​Эрхим дуунуудаа эгэшэглэн дуулахань

Буряад арад түмэндэмнай дууша, шүлэгшэ хүбүүд, басагадай саг үргэлжэ олошоржо байhандань, сэдьхэлдэ ехэ баяр түрэжэ байдаг. Илангаяа түрэл буряад хэлэн дээрээ шүлэг, хүгжэм найруулжа, уянгатуулан гоёор гүйсэдхэхэдэнь урматай. Мүнөөдэр дүрбэн тэг­шэ бэлиг талаантай Үндэр Баабай, Уран Дүшэ хада бурхад түшэлгэтэй Захаамин нютагай дангина Светлана Санжитоватай танилсуулая.

Светлана бага наhанhаа, hургуулиин үеhөө шүлэг, дуу бэшэжэ туршаhан. Анханhаа hүбэлгэн, шуран энэ басаган түрэл ёhо заншалаа, эхэ буряад хэлэеэ, арадайнгаа дуунуудые гүйсэд шудалха зорилготой Зүүн Сибириин соёл, урлагай академидэ һуража дүүргээд, түрэл За­хаамин аймагай соёлой таhагта шу­даргы ажаллана. Мүн баһа аймагай залуушуулай таhаг хүтэлбэрилнэ, «Зүүн зүгэй hэбшээн» гэhэн түбтэ гүйсэдхэхы продюсераар ажаллана.

Залуу үетэндэ туhаламжа хүргэхэ, хүмүүжүүлхэ ажал ябуулhанайнгаа түлөө Буряад Уласай Спортын бо­лон залуушуулай бодолгын талаар яаманай Хүндэлэлэй грамотаар шаг­нагданхай.

Светлана Санжитовагай «Сэдь­хэлэй бодол» гэhэн дууень Мария Балданова Монголдо 2014 ондо үнгэргэгдэhэн «Алтаргана» на­аданда гүйсэдхэжэ, алтан медальда хүртөө hэн. 2016 ондо Буряад Уласта үнгэргэгдэhэн «Алтаргана» фестивальда «Ерэхэ үбэл» гэhэн Светлана Санжитовагай дуун «Эрхим клип» гэhэн номинацида илажа гараа.

Буряад арадай эрхим шүлэгшэдэй нэгэн болохо Мэлс Самбуевай нэрэм­жэтэ шүлэг уншагшадай ехэ урил­даанда Светлана «Эреэгшэн» гэhэн уянгата шүлэгөө уншажа, Гран-при шанда хүртөө hэн. Yнгэрэгшэ де­кабрь hарада «Буряад-ФМ» радио­гой соносхоhон Сагаалган тухай шүлэг зохёохо урилдаанда Светлана Санжитовагай «Сагаан hарын дан­гина» гэhэн шүлэгынь шалгаржа, гол шанда хүртөө һэн. Мүнөө тэрэнь дуун болонхой зэдэлнэ.

Апрелиин 21-нэй үдэшын зургаан сагта «Феникс» гэhэн соёлой түбэй байшан соо бэлиг түгэлдэр басаган Светлана Санжитовагай «Дууша Бу­ряад» гэhэн зохёохы ажалай үдэшэ үнгэргэгдэхэнь. Энэ үдэшые «Зүүн зүгэй hэбшээн» гэhэн продюсерска түб болон Буряадай «Нютаг» гэhэн онлайн-радио эмхидхэнэ.

Энэ баярай үдэшэдэ Буряадай мэ­дээжэ дуушад Эрдэни Батсух, Лариса Баяндуева, Сагаанай Дэмид, Ринчин Дашицыренов, Татьяна Штырева, Эр­жена Санжиева, Ирина Шагдурова, До­ржо Шагдуров, Вера Шобосоева, «Сага­ан дали» гэhэн мэдээжэ дуу зохёогшо Ринчин Бальжуров, Аюрика, Цыренл­хам Эрдэнэ, Хэшэгтэ, Заято Раднаеву­уд, Александр Ринчинов, Амгалан На­мсараев, Ангелина Санжиева, Любовь Ламажапова, Влад Намдаков, «Хүхюу буряад» урилдаанда түрүүлhэн Арсен Цыренов, Олимпиада Уржанова гэг­шэд бэлигтэй залуу нүхэрөө амаршалха.

Светлана басаганда улам олон ду­унуудые зохёожо, гүйсэдхэжэ, түрэл соёлоо үргэлсэжэ, дуушанай эгээл үндэр орьёл дабаанда хүрэхыень хүсөөд, та бүгэдэ дуу хүгжэмдэ дура­тай буряад зоноо энэ зохёохы ажа­лай баярай үдэшэдэ уринабди.