​Номоо гаргаха гэбэл, соёлой яаманда хандажа болоно

Буряад хэлээр бэшэгдэһэн уран зохёолнуудые шэлэн абажа, ном болгожо хэблэхэ ажал эхилбэ.

Буряад хэлээр бэшэгдэһэн уран зохёолой бүтээлнүүдые ном болгожо хэблэхэ зорилготойгоор Соёлой яаман жэл бүри мүрысөө эмхидхэдэг болоһон юм. Мүрысөөндэ хабаадаха зохёолшод нэгэдүгээр һарын 16-һаа хоёрдугаар һарын 16 болотор мэдүүлгэ оруулха аргатай. Шэлэн абаха зүблэл гурбадугаар һарын 16-да дүнгыень гаргажа соносхохо юм.

Мүнгэн тэдхэмжэ хараалагдана гэбэл:

– “Уран үгын шэди” (прозо) гэһэн номинацида – 400 000 түхэриг хүрэтэр

– “Жэгүүртэ үгэ” (уран шүлэг) гэһэн номинацида – 250 000 түхэриг хүрэтэр

– “Багашуулда” (хүүгэдтэ зорюулагдаһан зохёолнууд) гэһэн номинацида – 250 000 түхэриг хүрэтэр

– “Заншалаа сахин һэргээе” (ёһо заншалнуудай, хизаар ороной болон түүхын удхатай зохёолнууд) гэһэн номинацида – 400 000 түхэриг хүрэтэр

– “Уран үгын оршуулга” (хари хэлэнүүдһээ) гэһэн номинацида – 200 000 түхэриг хүрэтэр.

Мүрысөөндэ хабаадаха һанаатай зохёолшод Буряад Уласай Соёлой яаманда мэдүүлгэ оруулха. Зохёолоо 2 хэһэгээр саарһан дээрэ гаргажа үгэхэ, зохёолой бүтээл бүхэндэ 2 шүүмжэлэл байха зэргэтэй. Тиихэдэ хэблэлэй талаар гаргашалха сметэ, зохёолшын зүбшөөл хэрэгтэй болохо.

Асуудалнуудай гарабал, Буряад Уласай Соёлой яаманда 21-77-04 гэһэн утаһаар хонходожо лаблажа болоно.