​"Амаралтын үдэшэ" арад зондоо бэлэглээ

Январиин 28-да Бу­ряадай дуу, хатарай үндэһэн “Байгал” театр “Амаралтын үдэшэ” гэһэн гаршаг доро театрай байгуулагдаһаар 75 жэлэй ойдо зорюулагдаһан тоглолто харуулба.

Театрта олон жэлдэ хүдэлһэн ажалай ветеранууд Василиса Тумурова, Евдокия Сельверова, Буда-Ханда Да­шиева, Жамсаран Дандаров, Светлана Халбаева, Сергей Аюшеев, Дарима Дугданова, Батор Санданов, Хажидма Аюржанаева, Леонид Баба­лаев болон бусад “Байгал” театрта хүдэлһэн тухайгаа, тэдээнтэй болоһон энеэ­дэтэй, зугаатай ушарнууд тухай хөөрэбэ. Арад зон ал­дарта дуушадаа, хатаршадаа мартаагүй, нэрьемэ альга ташалгаар угтажа, хүндэлэн ёһолжо байгаа һэн. Ветера­нуудай анхан гүйсэдхэһэн хатарнуудые, дуунуудые “Байгал” театрта мүнөө үедэ хүдэлжэ байһан артистнууд харуулба. “Будамшуу” гэжэ шог зугаатай найруулга ха­рагшад хүхюутэйгээр энеэл­дэн хараба.

Наһатай болобошье, сог залияа алдаагүй ветеранууд суг хүдэлһэн нүхэд тухай­гаа, “Байгал” театрай түүхэ тухай, СССР гүрэнэй байхада Калининградһаа Владиво­сток хүрэтэр, Кавказһаа Яхад орон хүрэтэр, хүйтэн Хойто-Мүльһэтэ далайһаа Дунда Азиин элһэн губи хүрэтэр буряад арадайнгаа дуу, хатар харуулжа, өөрынгөө үндэһэн урлагаа суурхуулжа, абья­ас бэлигээ дэлгээжэ ябаһан тухайгаа хөөрэхэдэнь, тан­химаар дүүрэн һууһан улад зон нэрьемэ альга ташалга­ар угтажа, “Байгал” театртаа дуратайгаа мэдүүлжэ, залуу артистнуудые дэмжэжэ бай­гаа һэн.

"Амаралтын үдэшэ" гэһэн концертдэ Буряадай дуу, ха­тарай "Байгал" театрай гол дуушан Бүтидэй Дондог-Сэрэн "Сэгээ дуунай" аялга таталуулба. Буряад арадай дуунай аялга, аянгын нугал­бари, баруун буряадуудай дуулаха арга маяг дууряажа шадаа гэжэ хэлэхэ байнаб. Са­ашадаа дуулаһаар байтараа, үшөө мүлигдэхэ юм ааб даа. “Байгал” театрайхинай урда­найнгаа дуунуудые һэргээжэ байхадань, шэнэ һонин юумэ һанажа, мүнөө сагай эршэ хүсэн доро зохёохы ажалаа ябуулжа байхадань баясама­ар байна.

Жаргал Тогтоновой ударидалга доро буряад хүгжэмэй оркестр уран гоёор хүгжэмөө зэдэлүүлбэ.

Эсэгэ ороноо хамгаал­гын Агууехэ дайнай бо­ложо байхада, 1942 ондо байгуулагдаһан “Байгал” те­атр буряад арадаа, буряад урлагаа бүхы дэлхэй дүүрэн суурхуулжа байдаг.

Аяар 75-тай боложо байһан “Байгал” театрнай өөрын гоё гэгшын ордонтой болоо һаань, ямараар баяр­лаха байгаабибди!

Арад зоной эгээл дуратай "Байгал" театрнай арадай аялга дуунай алтан абдар нэ­эжэ, субад эрдэни, зэндэмэ­нитэй сасуулмаар дуунуудые, хатарнуудые сасан хубаалда­жа байхадань, ямар гайхам­шаг гоё гээшэб!