​Дэрээнэй багашуулай бэлиг шадабари

2016 оной ноябриин 24-дэ Бандида хамба лама Дамба Даржаа Заяевай нэрэмжэтэ Буддын шажанай ехэ һургуулида түрэлхи хэлээр "Эхэ хэлэн – манай баялиг" гэhэн урилдаан үнгэрөө һэн.

Манай Хурамхаан аймагай Дэрээнэй дунда һургуулиин багашуул эндэ хабаадаа: Кирилл Майоров, Эрдэм Эрдыниев, Гэрэлма Хуриганова, Саша Табралова, Соёлма Бишадаева, Вика Бадармаева, Арьяна Николаева, Баяна Гадьянова болон бусад. Эдэ үхибүүднай түрүүшынхиеэ иимэ урилдаанда мүрысөөшье һаа, оролдосотойгоор бэлдэжэ, гэрэй даабаринуудые дүүргэжэ, бэеэ hайнаар харуулаа. “Хоёр хэлэ тэгшэ мэдэе” гэһэн урилдаанда буряад хэлэн дээрэ үгүүлэл оршуулха, тэрэнээ уран гоёор хөөрэхэ даабари байгаа. 9-дэхи ангиин һурагша Саша Табралова энэ урилдаанда 8 балл абаһан байна. 5-дахи ангиин һурагша Эрдэм Эрдыниев шог удхатай хөөрөөнүүдые бэлдэжэ, “Оньһон үгэ оностой, олоной үгэ тодостой” гэһэн урилдаанда 7,6 балл абаа. Модошо дарханай бэлигтэй Кирилл Майоров,10-дахи ангиин һурагша, хүүгэдэй шэрээ модоор дархалжа, 7,5 балл бүлэгтөө асараа. Уран гартай Гэрэлма Хуриганова командынгаа жасада эгээл олон балл оруулhан байна. Гэрэлма гэртээ арһаар юудэн малгай оёод, дэгэл урладаг арһанай зэмсэг абажа ошоһон байна. Тэндэ дэгэлээ эсхэжэ оёходоо, ехэ уран байжа, бэрхэ оёдолшон гэжэ магтуулаа, ажалайнгаа түлөө 12 балл абажа, 4-дэхи һуурида гараа. Тиигэжэ бүлэгөөрөө хамта дээрээ 68 балл абажа, Дэрээнэй дунда һургуулиин һурагшад 19-дэхи һуури эзэлээ. "Эхэ хэлэн – манай баялиг" гэһэн мүрысөөндэ бэлдэһэн багшань Бэлигма Балдыновна Цырендашиева болоно. Үшөө тиихэдэ Замбулан Заятович Бадмаев, Светлана Цыбиктуровна Аюшеева, Баярма Жамьяновна Цыденова, Светлана Баировна Бадармаева, Оксана Цыбиковна Дудеева багшанар ехэ туһа хүргэһэн байна. Энэ мүрысөөндэ ошоходомнай, аймагай засаг дарга Владислав Викторович Сультимов туһа хүргөө. Энээндэнь ехэ баяртайбди.