​Алдарта "Байгалай" асари ехэ амжалта

Буряад угсаатаниие бүхы дэлхэйн хэмжээндэ түрүү зэргэдэ түлөөлжэ ябадаг алдарта “Байгал” театр аншлаг ехэтэйгээр айлшалжа ерэбэ ниислэлнүүдээр.

Москва, Санкт-Петербург хотонуудта эмхидхэгдээд, Улаан-Үдэ хотын энэ долоондо түгэсэһэн үдэрнүүдтэ Ородой Холбооной урлагай габьяата ажал ябуулагша Дандар Бадлуевай хүтэлбэрилдэг суута театр ялас гэмэ тоглолто үшөө дахин табижа, гүрэнэй хоёр ниислэлнүүдтэ ажаһуугшадай зүрхэ сэдьхэл баяраар халяагаад, Буряад орондоо бусажа ерэбэ.

Анхан сагта агууехэ гүрэнэймнай һалан һандараагүй, үшөө хүсэтэй байха үедэл һүүлшынхиеэ иимэ тоглолто, харалганууд холын ниислэлдэ эмхидхэгдэжэ, бүгэдэ арадуудай, хизаар, можонуудай амжалта, хүгжэлтэ харуулагдадаг байһан гээшэ бэзэ.

Буряадаймнай ниислэлэй анхан байгуулагдаһаар 350 жэлэй ойн баяр тохёолдожо, гүрэн түрымнай мүнгэн һанһаа бага ехэш һаа, “хашарһан” зэд ханхинан унажа, холын хотонууд руу олоороо ошожо харуулха аргатай болоо ха юмбибди соёл урлалаа.

Түрүү театрыемнай урагшатайгаар ударидажа ябаһан Дандар Бадлуев мантай хөөрэлдэхэдөө, соёлой энэ эмхиин зохёохы бүлэг аяар 80 хүнһөө бүридэһэн байгаа. Тэрэ тоодо 10-аад дуушад, 26 хатаршад, 30 гаран хүгжэмшэд, абяа, гэрэл тааруулдаг ажалтад. Дээдын шанарай тоглолтонуудые хаража садашаһан, ”эрхэ” харагшадай урда эрхимэй эрхим дуу, хатараа “Байгалнай” бэлэглээд, бултыень бахархуулаа. Суута Дандар Бадлуев өөрөөшье урданай буряад “Хадын хурса ногоондо” гэжэ дуу харагшадай урда хангюурдажа, сугларһан зоной нюдэнэй нулимса гаргажа шадаа гээд, тэндэ байлсаһан нэгэ хүн омогорхон хөөрэнэ һэн.

Асари ехэ амжалта асаржа шадаһан агууехэ “Байгал” театрайнгаа алдар солые бүгэдэ буряад арадай уласай хэмжээндэ 95 жэлэй туршада барлагдан гаража байдаг “Буряад үнэн” сониной зүгһөө магтан түүрээн амаршалнабди!