​Байгаалиин музей ажалаа үргэлжэлүүлхэ гү?

Буряад Уласай Байгаалиин музейн байшан заһабарилагдаха юм.

Буряад Уласай Толгойлогшын уялга саг зуура дүүргэгшэ Алексей Цыденов Соёлой яаманда богони болзорой туршада Байгаалиин музейн заһабарилга тухай шиидхэбэринүүдые абаха гэһэн даабари үгэбэ.

Мүнөө дээрээ энэ музей хаана ажалаа ябуулхаб гэһэн шиидхэбэри үгы. Буряад Уласай Засагай газарта Соёлой яаман 2017 оной июнь болотор энээн тухай дурадхалнуудые оруулха юм.

2017 оной мартын 24-дэ Байгаалиин музей хүдэлхэеэ болёо гэжэ һануулнабди. Инженернүүдэй үнгэргэһэн шалгалтын удаа, энэ байшанай дотор байха аюултай гэжэ элирүүлэгдээ .

Буряад Уласай Засагай газар түрүүлэн хэгдэхэ заһабарилгын ажалда, түсэлэй дансануудые бэлэдхэлдэ болон тэрэнэй түүхын- соёлой шэнжэлэл хэхэ хэрэгтэ 606 мянган түхэриг мүнгэ һомолһон байна. Заһабарилгын ажалнууд байгша оной 3-дахи кварталда түгэсэхэ юм.

Тиигэбэшье музей ажалаа үргэлжэлүүлхэ. Дээдэ, дунда мэргэжэлэй һургуулинууд, хүүгэдэй сэсэрлигүүдтэ Байгаалиин музей үзэсхэлэн дэлгэжэ, хүүгэдтэ харуулха. Музейн суглуулбари бүрин бүтэн зандаа хадагалагдажа, ажалшад жасын ажал үргэлжэлүүлһээр байха.

Байгаалиин музейн сайтһаа гэрэл зураг абтаба.