928
Буряад драмын театрай тайзан дээрэ Литвагай найруулагша Тадас Монтримас шэнэ зүжэг табихань.
Буряад драмын театр Ярослава Пулиновичай “Земля Эльзы” гэһэн зүжэг июнь һарада харуулхаар бэлэдхэл эхилбэ. Энэ спектакль табилгада Литвагай найруулагша Тадас Монтримас уригданхай . Энээнһээ урид Н. Бестужевай нэрэмжэтэ ород драмын театрта тэрэ шэнэ найруулгануудые табиһан байна.
“Земля Эльзы” гэһэн зүжэгтэ наһатай болоһон хойноо уулзаһан хоёр наһатайшуул бэе бэедээ дурлажа, бэе бэеэ ойлголсожо, жаргалаа олоно. Дайнай һүүлээрхи хүндэ жэлнүүдые гаталһан, гэр бүлын жаргал дүүрэн мэдэрээгүй, томо болоһон үхибүүдтэй үбгэн хүгшэн хоёрой мүнөөшье жаргал эдлэжэ һуухань хэсүү. Юундэб гэхэдэ, тэдэнэрэй үри хүүгэд ганса өөһэдынгөө тала хаража, аба эжыгээ ойлгохо шадалгүй байшаба. Ашанар, зээнэрэйньшье хатуу хэрзэгы зан абари хари хүнүүдэй сэдьхэл хүдэлгэжэ байхадань шаналхаар.
Энэ пьесэ хүн зоной эрхэ сүлөөгэй түлөө манифест болоно гэжэ Тадас Монтримас хэлэнэ.
- Хүн бүхэн өөрынгөө ажабайдал зохёохо аргатай. Теэд өөрынгөө һанал бодол бэелүүлхэ болоходоо, олоной һанамжа шагнаха баатай болодог. Энэ пьесэ соо хэндэшье һаалта хэхэгүй үндэр наһатай хоёрой ушараад, хуби заяагаа ниилүүлхэ гэхэдэнь, тиимэшье бэлэн хэрэг бэшэ байшаба. Артистнуудтай уулзаадүй байхадаа, яагаад энэ спектакль табихаб гэжэ ойлгоод байгааб. Харин мүнөө түрүүшын уншалгануудай һүүлээр минии хараа бодол эндэ оройдоо тааранагүй. Мүнөө би артистнуудай һанамжануудые шагнажа, тэдэниие хараадаа абан, бэлэдхэлээ ябуулнабди, - гэжэ найруулагша хэлэнэ.
Энэ зүжэгтэ һонирхолтой декораци хэрэглэгдэхэ юм. Буряад хэлэн дээрэ табигдаха зүжэг Дабацу Юндунова оршуулаа.
“Земля Эльзы”гэһэн зүжэг табилгада Санкт-Петербургын хүгжэм найруулагша Анджей Петрас уригданхай. “Прикосновение ветра” гэжэ киногой продюсер болон хүгжэм найруулһан гэжэ тэрэ Буряад Уласта мэдээжэ. А. Петрасай хүгжэмөөр найруулагдаһан фильмнүүд Монреаль, Лондон, Шанхай болон бусад хотонуудай кинофестивальнуудта харуулагдаһан юм.
РСФСР-эй арадай артистнууд Михаил Елбонов, Лариса Егорова, Людмила Дугарова, Марта Зориктуева, габьяата артистнууд Дарима Сангажапова, Должин Тангатова, Буряад Уласай габьяата артистнууд Баста Цыденов, Дарима Лубсанова, Надежда Мунконова, Болот, Жаажан Динганорбоевтон, Бэликто Дамбаев, артистнууд Людмила Тугутова, Ада Ошорова гэгшэд энэ зүжэгтэ хабаадаха юм.
Росиин арадай артистка Лариса Егоровагай зохёохы ажалай 50 жэлэй баярта “Земля Эльзы” гэһэн зүжэг зорюулагдана.
