​Хатар зааха хүсэлтэй

Бага наhанhаа хатарха, дуулаха дуратай Сандан Гомбоев дунда hургуулияа дүүргэhэнэй удаа П.И.Чайковскиин нэрэмжэтэ соёл, урлагай колледжын хатарай таhагта ороhон байна. Хүдөөhөө ерэhэн хүбүүндэ hуралсалынь ехэ hайшаагдана, олон нүхэдтэй болоhондоо тэрэ урмашана.

- Сандан, өөр тухайгаа хөөрэжэ үгыш.

- Би 1999 ондо Хөөрхэ нютагта Ехэ Шоно галзууд угай Гомбоев Ширабнимбуутанай гэр бүлэдэ одхон хүбүүн түрөөб. Эхин классуудта нютагтаа hураад, Б. Базароной нэрэмжэтэ Дээдэ-Хэжэнгын дунда hургуулида 11-дэхиие дүүргээб. Һуралсалайнгаа хажуугаар олимпиадануудта амжалтатайгаар хабаададаг hэмби. Һургуулидаа хатарай кружогто ябадаг байгааб. Жэл бүри Сагаалганай үедэ аймагай түбтэ үнгэргэгдэдэг ёохорто хабаададаг байгаабди. 2016 оной найрта Гран-при шанда хүртөө hэмди. Тэрэл жэлдэ «Баатар-Дангина» конкурсдо хабаадажа, 3-дахи hуури эзэлээб. Энэ харалганда намтай бэлэдхэл хэhэн багшанартаа - С.Н. Балдандоржиевада, Р.Б. Будажаповада, А.Б. Будожаповада, С.Д. Очировада ехэ баярые хүргэнэб.

- Оюутанай ажабайдал ямар байнаб?

- Манай хэшээлнүүд үглөөнэй 8 сагhаа үдэшын 6 саг болотор үнгэрдэг. Һуража ядахаар бэшэ, харин хүдөөhөө ерэhэн бидэнэртэ, илангаяа хүбүүдтэ уян нугархай байхын тула ехэ hорилго хэрэгтэй байна. Бүхы оюутад хамтын байраар хангагдана. Суг hуража байhан нүхэдөөрөө hайн танил болообди. Аха курсын хүбүүд, басагад дүй дүршэлөөрөө хубаалдадаг. Манай таhагта хоёр шэглэлээр hураха арга бии: нэгэдэхинь - хатар зааха багша болохо, хоёрдохинь - өөрөө хатарха, hуралсалдаа оролдосотойгоор хандажа, эрхимээр дүүргэбэл, саашадаа ВСГАКИ-гай гурбадахи курсда орожо, дээдэ hургуулитай болохо боломжо бии. Би өөрөө хатар зааха хүcэлэнтэйб.

- Ямар шалтагаанhаа хатарай hургуули шэлэhэн байнаш?

- Хүн бүхэн hанаhанаа бэелүүлхэеэ оролдодог гээшэ ааб даа. Би багаhаа хатарта, уран hайханда дуратайб. Тайзан дээрэ зоной урда гарахадаа, сэдьхэл доhолгомо уран найруулга табихадаа, харагшадые баярлуулхадаа, зосоомни бүхы дэлхэй эрьеhэн шэнги болодог. Энэ баяраа бултантай хубаалдаха дуран түрэдэг.

- Үглөөнhөө үдэшэ болотор гансал hургуулидаа байдаг гүш?

- Сүлөө сагтаа суг hурадаг хүбүүдээрээ сугларжа, волейбол наададагбди. Футболой секцидэ ябадагби. Дуушье дуулажа туршадагби.

Холын бодолтой, урагшаа hанаатай, эрмэлзэл, оролдолго ехэтэй Санданда hанаhанаа бэелүүлхыень үнэн зүрхэнhөө хүсэнэб.