956
Тоотой наһатайшье һаа, түрэл буряадаараа гарадаг газар дэлхэй дээрэ ганса “Буряад үнэн” сониндоо буряад-монгол угсаатан энэ ерэхээ байһан Тахяа жэлдэ заабол захил хэжэ, түрэл арадаа, буряад хэлэеэ, үндэһэн зохёолоо, соёлоо, урлагаа хүндэлхэ ёһотойбди.
Түрэл сониноо анхаран уншажа, Буряад оронойнгоо арадтаа туһатай, һонин намтартай хүн зонтой танилсанабди. Тэдэнэй ажал хэрэгүүдээр, һанаа зобооһон бодолнуудаар һонирхонобди. Нютаг нютагай зон ямар ёһо заншалтайб, гуримтайб гэжэ мэдэжэ абахадань, залуушуулдамнай саашанхи ажабайдалдань ехэл хэрэгтэй гээшэ.
Хорёод жэл соо “Буряадай түрүү хүнүүд” гэһэн конкурс “Буряад үнэн” сонин эмхидхэдэг, энэнь ехэ һайшаалтай.
Эндэ хэблэгдэһэн һонирхолтой олон зураглалнуудые манай уншагшад уншажа, эдэ хүнүүдээрээ омогорходог болоо. Һаяхан Захааминай Нурта нютагта айлшаар буухадаа, һургуулиин музей соо “Буряадай түрүү хүнүүд” гэһэн коннкурсын хэмжээндэ толилогдоһон материалнуудые харахадаа, һонирхожо, сэдьхэлээ ханаа һэм.
Манай һургуулиин хүүгэд мүн лэ иимэ материалнуудые суглуулжа, түрэл арадайнгаа суута хүбүүд, басагад тухай хөөрэлдөөнүүдые эмхидхэдэг заншалтай болонхой. Манай студиин хүбүүд дарханай мэргэжэлдэ һурадаг хадаа Буряадайнгаа бэрхэ урашуулай, дархашуулай намтарнуудые, бүтээһэн ажалайнь дүрэ зурагуудые һонирхон суглуулжа, хэн нэгэниинь ээлжээтэ хэшээлдээ ерэхэдээ хөөрэжэ үгэдэг. Манай һургуулида бүхы аймагуудһаа ерэһэн һурагшад һурана.
Хуушан архивуудһаа, альбомуудһаа абтаһан хоморой гэрэл зурагууд “Буряад үнэндэмнай” бүри олоор үгтэдэг һаа, одоол гоё һэн. Үшөө тиихэдэ үндэһэн Буряадайнгаа бэрхэ урашуулай, дархашуулай зүбшэл, заабари толилоо һаа, манай хүүгэдтэшье, юрэл олондо туһатай байха һэн гэжэ һанагдана. Онсолбол, хайшан гээд һэеы гэр табихаб, модоор заншалта түхэреэн гэр барихаб, хубсаһа хунар яажа оёхоб, мориной тоног, ангуушадай зэбсэг, элдэбын амһарта, ажабайдалай, гэрэй хэрэгсэлнүүдые хилгааһа нооһоор, арһа шүрбэһөөр, алта мүнгөөр, модоор, үндэһөөр, үйһөөр яагаад бүтээхэб гэхэ мэтын зураглалнууд хэндэшье һонирхолтой байхаһаа гадна, туһатай байха гэжэ һанагдана.
Өөһэдынгөө ажал хэрэгүүдтэ ямар нюуса оньһон аргануудые хэрэглэдэг тухайгаа “Буряад үнэндөө” бэшэхыень уран дархашуулые уряалха байнаб. Дүй дүршэлөөрөө хубаалдажа, олоороо зүбшэжэ байхада, аятай, урагшатай, бүтэмжэтэй ха юм. Би өөрөө үйһөөр урлал хэдэг хадаа энэ шадабарияа буряад зонтоёо дуратайгаар хубаалдаха хүсэлтэйб. Хамтаараа сугларжа, ниитэ нэгэ хүсэн боложо, хабаараа асуудалнуудаа шиидхэжэ үзэе, хэн хэндэмнайшье аша туһатай байхал.
Угайнгаа хэрэгтэй урлал
Улам саашань дамжуулая.
Ехын энэ хэрэгымнай
Ерээдүй сагта сэгнэхэл!
Дээрэ үгтэһэн гэрэл зураг дээрэ зүүн гарһаа: Валерий Парпаев (Түнхэн), Баир Эрдынеев (Баргажан), Валерий Цыбиков (Захаамин), Согто Дашеев (Хори), Ирина Намдакова (Сэлэнгэ), Анатолий Цыденов (Захаамин), Дамба Ульзетуев (Захаамин) уран дархашуул "Минии шабинар - минии багша" гэһэн үзэмжэдэ. 2010 оной Сагаалган.
Автор: Валерий ЦЫБИКОВ
