​"Зүрхэнэй дуунууд" зэдэлһээр

Х.Намсараевай нэрэмжэтэ Хэжэнгын дунда һургуулида аяар 1950-яад оноор «Зүрхэнэй дуунууд» гэһэн зохёохы бэлигтэнэй кружок байгуулагдаһан. Тэрэниие РСФСР-эй габьяата багша Надмит Намсараевич Намсараев хүтэлбэрилжэ эхилһэн. 1973 онһоо 1990-ээд он болотор тус кружогые Ородой Холбооной Уласай арадай гэгээрэлэй эрхимлэгшэ, «Ахалагша багша» нэрэ зэргэтэй Тунжинова Роза Ямпиловна, Надмит Намсараевичай һурагша, ажалынь үргэлжэлүүлһэн. Удаань Ородой Холбооной Уласай эрдэм һуралсалай хүндэтэ хүдэлмэрилэгшэ Сэсэг Цыреновна Молонова, тиихэдэ мүнөө үедэ Дашама Дугаровна Доржиева халан абанхай ажаллана.

Энэ студиин дали дороһоо Буряад орон дотороо мэдээжэ уран зохёолшод, эрдэмтэд, сурбалжалагшад, артистнууд гараһан байдаг. Жэшээнь: Цырен Галанов, Георгий Дашабылов, Михаил Батоин, Дансаран Доржогутабай, Цыдып Цырендоржиев, Булад Молонов, эрдэмтэд Дандар Сандитов, Бата Баяртуев, Сономбал Цыденов, Тогмит Танхаев, һургуулиин захиралаар ажалладаг Баяр Ширапов, Булад Шойнжонов гээд тоолобол, тон олон даа.

Һүүлэй үедэ энэ студида хурса хэлэтэй, хурдан гуурһатай басагад, хүбүүд баһал ябана.

Хэжэнгын 2-дугаар һургуулида кружогто ябадаг байһан үхибүүд баһал энэ «Зүрхэнэй дуунуудта» хабаатай гээд тэмдэглэлтэй. Юуб гэхэдэ, хоёр һургуули ниилэжэ, 2007 онһоо нэгэ түүхэтэй болоод ябана. Тиимэһээ эндэ 2-дохи һургуулиин шабинар тухай мүн лэ хэлэгдэхэ байна.

Бүгэдэ буряадуудай «Алтаргана» наадамда манай һурагшад Оюун-Бэлиг Доржиева (2008 он, Эрхүү хото), Баярма Борохитова (2010 он, Улаан-Баатар хото), Баяр Жигмитов, Мэдэгма Табитуева-Самбуева, Бадма Бальжинимаев (2016 он, Улаан-Үдэ) гэгшэд хабаадажа, үндэр сэгнэлтэдэ хүртэһэн байдаг.

Баярма Борохитова дунда ангинуудай шаби байхадаа, Хэжэнгын дунда һургуулида һураһан, Монголдо үнгэрһэн «Алтарганын» алтан медальда хүртөө юм. Тиихэдэ Мэдэгма Табитуева-Самбуева мүнөө жэл 3-дахи шатын дипломант болоо, ургажа ябаа бэлигтэн Бадма Бальжинимаев, мэдээжэ сурбалжалагша Баяр Жигмитов гэгшэд түгэсхэлэй шатада гараһан байна.

Тиихэдэ Цыбикова Мария (2007), Бадмацыренов Баяр (2008) Уласхоорондын зохёохы харалганда эрхим һайн сэгнэлтэнүүдые абажа, Байгал далай дээрэ үнгэргэгдэһэн Зунай зохёохы һургуулида хабаадаха эрхэдэ хүртэһэн байдаг. Тиихэдэ уран хурса хэлэтэй бэрхэ үхибүүд: Серафима Балданова-Дмитриева, Баян Дугаров, Цыржин Жигмитдоржиева, Раджана Загдажапова, Дыжид Намжилова, Гэрэлма Цыренжапова, Сэлмэг Чимитова, Янжима Намдакова, Золто Жимбэжамсуев, Жаргал Пунсыков, Санжима Доржиева, Сантып Найданов, Цырен Цырендоржиевболон бусад энэл студида түрүүшынгээ туршалгануудые хэһэн байдаг.

Мүнөө үедэ «Зүрхэнэй дуунууд» студи зохёохы ажалаа үргэнөөр ябуулна. Һурагшадай хэлэлгэ хүгжөөлгэ, эрдэм мэдэсэ үргэдхэлгэ, талаан бэлигтэй хүүгэдые элдэб харалгануудта, хуралдаан, олимпиадануудта бэлдэхэ, хабаадуулха зорилго урдаа табин ажаллана.