821
Аха үндэр аймагай Бүрэн-голой эдир хатаршад уласхоорондын хэмжээндэ амжалта туйлажа ерэбэ.
Чуваш Уласай Соёлой яаман хүүгэдэй хатарай уласхоорондын харалга соносхожо, хоёр үдэрэй туршада хаа-хаанаһаа хабаадагшадые угтан абаа. Пермь, Самара, Йошкар-Ола, Тула, Казань, Москва болон бусад газарнуудһаа хамта дээрээ 180 бүлгэм харалганда оролсоһон байна. Манай Буряад орониие Аха аймагай Бүрэн-Голой эдир хатаршад түлөөлөө. Хоёр хатар бэлдэһэн байна. Һоёд арадай хатар 10 басаган хатараа, харин Оля Цыренова гансаараа “Капризы природы” гэһэн хатар гүйсэдхэбэ. Тиигэжэ Оля нэгэдэхи шатын дипломоор шагнагдаа, харин хатарай бүлэг 1-дэхи шатын лауреат болоод, гоё һайханаар бүтээгдэһэн кубогта хүртөө. Хатарай харалганай Гран-при шанда Самара хотын хүүгэдэй хатарай “Атлантик” гэһэн бүлгэм хүртэһэн байха юм.
Ородой Холбооной хатарай дээдын һургуулиин багшанар, мэдээжэ артистнар, “ТНТ” каналда гарадаг “Хатара” гэһэн түсэлдэ хабаадагшад, соёлой мэргэжэлтэд уласхоорондын “Хатарая” гэһэн урилдаанай жюриин гэшүүд байгаа. Буряад оронһоо ерэһэн эдир хатаршадай гоё һайхан үндэһэн арадай хубсаһа, дуу, хүгжэм, найруулан табилга болон үхибүүдэй бэлигые жюри онсо тэмдэглээ.
- Олон үхибүүд булта шадамар бэрхээр хатараашье һаа, манай эдир хатаршад үндэһэн арадайнгаа онсо маяг, ёһо заншалаа харуулжа шадаа. Басагаднай булта зохидхон, даамай абари зангаашье харуулжа, хүн зондо ехэтэ һайшаагдаа. Поезд соошье ябахадаа, айлшадай буудалдашье байхадаа, харалганайшье үедэ бэеэ ехэ зохидоор абажа ябахадань, бусад зон гайхан магтаа, - гэжэ багшань хөөрэнэ.
Улаан-Үдын хатарай багша Анна Зиберт һурагшадта хатар найруулжа үгэһэн юм. Тэрэ гэһээр бэлигтэй хатаршан, балерина наһанайнгаа амаралтада гараһаншье һаа, Аха аймагай үхибүүдэй хатарай бүлгэмүүдтэ хатарнуудые найруулан табидаг байна.
Бүрэн-голой һургуули дүүргэжэ, хатарай багша боложо, нютагаа бусаһан Зоригма Гомбожаповна Дугарова мүнөө бүлгэмые хүтэлнэ. Залуу багша үхибүүдые хатарта һургана, бэлигыень мүлихэ гэжэ харалгануудта, фестивальнуудта хабаадуулхаяа оролдоно.
Бүлгэмэй амжалта гэхэдээ, аймагайнгаа уран һайханай харалган болон урилдаануудта эдэбхитэйгээр хабаадалсажа, түрүүлжэ байдаг. Нёдондо Буряад Уласай хэмжээндэ үнгэргэгдэһэн “Арт–Байгал” гэһэн харалганда дипломоор шагнагдаа һэн.
- Чебоксар хотодо хатарай урилдаан соносхогдоо гэжэ интернет сүлжээнһээ дуулаад, мэдүүлгэ үгөөд, урилга ерэхэдэнь, харгыда суглараабди. Мүнөө сагта мүнгэ алтанай асуудал хүшэршье һаань, һургуулиимнай захирал Туяна Самбялова бидэниие дэмжэжэ, Улаан-Үдэ хүрэхэ, гэртээ бусаха харгыемнай даагаа. Мүнгөөр туһалжа шадаха зониие бэдэрээ, урилдаанда хабаадалгын мүнгэ баһал түлөө. Харин холын харгын мүнгэ түрэлхид өөһэдөө олоо, - гэжэ Гэрэлма Батоевна хэлэнэ.
Гансаараа хатар гүйсэдхэжэ, нэгэдэхи шатын дипломдо хүртэһэн «Мүнгэн туяа” бүлгэмэй солистка наймадахи ангиин Оля Цыренова гурбатайһаа хатаржа эхилһэн. 3-дахи ангида һуража байхадаа, “Гимнастки” гэһэн кино хараад, уран нугархай басагадаар ехэтэ һонирхоһон юм. Тэдэниие һажаажа, өөрөө бэеэ һорижо эхилээ. Эжынгээ хажууда ерээд, гэнтэ гимнастикын ехэ орёо үйлэ харуулжархиһан юм. Тэрэ үедэ һургуулидань эмхидхэлэй талаар захиралай орлогшоор ажаллажа байһан Сарана Доржиевна Дугданова уран нугархай басаганда хатар заажа эхилһэн байна.
- Өөрөө гурбан сольно хатартай болонхойб. Могой жэлдэ зорюулжа, гимнастикын үйлэтэй хатар гүйсэдхөө һэм. Нёдондо “Арт-Байгал” хэмжээндэ нэгэ хатар бэлдээ һэмди, багшамни заажа үгөө. Мүнөө эндэ ленточкэнүүдтэй хатар гүйсэдхөөб. Энэ хатар Анна Жамсарановна найруулан табяа, - гэжэ Оля хөөрэбэ.
Иимэ бэлигтэй, хүсэл бодолтой, урагшаа һанаатай хүмүүжүүлэгшын, багшанарай, хүтэлбэрилэгшэдэй ашаар үхибүүд бэлиг шадабарияа мүлин хүгжөөнэ гээшэ. Холо газараар ябажа, элдэб харалгануудта хабаадажа, үхибүүд улам бэрхэ, шударгы, дүршэл ехэтэй болоно.
Автор: “Мүнгэн туяа” гэһэн бүлгэмэй жасаһаа гэрэл зураг абтаба
Описание: Оля Цыренова хатаржа байна
