1241
Апрелиин 4-дэ Ц. С. Сампиловай нэрэмжэтэ Уран һайханай музейдэ “Многообразие бесценно” гэһэн гэрэл зурагуудай үзэсхэлэн дэлгээгдэбэ. “Һаадгүй оршонтой ниигэм” гэһэн тэргээр ябадаг эрэмдэг зоной жаса энэ хэмжээ ябуулга эмхидхэбэ.
Ородой Холбоото Уласай Олониитын танхимай түрүүлэгшэ Баир Бальжиров, Буряад Уласта хүнэй эрхэ хамгаалха бүрин эрхэтэ түлөөлэгшэ Юлия Жамбалова гэгшэд амаршалгын үгэнүүдые хэлэбэ. Тэдэнэр энэ түсэлэй ниигэмэй удха шанартай байһые тэмдэглэбэ.
“Һаадгүй оршонтой ниигэм” гэһэн тэргээр ябадаг эрэмдэг зоной жасын түрүүлэгшэ Галина Горбатых сугларагшадые амаршалжа, баярай бэшэгүүдые барюулһан байна.
- Энэ түсэл маанадта ехэ удха шанартай, юундэб гэхэдэ эрэмдэг бэетэй хүнүүдые эдэбхигүй гэжэ хүн зон ехэнхидээ һанадаг. Харин бидэ бэрхэшээлнүүдые дабажа, олон юумэ мэдэхэ,хараха гэжэ оролдодогбди. Хүн бүхэнэй эдэбхи үүсхэл өөрһөөнь дулдыдадаг,- гэжэ Галина Горбатых хэлэбэ.
Олондо мэдээсэл тараадаг хэрэгсэлнүүдэй ашаар энэ үзэсхэлэн тухай уласһаа гадуур мэдээжэ болоһон байна гэжэ “Ломающие стереотипы” гэһэн шэглэлэй эмхидхэгшэ Юлия Крюкова хэлэбэ. Удаан саг соо энэ үзэсхэлэн Улаан-Үдын аэропортдо дэлгээгдэһэн байгаа. “Гэрэл зураг буулгаха үедэ бидэ хуу танилсаабди, нүхэсөөбди. Анхан гэрһээ гараха дурагүй хүнүүднай газаа дуратайгаар гарадаг болоо,” – гэжэ тэрэ хөөрэбэ.
- Энэ түсэлэй гол зорилго хадаа үхибүүнэй һанаа бодол, сэдьхэлэй досоохи байдал дамжуулха - гэжэ “В особенном ритме” гэһэн шэглэлэй эмхидхэгшэ, клевер-инклюзив хатарай һалбариин багша Анна Батранина хэлэбэ.
Лудуб Очиров сэдьхэл хүдэлгэмэ үгэнүүдые хэлэжэ, дуу гүйсэдхэһэн байна. Харагшадай зүрхэ сэдьхэл энэ үзэсхэлэн хүдэлгэхэл байха гэжэ ойлгохоор. Гэрэл зурагуудаа буулгаһан хүнүүд нюуса һанал бодолоороо хубаалдажа, олон шэнэ юумэ мэдэхэ, хараха гэжэ эрмэлзэжэ, аяншалха, оршон тойронхи байдалай дутуу дундануудтай тэмсэхэ гэжэ үдэрһөө үдэртэ оролдоно ха юм.
Уран һайханай музейн гэрэл зурагууд.
