991
«Отдых в России» гэһэн сэтгүүл 2016 оной дүнгүүдые согсолбо. Тэрэ дүнгүүдээр Буряад Уласай Забайкалиин арадуудай Этнографическа музей «Уникальный тур-ресурс» гэһэн зэргэдэ түрүүлбэ гэжэ Буряад Уласай Соёлой яаман мэдээсэнэ.
Аяншалгын онсо газарнуудые элирүүлхэ зорилготойгоор энэ мүрысөөн үнгэргэгдөө. Буряад Уласай музей Забайкалиин арадуудай ёһо заншал, соёл хүгжөөлгэдэ туhатай, шэнэ үүсхэлтэй программануудые зохёоһонойнгоо түлөө үндэр амжалта туйлаба.
Һонирхолтойнь гэхэдэ, энэ хэмжээ ябуулгые жюриин гэшүүд сэгнээ бэшэ. Харин аяншалагшад, үзэсхэлэнгүүдые нюдөөрөө хараһан хүнүүд сэгнэһэн юм гэжэ сэтгүүлэй редакци тэмдэглэнэ.
Эрхимүүдэй тоодо «Кижи» гэһэн Карелиин суута музей – хyреэлэн оролсоһон байна.
Забаайкалиин арадуудай этнографическа музей – Ород гүрэнэй хүхэ мүнхэ тэнгэри доро оршодог эгээл томо музейнүүдэй нэгэ юм. Энэ музей 37 гектар газар эзэлдэг. 40-өөд гаран архитектурын памятнигууд, 11000-һаа дээшэ экспонадууд Этнографическа музейдэ бии гэжэ һануулнабди.
Буряад Уласай Соёлой яаманай хэблэлэй албанһаа гэрэл зураг абтаба.
