​Бэлигтэй басаган Людмила Ангахаева

Сагаан һарын үдэрнүүдтэ Түнхэн ай­магай Аршаанай дунда һургуулиин байшанай досоохи хана аргагүй гоёор зураатай 12 жэлнүүдэй дүрэнүүд шэмэглэхэ. Энэ ажал һурагшадай хүсөөр бүтээгдэбэ. Гал улаан Тахяа жэлэй дүрые 11-дэхи “б” ангиин һурагша Людми­ла Ангахаева зохидхоно­ор зураа.

Уран зурагай багша Юлия Гавриловна Балда­новагай хэлэһээр, хэдэн һурагшад ухаан бодо­лоо гүйлгэжэ, 12 жэлэй дүрэнүүдые зурана. Жэ­шээлбэл, Людмилын бүтээһэн тахяа хүнгэн бэетэй, залуу хүбүүнэй нюур шарайтай юм. Бэлигтэй энэ басаган үшөө Могой жэлые залуу басаганай дүрэтэй адлишааһан бай­на. Өөрөө Людмила луу жэл зураха түсэбтэй, ха­рин тэрэнь һайнаар боло­жо үгэнэгүй.

- Буряад ёһо занша­лаа һэргээжэ, хирэ-хирэ болоод лэ һургуулидаа һонин ажал хэхэ дура­тайбди, - гэжэ Людмила Ангахаева хэлэнэ. Тии­гэжэ Людмила басаган Яна Лыгденова нүхэртэеэ панно дээрэ оёгдоһон хүүхэлдэйнүүдые бүтээгөө.

- Эдэ ажалнуудаа, “Ху­ушан һара”, “Шэнэ һара”, “Буурал Байгал далай” гэхэ мэтэ хүүхэлдэйнүүдые, оройдоол 10 хоног соо өөһэдөөшье мэдэнгүй бүтээгөөбди, - гэжэ Люд­мила Ангахаева хөөрэнэ. – Хүүхэлдэйнүүдэйнгээ хубсаhа элдэб үнгын торгоор оёобди. Толгой, гарнуудыень дабһатай элдэһэн талхаар хэжэ хатаагаад, һүүлдэнь тэ­рээн дээрээ нюур шарай зураабди. Энэ дүрэеэ саарһан дээрэ няажа, элдэб буряад угалзаар шэмэглээбди. Зарим ушарта угалзануудые өөһэдөөшье һанажа зураабди. Манай ажал хараһан хүн зон энээниие ойлгохо бэзэ. Олон үнгэнүүдые тааруулха гээшэ хүнгэн хэрэг бэшэ байна. Янатаяа энэ тэрэ угалзануудые хаана табихаб гэжэ арсалдаад­шье абаабди. Бүтээлэй композици гээшэ хүндэ. Людмила Ангахаева бага балшар наһанһаа хойшо уран гартай байһанаа гэр­шэлжэ эхилээ. Нэн түрүүн пластилинаар элдэб гоё дүрэнүүдые хэдэг байгаа.

- Багадаа пластили­наар юумэ хэхэдээ, га­райнгаа хургануудай уян хүдэлсэ (моторико) һайн болгооб гэжэ һанадагби. Тэрэ үедэ минии нагаса Галина Бадмаевна Ошо­рова намтай хүдэлдэг бэлэй. Удаань зуража эхи­лээб. 5-7-дохи классууд­та һурахадамни, Елена Викторовна Сажина уран зурагай нюусануудтай танилсуулаа. Мүнөө үедэ Юлия Гавриловна Балда­новагай ударидалга доро хүдэлнэбди, - гэжэ Люд­мила Ангахаева хөөрөөгөө үргэлжэлүүлнэ.

Зурахаһаа гад­на Людмила дабһатай элдэһэн талхаар элдэб дүрсэнүүдые, оригами хэхэ, бисер хэрэглэн оёхо дуратай юм. Бэлигтэй басаганай уг гарбал хоёр талаһаа бултадаа уран гартай, зураха дуратай аха дүүнэр олон юм. Жэшээл­бэл, эжынь баһа гоёор зу­радаг. Ангахаевтанай уг гарбалые үргэлжэлүүлхэ бэлиг талаан ехэтэй үшөө басаган, хүбүүн ургажа ябанад. Тэдэ мүнөө Люд­мила эгэшэhээ дүй дүршэл халан абана. Людмила энэ жэлдэ һургуулияа дүүргээд, Эрхүү хото ошо­жо, дизайнер мэргэжэлээр hураха зорилготой.

Авторай гэрэл зурагууд

Людмила Ангахаевагай бүтээлнүүд