872
Буряадай циркын найруулан табиһан “Байгалай домогые” 3 000 гаран москвагайхид хараба.
Москва хотодо Буряад Уласай Соёлой үдэрнүүд үнгэржэ байна. Түрүүшын үдэр, ноябриин 1-дэ, манайхин хэдэ хэдэн талмайнууд дээрэ концерт наадаяа харуулжа, түб хотодо ажаһуудаг нютагайхидаа, Ородой Холбооной уралиг, соёлдо хабаатай тушаалта нюурнуудые гайхуулба, баясуулба.
Европын хэмжээндэ айхабтар ехэ гэжэ тоологдодог Москва хотын Ехэ циркын дүхэриг талмай дээрэ урагшатай тоглолто үнгэргэбэ. Эхин дээрэнь энэ циркын захирал Эдгар Запашный, манай соёлой сайд Тимур Цыбиков гэгшэд энэ үдэшые нээгээ.
Домог соо арюун гоохон Ангар дүүхэй Енисей баатар хоёрой үйлэ ябадалнууд циркын тоглолтын аргануудай ашаар харуулагдана. Харагшадай халуунаар дэмжэһые, таһалгаряагүй гэхээр энеэдэн соогуураа альга ташаһые гайхамаар байгаа.
– Энэ нааданай хубсаһан, хүгжэмтэ шэмэглэл, нааданай үндэһэн удха ехэ һайшаагдаа, – гэжэ гэрэл зураг буулгагша, цирк шэнжэлэгшэ Евгений Чесноков хэлэбэ. Тиихэдээ манай циркын зүжэгшэдэй шадамараар, хүнгэхэнөөр бэе бэеэ халан абажа наададагые иимэ мэргэжэлтэдэй эрхим тала гэжэ онсолон тэмдэглээ.
Владимир Сазонов болон бусад харагшад тон баяртайнууд, үндэһэн маягтай наадан хадаа илангаяа һонирхолтой, гоё байба гэжэ ехэ магтажа, омогорхожо байһанаа мэдүүлээ.
Москвагай циркын захирал Эдгар Запашный ехэтэ һонирхожо харабаб гэжэ мэдүүлээ.«Танай сайдтай һара урда тээ хөөрэлдэхэдөө, үнэн дээрээ иимэ байха гэжэ этигээгүйб, энэ ехэ дүхэриг талмай дээрэмнай яагаад тоглохо юм, энэнь бүтэншьегүй байхадаа болохо гэжэ һанаагаа зобонги байгааб. Зүжэгшэдэйтнай өөрынгөө циркдэ хандасые анхарааб, энэнь намайе ехэ гайхуулаа гээшэ», – гэжэ нэмэжэ хэлэбэ.
- Танай циркын тоглолто намда ехэ һайшаагдаа, минии оройдоошье хүлеэгээгүй һонирхол үүсхэбэ, тиихэдээ циркын тоглолтын аргаар иигэжэ үндэһэн соёлоо, түүхэ домогоо харуулжа болохоор гэжэ харабаб, танилсабаб, баярлаба гээшэб, - гэжэ Ородой гүрэнэй циркын захирал Дмитрий Иванов мэдүүлээ.
Автор: Николай ШАБАЕВ
