​Даша Намдаков «Байгалай онтохонуудые» шэмэглэнэ

Һайндэрэй амисхаал шэнгээһэн энэ ном дотор дэлхэйн эрдэни зэндэмэни болохо Байгал далай тухай мэдээнүүд дэлгэрэнгыгээр үгтэхэ юм. Байгал шадар амидардаг ан амитадтай, ургадаг ургамалнуудтай, мүн ажаһуудаг үндэһэ яһатантай танилсуулһан «Байгалай онтохонууд» номые бүхы дэлхэйдэ мэдээжэ уран зурааша, скульптор Даша Намдаков шэмэглэхэ болоо.

Даша Намдаковой бүтээлнүүд мүнөө дэлхэйн 25 гүрэнүүдтэ харуулагдана. 2000 онһоо Японой Токиоһоо эхилээд, Хитадай Бээжэндэ, Нью-Йорк хотоһоо Лос-Анджелес хүрэтэр уран бүтээлнүүдэйнь үзэсхэлэнгүүд дэлгээгдээ гэжэ мэдэнэбди. В. Путинэй, М. Шаймиевэй, Ю. Лужковой, Р. Абрамовичой болон бусад мэдээжэ хүнүүдэй хубиин коллекцинүүдтэ тэрэнэй бүтээлнүүдбии юм.

«Байгалай онтохонууд» гэһэн ном 2017 оной февраль һарада нара хараха юм. Удаань номой удхаар зүжэг табигдаха, аудио-ном бэлдэгдэхэ.

Эрхүү хотын захиргаанай дэмжэлтээр энэ хэрэг эмхидхэгдэнэ гээд тэмдэглэе.