​Шэнэ галерей нээгдэбэ

Һаяхан Улаан-Үдэ хотодо уран һайханай шэнэ галерей нээгдэжэ, түрүүшынгээ айл­шадые угтаба. Олзын хэрэг эрхилэгшэ Лев Бардамов хэдэн жэлэй хугасаада хоморой шухаг зүйлнүүдые суглуулжа, зургаан танхимһаа бүридэһэн энэ шэнэ галерей нээһэн байна. Нэ­элгын баярта айлшад тусхай урилгаар ерэжэ, үзэмжэтэй танилсаба. Мүнөө дээрээ эндэ эмхид­хэлэй ажалнууд үргэлжэлһөөр. Тиимэһээ нэгэ хэды сагай үнгэрһэн хойно олон харагшадта музей үүдэеэ нээхэ юм.

Галерейдэ дэлгээгдэһэн экспонадууд урданай Верхнеудинскын, хүпеэсүүдэй, бөө мүргэлэй, буддын шажанай, ородой шажанай сэдэбүүдтэ, түүхэдэ хабаа­тай. Мүн баһа ХХ дугаар зуун жэлэй мэдээжэ уран зу­раашад Александр Тимин, Солбон Ринчинов, Эрхито Аюшеев, Лубсан Доржиев гэгшэдэй бүтээлнүүд эндэ табигданхай.

Буряад Уласта иимэрхүү, хубиин һонин үзэмжэнүүд бии гэжэ мэдээжэ. Тарбагатай һууринда угсаата зүйн музей, “Орда” гэһэн этногалерей, Ивалга аймагта «Эр­хим дархан» гэһэн галерей бии юм. Мүн «Ханхалаевай галерей» ехэ олон үзэсхэлэнүүдые олоной үзэмжэдэ дурадхадаг гээшэ.

Бага балшар наһанһаа элдэб юумэ суглуулдаг байһанби гэжэ Лев Бардамов хөөрэнэ. Мэргэжэ­лээрээ Бардамов соёл урлагтай холбоотой бэшэ, сүлөөтэ барилдаагаар һоригшо юм. Тиигэбэшье гоё һайхан хоморой эд бараа, шажан мүргэлэй эл­дэб зүйлнүүд, зурагуудые түрэл ороноороо гү, али хари гүрэнүүдээршье ябахадаа, ходо суглуулдаг байһан. Жэшээнь, Тарбагатайһаа, Мухар-Шэбэрһээ, Бэшүүрһээ, Улаан-Үдэһөө бурхадай хүрэгүүдые, Монголһоо болон Буряадай аймаг нютагуудһаа буд­дын шажанай бүтээлнүүдые суглуулһан байна.

Саашадаа Лев Бардамов 1917 онһоо 1985 он боло­тор Буряад-Монголой спортын, сүлөөтэ барилдаанай түүхэдэ зорюулагдаһан галерей нээхэ хүсэлтэй. Энэ түсэбэйнь бэелүүлэгдэбэл, Буряад Уласай соёл, урлаг­та үшөө нэгэ шэнэ хуудаһан нээгдэхэ байна.