​Эб найрамдалай дугы

Буряадта ажаһуудаг олон тоото үндэһэ яһатаниие нэгэдүүлһэн «Найрамдалай дугы» гэжэ наадан 2008 онһоо Үндэһэтэнэй 1-дэхи лицей-һургуули эмхидхэжэ эхилһэн юм. Декабриин 8-9-нэй үдэрнүүдтэ дүрбэдэхиеэ энэ хэмжээ ябуулга үнгэргэхэдөө, һургуулиингаа 70 жэлэй ойн баяртай дашарамдуулһан байна.

Үндэһэтэнэй 1-дэхи лицей-һургуули Буряад орон дотороо нэрэтэй түрэтэй түрүү һургуули гээд мэдээжэ. Үргэн хэмжээндэ ойн баяраа тэмдэглэбэлнь, Буряад театр багадаха һэн. Түби дэлхэйгээр тарашаһан шабинарай хабаадалгагүйгөөр, мүнөөдэрэйнгөө һурагшадай, багшанарай, ветерануудай, мүн энэ нааданда хабаадажа байһан һургуулиин түлөөлэгшэдэй дулаахан дүхэриг соо соморхоноор лицей-һургуули 70 жэлэйнгээ ойн баяр тэмдэглэбэ. Һургуулиие мүнөө ударидажа байһан Булат Баирович Шойнжонов элидхэл хэхэдээ, һургуулиин түүхэ дурсаба:

- Эсэгэ ороноо хамгаалгын дайнай һүүлээр, 1946 оной октябриин 15-да, 18 дугаар буряад һургуули байгуулагдаһан юм. 1956 ондо хүдөөгэй малшадай хүүгэдые эрдэм номдо һургаха зорилготойгоор Буряад Уласай 1-дэхи интернат-һургуули гэжэ нэрлэгдэһэн. 1980-яад онуудта һургуулиин дэргэдэ «Наран» ансамбль, урлагай һургуули болон бусад нэмэлтэ һуралсалай һалбаринууд эмхидхэгдээ. 1993 ондо һургуулиин захирал байһан Жалсан Батуевич Санжиевай эдэбхи оролдолгоор Үндэһэтэнэй 1-дэхи лицей-һургуули гэжэ шэнэ нэрэ абажа, хүгжэлтын үшөө нэгэ шатада гараһан. 2006 ондо һургуулиин захирал Баир Баторович Жалсановай үүсхэлээр, бэлигтэй үхибүүдэй юрэнхы болбосоролой лицей-һургуули болоһон юм.

Мүнөө дээрээ тус һургуулида 600 гаран үхибүүд һурана. Тэдэнэй олонхинь «Найрамдалай дугыда» хабаадаа. Үшөө тиихэдэ 120 гаран һурагша Үбэр Байгалай хизаарһаа, Эрхүү можоһоо, мүн Монголһоо, Хитадай Шэнэхээнһээ ерэжэ хабаадаа.

Буряад үндэһэн соёл, заншал харуулһан һэеы гэрһээ эхилээд, хубсаһа хунар, эрын гурбан наадан болон бусадые үхибүүд мастер-классуудай үедэ харуулан хөөрэжэ үгөө. Жэшээнь, Захаамин аймагай Сахирай интернат-һургуулиин 11-дэхи ангиин һурагша Настя Будаева һэеы гэр дотор хаана юун табяатай байхаб гэжэ һайнаар мэдэнэ. Харин Яхадай Арктика-интернадһаа ерэһэн эвенк яһанай һурагшад һонирхолтой үзэсхэлэн асаржа, түрэлхи арадайнгаа үндэһэн заншал, ажабайдал тухай хөөрэбэ. Улаан-Баатарай Монгол-Ородой һургуулиин шабинар морин-хуур дээрэ наадажа, хуушан монголоор бэшэжэ, моодо харуулжа, бүгэдэниие һонирхуулаа.

Хэрбэеэ Тарбагатайн шэмээшэг үхибүүдэй хатар наадаяа дэлгээгээ һаа, Онохойн татаар яһанай үхибүүд пулаад яагаад уяхаб гэжэ заажа үгөө. Гадна домог түүхэнүүдые хөөрөө, үндэһэн хубсаһаяа харуулаа.

Иигэжэ Үндэһэтэнэй 1-дэхи лицей-һургуули ойн баяраа тэмдэглэбэ.

Автор: Нина Сахилтарова
Описание: Буряад Уласай болбосоролой болон эрдэм ухаанай сайдай уялга дүүргэгшэ Баяр Жалсанов тус һургуулиин захирал байха үедөө энэ нааданай эхи табиһан юм 

Автор: Нина Сахилтарова
Описание: Лицей һургуулиин захирал Булат Шойнжонов һур харбалгаар мастер-классай үедэ

Автор: Нина Сахилтарова
Описание: Полягуудай соёлой түбэй гар урлал

Автор: Нина Сахилтарова
Описание: Анна Жердева

Автор: Нина Сахилтарова
Описание: Яхадай Арктика-интернадһаа ерэһэн эвенк яһанай һурагша

Автор: Нина Сахилтарова
Описание: Тарбагатайн «Черпачок» ансамбль

Автор: Нина Сахилтарова
Описание: Шэнэхээнэй айлшад

Автор: Нина Сахилтарова
Описание: Улаан-Баатарай Монгол-Ородой һургуулиин шабинар