүжэгтэ театраймнай эрхим гүйсэдхэгшэд булта шахуу дуулана, - гэжэ зүжэг найруулагша ойлгуулаа.

Зүжэгтэ дуулагшадые нэрлэе, Тоска - Самбуугийн Батчимэг, Каварадосси – Михаил Пирогов, Скарпиа – Ариунбаатар Ганбаатар, Аджелотти – Эдуард Жагбаев, ризничи – Галсан Ванданов, Шарроне – Доржо Шагдуров, Споллеттын хонишон – Чингис Иванов.

Автор: Анна Огородник
Описание: Буряадай дуушад Москвагай харагшадта һайшаагдаа

Юрий Лаптевай хэлэһээр, Москвагай харагшад дэлхэйн мэдээжэ оперо болодог “Тоскые” харахаяа, Чайковскиин нэрэмжэтэ конкурсын Гран-придэ хүртэһэн Ариунбаатар Ганбаатарые зорюута шагнахаяа, Буряадай оперын театртай танилсахаяа ерээ.

- Гол зүжэгнай табигдаа, ехэ һайн сэгнэлтэнүүд үгтэбэ. Улаан-Үдын Соёлой үдэрнүүд һайнаар үнгэржэ байна! – гэжэ Буряадай соёлой сайд Тимур Цыбиков тэмдэглээ.