​Соёлой байшан заһабарилагдаха

Түнхэн аймагай Харбяангууд һууринай ажаһуугшад тон баяртай. Ушарынь гэхэдэ, тэдэнэй үни удаан хүлеэһэн Соёлой байшанай заһабарилга эхилхэнь. Энэ баяраараа харбяангуудайхид Арадай Хуралай һунгамалнуудтай хубаалдаба.

Тус һууринда Соёлой байшан 20-дохи зуун жэлэй 1960-аад онуудта баригдаһан байна. Тэрэ гэһээр эндэ ямаршье заһабарилга хэгдээгүй.

Харбяангуудай һомоной дарга Вячеслав Балдановай хэлэһээр, бүхы ажалда 3 сая 600 мянган түхэриг гаргашалагдаха. 

“Соёлой байшан зосоо, газааһаань дулаа баридаг хэрэгсэлнүүдээр заһабарилагдаха. Мүн тиихэдэ шэнэ дулаасуулгын соргонууд хэгдэхэ, сонхонууд табигдаха. Хушалтань һэлгэгдэхэ”, - гэжэ Вячеслав Балданов хэлэнэ.

Түнхэн аймагай засаг дарга Иван Альхеевэй хэлэһээр, тон түрүүн заһабарилгада 4 сая 800 мянган түхэриг гаргашалагдаха гэжэ түсэблэгдэһэн байгаа. Харин заһабарилга хэхэ эмхи энэ сэнгыень унагаагаа. Үлэһэн 1 сая 200 мянган түхэригтэ соёлой байшанда тусхай туһаламжа үзүүлэгдэхэ, шэнэ оньһон түхеэрэлгэнүүд, хэрэгсэлнүүд абтахаар хараалагдана.

- Мэдээжэ ниитын болон гүрэнэй ажал ябуулагша Владимир Бизьяевич Саганов танай нютагай баатар хүн. Тиимэһээ нютагайнгаа урдаа хараха хүбүүнэй нэрые Соёлойнгоо байшанда үгөө һаатнай, баярламаар байна, - гэжэ Арадай Хуралай Түрүүлэгшын орлогшо Владимир Павлов дурадхал оруулба.

Бүхы ажал Сагаалганай һайндэр болотор дүүрэхэ ёһотой. Харбяангуудай хүн зон Тахяа жэлые Соёлой шэнэ байшанда угтахань болтогой.

Автор: Борис Балданов
Описание: И.Альхеев, В.Павлов