​Бурхан яажа наһа хубаагааб?

Дэлхэйн бүхы амитадай эдлэхэ наһа хубаалган боложо, ехэ арсалдаан гараба. Хэн хэды наһа наһалхаб гэлдээд лэ, тоосолдоон болоо юм бэзэ. Арсалдаанай болоходо, бурхан багша бултанда 25 наһа нэмэжэ үгэбэ ха.

Булта тараха болоод байтараа, 25 наһан намда бага байна гэжэ хүн бодоод, үшөө хэды наһа нэмэхыень бурханһаа гуйба ха. Бурхан бодожо үзөөд, шинии хойноһоо ондоо амитад баһа гуйгаад эхилхэ, өөһэдөө хоорондоо оромоо ологты гээд гаргаба.

- Минии наһа абыш даа, үшөө 25 жэл соо ашаа зөөхэ намда ехэ хүндэ байха, - гэжэ морин өөрынгөө 25 наһые хүндэ үгэхэ болобо.

Хүн мориной наһа нэмэжэ абаад, 50 наһа тоолоод үзэхэдэнь, багаар лэ һанагдаха юм.

Хажуудань байһан нохой өөрынгөө 25 жэлые үгэхэ болобо. 75 наһа эдлэхэ болоһон хүндэ багадаад лэ байһан шэнги. Тиихэдэнь һармагшан бодожо үзөөд, үшөө 25 жэл соо амитадай наадан боложо ябанхаар гээд, өөрынгөө хуби болохо 25 наһаяа бэлэглэбэ.

100 хүрэхэ болоһон хүнэй һанааншье амарба хэбэртэй.

Дүн гаргахада, иимэ:

- Бурханай үгэһэн 25 жэлые хүн гээшэ өөрынгөө дураар эдлэдэг;

- 25-50 наһанай зай соо мориной хүсэ шадалаар ажал хэдэг;

- 50-75 наһандаа суглуулһан зөөриеэ аршалха, хамгаалха, эдлэхэ;

- 75-100 наһандаа хэн ерээб, ошооб, хэн юу һарбайгааб гэжэ сонходо һууха.