​Тоосоото тоглолто

Үнгэрһэн амаралтын үдэр Буряад Уласай Арадай уран бүтээлэй түбэй зохёохы бүлгэмүүдэй “Эхэ дайдадаа инаг дураяа мэдүүлнэбди” гэһэн гаршагтай нэгэдэмэл тоглолто үнгэрөө.

Энэ наадан намарай хаһада эмхидхэгдэжэ, Түбэй дэргэдэхи бүлгэмүүд жэл соо туйлаһан амжалтануудаа хүн зондоо харуулдаг юм. Харин зунай эхиндэ хэгдэһэн ажалайнгаа тоосоото наада дэлгэжэ, дүн согсологдодог.

Энэ удаа нааданда арадай аман зохёолой дүрбэн бүлгэм “Магтаал”, “Уряал”, “Наран Гоохон”, “Ойхон” болон Үбэр Байгалай шэмээшэгүүдэй “Истоки” гэһэн хоор, “Лотос”, “Булжамуур” гэһэн хатарай ансамбльнууд хабаадаа.

Автор: Павел Молчанов
Описание: Тоглолтын үедэ

- Эдэ бүлгэмүүд тус тоглолтоор шэнэ хаһаяа эхилбэ. Ерэхэ жэлдэ манай хоёр бүлгэм ойн баярнуудаа тэмдэглэхэ юм, - гэжэ түбэй уран һайханай таһагые даагша Маргарита Чимитова мэдээсэбэ.

50 жэлэйнгээ ойн баяр “Истоки” гэһэн Үбэр Байгалай шэмээшэгүүдэй хоор 2017 ондо тэмдэглэхэ. 1967 ондо энэ ансамбль Зүүн Сибириин соёлой дээдэ һургуулиин багша Николай Дорофеев Ехэ Хунила гэһэн һууринһаа Улаан-Үдэ нүүжэ ерэһэн зонһоо бүридхэжэ байгуулһан юм. Тэрэ гэһээр энэ ансамбль шэмээшэг арадай заншалта байдал, соёл, дабтагдашагүй аялга дуугаар арад зоноо баясуулжа байдаг. Мүнөө тус бүлгэмые Буряад Уласай соёлой габьяата хүдэлмэрилэгшэ, Буряад Уласай Гүрэнэй шангай лауреат Вера Долженко хүтэлбэрилнэ. Харин “Уряал” гэһэн бүлгэм (хүтэлбэрилэгшэнь Аюша Ринчинов) ерэхэ жэлдэ 35 жэлэйнгээ ойн баяр тэмдэглэхэ юм.

Мүнөө жэлдэ Буряад Уласай Арадай уран бүтээлэй түбэй зохёохы бүлгэмүүд ехэ олон хэмжээ ябуулгануудта хабаадаа, шэнэ түсэлнүүдые зохёогоо, ехэ тоглолтонуудые бэлдээ.

- Манай бүлгэмүүд өөһэд хоорондоо ехэ эбтэй юм. Бэе бэеынгээ амжалтада баясажа, бэе бэеэ дэмжэжэ байдаг. Иимэнүүд тоглолтонуудые үнгэргэхэдөө, манай дуушадай бэлиг талаан хүгжэжэ, шэнэ гүйсэдхэгшэдтэй, бэлигтэй хүтэлбэрилэгшэдтэй боложо байнабди гэжэ харуулнабди, - гэжэ түбэй ахамад найруулагша Ольга Вавилова хөөрэнэ.

Зүүн, баруун буряадуудай заншалта дуу, хатар наада харуулжа, арадайнгаа дундаршагүй баялигыень эдэ дүрбэн бүлгэм харуулаа. Эдээнһээ гадна, “Булжамуур”, “Лотос” бүлгэмүүдэй хатаршад гоё һайхан хатарнуудаараа харагшадаа хужарлуулаа. Илангаяа “Булжамуур” бүлгэмэй жаахан хөөрхэн хатаршад бултанай зүрхэ сэдьхэл буляагаа. Хатар бүхэниинь - нэгэ ямаршьеб һонин зураглал. Жэшээнь, сүлжээ холбоондо тэмээнэй хажууда ногоон дэгэлтэй, улаахан пулаадтай жаахан басагахан ехэ энеэдэтэй, хүхюутэй зогсожо байһан дүрэ ехээр таража, олондо һайшаагдаа. Энээн дээрэ үндэһэлэн, “Хүхюу тэмээн” гэһэн хатар зохёогдоо. Иимэ һонин хатарнуудые зохёожо, үхибүүдые һургажа байдаг хүтэлбэрилэгшэд Ородой Холбооной Уласай, Буряад Уласай соёлой габьяата хүдэлмэрилэгшэ, Ородой Холбооной “Душа России” гэһэн шангай лауреат Людмила Овчинникова, балетмейстер Алексей Цыремпилов гэгшэд болоно.

Нэгэ саг хахадай хугасаада харуулһан наадан нюдэ сабшаха зуура шэнгеэр түгэсэбэ. Булта нобшоронгүй, яб байса, эмхитэйгээр наадаяа харуулаа

Арадай уран бүтээлэй түб һаяар хэдэн һонин тоглолтонуудаараа харагшадаа баясуулха. Бүри дүтын сагта “Истоки” гэһэн Үбэр Байгалай шэмээшэгүүдэй хоор тоосоото наадаяа дэлгэхэ. Энэ нааданда хасаг хүбүүнэй шэмээшэг басага һамга абаһан тухай ёһо гурим харуулһан наадан табигдаха.