​Бууса нютаг руу бусааһан БУРЯАД-ФM радио

Элһэн губида уһагүйһөө хоолойгоо ангаад байһандал буряад арад түмэн түрэл аянгаяа һайхашаан соносоно. Бүхэли үдэртөө аялга һайхан дуунуудай, айлшадтай хөөрэлдөөнүүдэй нютаг хэлэн дээрэ дамжуулагдахадань, түрэһэн тоонто нютагаа бусаад байһан шэнги мэдэрэл радиошагнагшадай зосоо түрэнэ ёһотой. Захаамин (хонгоодор буряад), Хурамхаан, Бабанта (баргажан буряад), Ярууна, Загарай (хори буряад), Зэдэ (сэлэнгэ буряад), Түнхэн (хонгоодор буряад), Баргажан (баргажан буряад), Хэжэнгэ, Бэшүүр (хори буряад), Сэлэнгэ, Ивалга (сэлэнгэ буряад), Аха, Алайр (хонгоодор буряад), Үнгын гол, Ойхон, Хашад, Худариин дайда (эхирид буряад), Мухар-Шэбэр, Хори (хори буряад), Хяагта, Бэшүүр (сэлэнгэ буряад) нютагуудай хэлэн дээрэ дамжуулгануудые сэтгүүлшэд бэлдэһээр.

Буряад арадаймнай радио сүүдхын 24 час соо түрэл хэлэн дээрээ таһалгаряагүй дуугаржал, дуулажал байна. Саашадаа арадай радиогой эфир гуримшуулагдажа, өөрын дабташагүй нюуртай болохонь дамжаггүй.

ЭМХИДХЭЛЭЙ ТАЛА ДААҺАН ЗАХИРАЛ

Буряад ФМ-радио арадай дунда Хамбын радио гээд нэ­рэтэй юм, юундэб гэхэдэ, Бан­дида Хамба лама Дамба Аюше­евэй хүтэлбэри доро ажалаа ябуулна. Тиихэдэ радио­гой эмхидхэлэй талаар бүхы ажалые Буряадтаа мэдээжэ сурбалжалагша Жанна Дым­чикова даадаг юм. Техническэ талые найруулагша Баярма Жалцанова хүтэлбэрилнэ. Дамжуулгануудай удхын та­лаар хүдэлмэри, сурбалжа­лагшадай һуралсал буряад хэлэнэй суута багша Янжама Ивахиновагай нарин удари­далга доро ябуулагдана.

Бандида Хамба лама Дам­ба Аюшеев Буряад радио­гой хүдэлмэрилэгшэдтэй саг үргэлжэ суглаа эмхидхэжэ байдаг юм. Уулзалга бүхэн сэсэ буляалдаан шэнгеэр үнгэрдэг. Алибаа нэгэ буряад үгын удха тайлбарилхыень сугларагшадта Хамба лама даалгадаг. Һүүлшын уулзал­гада Этигэлэй Хамба ламын һургаалнуудые дамжуулгану­удта хэрэглэхыень сурбалжа­лагшадта тараагдаа. Үдэр бүри үдын хойно Буряад радиогоор “Эрдэниин шүхэр” гэжэ ниитэ гаршаг доро Этигэлэй Хамба ламын һургаалнууд сэхэ дам­жуулагдажа байдаг юм. Үглөөнэй 6 сагһаа Этигэл Хамбын зальбарал эхилнэ. Удангүй 6 хахадта Доншуур маани уншагдана. Һүниин тэн тээшэ Алтан гэрэл табигдана. Олонхи зон, илангаяа үбгэд, хүгшэд эдэ уншал­гануудые заншалта ёһоор хүлеэн аба­даг, дадаад байна. «Мүнөөдэр Доншуур маанияа шагнангүй үлэшэбэб», - гэжэ шаналһан янзатайгаар нэгэ хүгшэнэй хажуудахи хүндөө хэлэжэ байхыень дэлгүүр соо дуулаһан байнаб.

Бандида Хамба лама Дам­ба Аюшеев Буряад радио­гой хүдэлмэрилэгшэдтэй саг үргэлжэ суглаа эмхидхэдэг

ЭХЭ ХЭЛЭЕЭ ЭЖЫНЭРНАЙ ДАМЖУУЛНА

Буряад радиосубаг (радио­студи) руу орохотой сасуу хоншуухан үнэр мэдэрхээр. Тогоон соо юуншьеб бусалжа байха. Эхиндээ Буряад радио­субаг одоол энэ тогоон шэн­ги шууяжа байһан шэнгеэр үзэгдэдэг бэлэй. Айлшад, сур­балжалагшад - хуу барандаа хүлгөөтэйгөөр хүдэлхэ. Шэнэ жэл тээшэ аалидаа. Тиигэжэ бүхы ажал хэрэгнай ёһо гу­римдаа орожо байна ха.

Нютаг бүхэнэй хүн зоной абари зан эндэ элеэр харагда­на. Студиин үүдэ нээн сасуу, ямар нютагай үдэр бэ гэжэ тухайлхаар байдаг гэжэ нэгэ­тэ Янжама Цыдендамбаевна хэлээ һэн. Баргажан буряаду­уд түргэдүү, юумэнһээ айха, гайхаха гэжэ мэдэдэггүй, зүрхэтэй зон. Эрхүү буряаду­уднай ехэ эдэбхитэй. Захаами­наархин ехэ зугааша. Зэдээр­хин, сэлэнгээрхин ехэ эбтэй.

Сурбалжалагша нэгэ айл­шанаа үдэшэжэ байтараа, нүгөө айлшантаяа золго­хо. Иигээд лэ, үдэрэй ошохо ойлгогдонгүй үнгэршэнэ. Сурбалжалагшадай дунда хо­ёрхон лэ бүһэтэйшүүл, бэшэ­ниинь – эхэнэрнүүд юм. Үшөө тиихэдэ түбшэн даруу зантай, илдамханаар энеэбхилдэг, ню­дэндэ дулаанаар харагдадаг абяа буулгагша Баатар Рин­чинов, хурсахан харасатай, олон үгэгүй Булад Юмов үдэр бүриин эфир даагаад ябадаг. Шанга голтой, саб-яб гэһэн Вера Шобосоева радиогой ар­хив эрхилнэ.

Кабанск аймагай Корса­ково һууринда буряад хэ­лэнэй багшаар хүдэлөөд, наһанайнгаа амаралтада гараһан Лариса Хабусова эрхүү буряадуудай үдэр хүтэлдэг. Гурбан үдэр болоод лэ, эфиртэ гарана. Энээнэй тулада бүхы Эрхүү можоор нилээд ябаһан байна.

- Эрхүүгэй хүн зониие һайн мэдэхэгүй, диктофоноо тэбэ­реэд ябахадаа, эхиндээ хайра­тайханаар харагдадаг байгаа аабзаб. Мүнөө намай зон мэдэ­дэг боложо байна, - гэжэ Лари­са Хабусова хөөрэнэ.

Түнхэнһөө, Хяагтаһаа, Яруунаһаа сурбалжалагшад ябажа хүдэлнэ.

Хурамхаанай үдэр Эрдэм Будаин, Баргажанай үдэр Дул­гар Посходиева даагаад ябана. Ахын уладтай Туяна Дондо­кова танилсуулна. Сэлэнгын үдэр Баярма Жанцанова, Ой­хоной үдэр Мыдыгма Цыре­нова хүтэлнэ. Зэдын буряаду­удай ажабайдал тухай Сэсэг Бадмаева дуулгана. Тиихэдэ Хэжэнгын болон Бэшүүрэй хори буряадуудай үдэр Цырег­ма Гергеновада, Ивалга аймаг Лариса Абашеевада даалгаг­данхай.

Лариса Хабусова Александр Махачкеевтэй

Дулгар Посходиева

Цырегма Гергенова студиин айлшан Лариса Егороватай

Жанна Дымчикова, Буряад ФМ-радиогой захирал:

- Бүхэли сүүдхын тур­шада буряад хэлэн дээ­рээ хүдэлдэг радиотой болохо тухай арад зом­най бүри үни сагһаа хүсэдэг байһан, энэ ганса манай һанал хүсэл бэшэ. Харин саарһанай талаар зүбшөөл-лицензи аба­ха хүдэлмэри олохон жэлэй туршада гансал бидэ ябуулжа, эсэстэнь хүрэһэн байнабди. Буряад ФМ-эй хүдэлжэ захалхада, хэды олон зон баярлааб, ямар дуратайгаар шагнанаб! Эды олониие баярлуулжа, түрэл хэлэн дээрээ радио саг үргэлжэ шагнаха арга олгоһондоо бидэшье урматай хүдэлнэбди. Буряад зоной бэе бэеэ со­носохо, өөһэдөө хэлэхэ, хөөрэхэ хүсэл доторнь һууһанаа дэлбэржэ гараад, бодото дээрээ бэелүүлэгдэжэ, тон ехэ баяр асаржа, сэдьхэлэйнь тэжээл болохоһоо гадна, буряад арадай нугаршагүй хүсэ шадалые гэршэлнэ.

Ямар олон дуушад Буряадтамнай бии гээшэб, иланга­яа залуу дуушад, энэ баян архив хаана байгааб гэжэ хүн асуудаг, ехэ гайхадаг. Бидэ Соёлой яаманай мэдээсэлэй түбтэ ажаллажа байхадаа, хүгжэмэй сайт дээрэ нилээд удаан ажаллажа, дуунай жасада олон юумэ суглуулһан байнабди – тэрэ ажалай үрэ дүн. Мүнөө радиогоор бүхы зон энээниие шагнаха аргатай болоод байна. Тиихэдэ аудиозүжэгүүд дээрэ манай найруулагша, Буряад Уласай урлагай габьяата ажал ябуулагша Баярма Жалцанова, бэлигтэй абяа найруулагша Булат Юмов гэгшэд удаан хүдэлһэн байна. (Авт. - Владимир Бухаевай «Һамга абалга» гэһэн зохёолоор «Шэнэ жэлэй сэржэм» гэжэ радио-зүжэг Буряад ФМ-радиогой сурбалжалагшад Буряад театрай ар­тистнуудтай хамта наадажа, олоной һайшаалда хүртэбэ. Шог ёгто уршагта ябадалнууд «Ирония судьбы» гэжэ филь­мые һануулбашье, өөрын онсо шэнжэ­тэй. Үйлэдэгшэ нюурнууд болоһон сур­балжалагшад өөрынгөө нютаг хэлэн дээрэ ехэ зохидоор наадаһан байна.). Эдэ хоёр найруулагша эфир шэмэглэхэ, ролик, “отбивка” гэхэ мэтэ дээрэ нилээд ехэ хүдэлмэри хэнэ. Манай “отбивкануудые” үдэр болгон шагнаһаар байтараа, зон хэды олон шэнэ үгэнүүдтэй танилсанаб, жэшээнь: тэг – ноль, сэг – точко, Кабанск – Хударайн дай­да, Усть-Орда – Харгана нютаг гэхэ мэтэ.

Техникын талаар радиоинженер Виталий Мамунов ухаагаа гүйлгөө, шадалаа гаргаа – мүнөө хүдэлжэ байһан радиомнай энэ залуу хүбүүнэй ажалай дүн гэжэ тэм­дэглэе. Манай радиодамжуулгануудые хүдөөгөөрхин хүлеэшэнхэй, энэ радиогоо хүдөө нютагуудта дамжу­улха талаар хүдэлмэри Виталий мүнөө ябуулжа байна. Тон ехэ ажал урдамнай байна. Ганса мүнгэнэй асуудала­ар хизаарлагданагүй, саарһа дансын хүдэлмэри Москва хотоһоо дулдыдаха һэн тула болзорой болон баталамжын хэрэгүүдэй талаар нилээд нобшо ажал Оюна Будаева хүсэ шадалаа гарган ябуулна.

Нютаг нютагаараа манай радиосубагта айлшаар бу­угаад, гэртээ харяад, мүнөө дээрээ нютагтаа соносохо аргагүй байна. Улаан-Үдэдэ болоод хажуудахи нютагу­удта манай долгин хүрэнэ. Харин Интернедээр манай радио ганса хүдөөдэшье бэшэ, хари гүрэнүүдтэ шагнаха аргатай болонхой гэжэ дуулгая. Хүндэтэ нютагаархин, үдэр һүнигүй компьютерта һуудаг үхибүүдтээ, аша зэ­энэртээ иимэ хаягтай сайт шагнахам гэжэ хэлээрэйгты www:buryad.fm. Ганса хүүгэд бэшэ, таанаршье Интерне­дэй хүсэ ашаглажа, буряад радиогоо шагнаха аргатайт гэжэ дуулганабди.

Радиогоор дамжуулагдадаг хөөрэлдөөнүүдээ яага­ад һонин болгохоб гэһэн асуудал дээрэ сэтгүүлшэдтэеэ хүдэлнэбди, таанаршье һанамжануудаараа хубаалдаха аргатайт. Ерээдүйдэ хэдэн шэнэ шэглэлэй дамжуулгану­уд бии болохоор хараалагдана. Сэтгүүлшэдэй урда манай нэн түрүүн табидаг эрилтэ хадаа нютаг тухайгаа нюта­гайнгаа хэлэн дээрэ нютагаархинтаяа хөөрэлдэжэ шада­ха хүн манай радиодо хүдэлхэ ёhотой. Радиошагнагшадай тэмдэглэһээр, эдэ сэтгүүлшэдэй дамжуулганууд олоной һонирхол татана. Нэрлэбэл, Баргажанай Дулгар Посхо­диева, Түнхэнэй Светлана Базарова, Сэлэнгын Баярма Жанцанова гэгшэд. Тусгаар оролдолго гарган хүдэлжэ байһан Эрхүүгэй Лариса Хабусова, Хурамхаанай Эрдэм Будаин гэгшэдые тэмдэглэмээр. Уран шэмэглэлтэй дам­жуулгануудые Хэжэнгын Цырегма Гыргенова, Зэдын Сэ­сэг Бадмаева гэгшэд бэлдэнэ . Түсэл нэбтэрүүлжэ, зоной һонирхол татаһан Мухар-Шэбэрэй Сарюуна Эрдынеева, Лариса Абашеева гэгшэдые нэрлэе.

Жанна Дымчикова «Информ-По­лис» хэблэлэй байшанай захирал Соёлма Дагаеватай

Мэдэгма Цыренова, Ойхоной үдэр хүтэлдэг сурбалжалагша:

- Радиодо хүдэлжэ эхилхэдээ, олон һайхан нүхэдтэй болооб. Хуу бултадаа зугаатай, баян хэлэтэй, бэрхэ, шуран шадамар юм. Нютаг бүхэнэй хүн ондо ондоо - абари зангынь нютагайнгаа байгаали­да адли байна. Хэжэнгын басаган даруу, номгон, харин Ахын баса­ган хада хабсагайдаа адли хурса, түргэн гэжэ хэлэхэдэ болохо бшуу.

Би эхилхэдээ, түрэһэн Хурамхаан нютагай үдэр бэлдэжэ эхилээб. Ямар олон зонтой танилсаа гээшэбиб! Нэгэ нютагай байгаад, хүнүүдые мэдэхэгүй байха гэжэ ямар эшхэбтэр гээшэб.

Хожомынь Ойхоной үдэр даажа абаад, нютагай ёһо заншал, түүхэ мэдэжэ эхилээб. Эрхүүгэй зон­той манай хэлэн адлирхуу байна.

НЮТАГ БҮХЭНЭЙ АЯЛГАН БАЯН

Түрэлхи хэлэтэйшье һаа, сэтгүүлшэнэй ажалда ямаршье дүршэлгүй мүнөөдэрэй радиосурбал­жалагшадта туһаламжа үзүүлдэг буряад хэлэнэй түрүү багша Янжама Цыдендамбаевна Ивахинова­тай хөөрэлдөө дурадхахамнай.

- Нэгэл хэлэтэй зон аад, бэе бэеынгээ хэлэһые ойлгоногүйбди, манай тэн­дэ иигээд хэлэдэггүй, ямар таагүй үгэб гэхэ мэтээр нютаг нютагайнгаа хэлэ­нэй аянга анхарха хүсэлгүй дээрэhээ зугаалха дуратай­шуулай урма хухалдаг зан­тай болонхойбди. Энээнһээ боложо, ган­сал нютагтаа өөрынгөө диалект дээрэ хөөрэлдөөд, ондоо тээ ябахадаа, ородоор хөөрэлдэдэг болошонобди. Тиимэһээ радиогой мүнөө үеын зорилго – хүнэй шэхэндэ нютаг хэлэнүүдэй үгүүлбэри дадхааха, танил болгохо, хүдөө һууринай ажалша малша хүнүүдтэй дүтөөр танилсуулха, нютаг нютагай түүхэ, домогуудые хөөрэжэ һонирхуулха. Танай hанахада, эдэ зорилгонууд хэр бэелүүлэгдэжэ байнаб?

- Энэ асуудалда харюу­сахадаа, нэн түрүүн буряад хэлэн дээрэ таhалгаряагүй дамжуулгануудые хэжэ бай­даг радиоканал бии болохо­доо, арад зоной аргагүй ехээр һонирхол татаа гэжэ тэм­дэглэхэ шухала. Түрүүшын эфирһээ эхилжэ, радиодо хүн зон таһалдаагүй... Үдэр бүри ерэжэ, һониноо дуул­гадаг, сэнтэй бодолоороо хубаалдаха дуратайшуулай тоо олон боложол байна. “Өөрынгөө нютаг хэлэнэй аянгаар дуран соогоо, са­гай хизаарлалтагүйгөөр һанаһанаа хэлэхэ аргатай болоhондоо баяртайбди”, – гэжэ радиосоносогшод хэлэ­нэ. «Үшөө нэгэ баяр гэхэдэ, бидэ нютаг бүхэнэй хэлэнэй аянга мэдэдэг боложо бай­набди, урдань ойлгодоггүй аад, мүнөө шагна шагнаһаар, манай нютагай хэлэнһээ он­доошье гэжэ һананагүйб”, – гэһэншье бэшэгүүд бии. «Хэзээ үни үнгэрһэн сагы­ем тэхэрюулһэн хөөрөөнүүд сэдьхэлыем ехэ хүлгөөбэ. Хаана - яанаһаа сугларһан хүбүүд, басагад нютаг хэлэн дээрээ хэлэхэ дуратайшье һаа, ойлгогдонгүй үлэнэ аа гүб гээд, ородоор хэлэхые оролдогшо һэмди. Мүнөө нютаг хэлэнүүд дээрэ дам­жуулгануудые шагнажа бай­хадаа, иигээд хөөрэлдэхөө яаһан байгаа гээшэбибди”, – гэжэ халаглаһаншье ушар­нууд дайралдана. Радио шагнадаг болоһон элдэб нютагаархидай бэшэгүүдые уярангүй уншахын аргагүй байна. Хаана холуур тараһан угсаатанаймнай эхэ хэлэ­нэйнгээ аянга дуулахадаа, хэды ехээр эльгэлһыень ойл­гохоор лэ даа. Тиимэһээ ФМ- радио урдаа табиһан зорил­гоёо дүүргэжэ эхилээ гэхээр. Табан һарын туршада радио хүдэлжэ байхадаа, өөрын шагнагшадтай боложо бай­на. Эфир гуримшуулагда­жа, дамжуулгын сэдэбүүд үргэдхэгдэжэ, тусхай дам­жуулганууд оруулагдажа байна гэжэ радиошагнаг­шад обёорно ёһотой. Зарим бэшэгүүд, дурадхалнууд соо: “Юундэ нютаг хэлэн дээрэ дамжуулгануудые хэнэбта? Иимэ хубаарил маанадые илгаһан, эб таһалһанай тэм­дэг болоногүй гү?» - гэһэн асуудалнууд дайралдана. Сэхыень хэлэхэдэ, буряад хэлэеэ үргэхэ, хүгжөөхэ ту­хай хэдэн арбаад жэлнүүдэй туршада хэлсэнэбди, зүгөөр эрид үсэдөөр хэһэн хэрэгүүд үсөөншэг лэ даа гэжэ hанагдана. Һүүлэй хэдэн жэл­дэ Сангхын дурадхаһан хэмжээнүүд лэ хүн зониие хүлгөөбэ, хүдэлгэбэ гү гэжэ харахаар байна. Нютаг хэлэ­еэ хүгжөөхэдөө, бултанайн­гаал үндэһэн хэлэ хүгжөөнэ гээшэ бэзэбди. Баргажанай, Түнхэнэй хэлэн гэжэ үгы, харин үгүүлэлэй талаар бага илгаа дайралдана. Ню­таг нютагай хэлэнэй аянга, үгүүлбэридэ дадал боло­ходоо, түрэл хэлэнэйнгээ нөөсэ баяжуулнабди. Нютаг хэлэнэй үгүүлбэри даган бэшэхэ һэдэлгэ гаргахагүй гэжэ оролдохоор гэжэ һананаб. Ушар юуб гэхэдэ, “Буряад бэшэгэй дүримдэ” оруулагдаагүй бэшэлгэнүүд дайралдажа болохо. Сааша­даа ябан ошон, бэшэгэй за­рим зүйлнүүд хубилгагдажа, бэшэгэй дүримдэ нэмэлтэ оруулагдажашье магадгүй.

Һүүлэй үедэ улас до­тор буряад хэлэнэй талаар асуудалда саг үргэлжэ хан­дадаг боложо байна гэжэ анхархаар, тиигээдшье за­луушуулнайшье һанаагаа табидаг болонхой. Энэм­най илангаяа маанадые, наһатайшуулые, зоригжу­улна. Ямаршье ажал эхил­хэдэ хүндэ, ФМ-радиогой хүтэлбэрилэгшэдэй урда шиидхэхэдэ хүндэ асуудал­нууд биил юм бэзэ. Ми­нии адаглан харахада, эндэ һүбэлгэн ухаатай, урагшаа һанаатай, зохёохы абьяа­стай зон хүдэлнэ, тиимэһээ хүсэһэн, һанаһаниинь дүүрэн бэелүүлэгдэжэ байха гэжэ найдахаар.

- Буряад зоной олоороо сугларһан газарта нютаг нугынгаа хэлэ, зан аба­ри дууряалсажа байжа хэлэһэн, бэе бэеэ шоглоһон хүхюун зугаа гарадаг гээ­шэ. ФМ-радио өөрын сог­солборитой болохоор гү?

- Илангаяа Сагаалхын ехэ һайндэрэй үедэ түхэреэн Буряадайнгаа угсаатанай үгэ хүүр, аяг зан дууряаһан хүхюун зугаа шагнажа һурамхи болонхойбди. Эдэл хүхюун зугаануудай туһаар олон зомнай буряад хэлэ­нэй диалектнэ илгаанууд­тай танилсаһан байха. ФМ - радиодо ерэһэн хүн бүхэн өөрынгөө нютаг хэлэн дээрэ хөөрөө дэлгэхэдээ, ехэл бэ­лэдхэл гаранхай ерэнэд гэжэ ажаглахаар байдаг. Бүхы һанал бодолоо нютаг хэлэн дээрээ хэдэн зуугаад зондо сэхэ утаһаар дамжуулжа бай­ха гээшэ бэлэн хэрэг бэшэ. Тиимэһээ эфирэй урда элдэб хүхихөөршье, халаглахаар­шье ушарнууд болонгүй яа­хаб. Шухалань гэхэдэ, түрэл хэлэнэйнгээ тодо нугархайе, онсо үгүүлбэритэйе харуул­хаяа булта оролдодогынь һайшаалтай. Хүхюун зугаа боломоор ушарнууд радио­домнай боложол байдаг. Шэнэ ёһоной ажал эхилжэ байхада, али олон туршалга­нууд, һэдэлгэнүүд хэгдэнэ, тэ­дэнь булта һаадгүй һайнаар үнгэрдэггүй, зариманиинь хүхюун зугаагаар хизаарлаг­дашаха ушарнуудшье дай­ралдаха. Тиигэһээр байта­раа, “ФМ-радиогой шог ёгто долгин дээрэ” гэһэн дамжу­улга бии боложо, нютаг ну­гын хошонгууша зоной зуга­ануудтай танилсуулга хэдэг болохо бэзэ. Иимэ хошон зу­гаагай түхэлтэй хөөрөөнүүд буряад хэлэнэймнай баяли­гые харуулна, зоной хоорон­дохи эб бэхижүүлнэ ха юм.

Эрхүү буряадуудай хэ­лэндээ ород үгэнүүдые ехэ­эр оруулхыень соносоод, түүхын тээрмэдэ яһалхан ”һагшагдаһанайнь” дүн гээд хайрлахаш. Баргажан, сэлэнгэ буряадууд олоной урда үгэ хэлэхэеэ зүрхэлжэ ядан, олондо ойлгогдонгүй үлэшэнэ гүб гэжэ мүн лэ һанаагаа зободог... Мүнөө үедэ буряад хэлэ­нэй байдалда тохёолдоһон бэрхэшээлнүүд тухай бул­тадаал хэлсэжэ шиидхэхэ болонобди. Нэн түрүүн эхэ хэлэндээ эльгэ нимгэтэйгэ­эр, нютаг нугануудайнгаа хэ­лэнэй аянгада хүндэтэйгөөр хандабал, ниитэ хэлэеэ бул­тадаа үргэн хүгжөөхэмнай дамжаггүй.

Буряад ФМ-радиогой сурбалжалагшадай дунда Янжима Ивахинова

Ажалай үедэ

Буряад ФМ-радиогой айлшад - Аха нютагаархин

Буряад ФМ-радиодо айлшад таһалдадаггүй

Баатар Ринчиновэй, Зоригто Дагбаевай гэрэл зурагууд