​Угалза зурагай уран юртэмсэ

Обогыем дуулахатаяа са­суу Даша-Нима Дугаро­вай хэн болохобши гэжэ олон зон асуудаг. Буряадаймнай мэдээжэ уран зурааша намда түрэл бэшэ. Зүгөөр багшам­ни гээд омог дорюунаар харюуса­дагби, – гэжэ Сэсэг Дугарова хэлэ­нэ.

Багшын мартагдашагүй онсо маяг олон тоото шабинарайнь зурагууд­та заримашуул анхаржашье болоо. Бүгэдэ буряадуудай үндэһэн соёлой эблэлэй дэргэдэ һургуули нээгээд, Даша-Нима Дугаров урданай буряад зураг һэргээжэ эхилһэн гээшэ. Эгээл тэрэ үеэр Сэсэг дайралдажа, тэрэ­нэй сэнтэй зүбшөөл заабаринуудта хүртэһэн юм.

Хожомынь Николай Дудко Сэ­сэгтэ буддын шажанай танка зураг гээшые ойлгуулжа, бэлиг шадаба­рияа улам мүлихэдэнь бүримүһэн нүлөөлөө.

Сэсэг Дугарова танка зурагай нюусануудые шудалһанай удаа бу­ряад зураг бүтээжэ эхилээ. Буряад зураг танкаһаа эхитэй гээд мэдээ­жэ. Гэбэшье үндэһэн буряад зураг­та гол түлэб буряадуудай ажабай­дал зураглагдана. Буряад зураг хараха бүридөө нэгэ шэнэ юумэ нээхээр байдаг бшуу. Алибаа геройн гү, али бурханай зурагай ашаар танка буддын шажанай гүн ухаа ойлгуул­на гэжэ Сэсэг Дугарова тэмдэглэнэ. Танкада оруулагдаһан угалза бүхэн өөрын далда удхатай.

Сэсэг Максимовна Дугарова 1977 ондо Хори аймагай Тээгдэ нютагта түрэһэн. Зүүн Сибириин технологическа институдта һурахаһаа гадуур Бүгэдэ буряадуудай үндэһэн соёлой эблэлэй дэргэдэ байгуулагдаһан уран зурагай һургуулида һураа. Удаань Николай Дудкогой хүтэлбэри доро һуралсал гараа. 2007 ондо хари хэлэнүүдэй факультет түгэсхөө. Англи болон немец хэлэнүүд дээрэ тордиһогүй хөөрэлдэдэг.

1998 онһоо тэрэ танка зураг бүтээжэ эхилээ. Ц. Сампиловай нэрэмжэтэ уран һайханай музейдэ, мүн 2007 ондо Буряадай түүхын музейдэ Сэсэг Дугаровагай хүдэлмэринүүдэй үзэсхэлэн дэлгээгдэһэн юм.