Тэнгэри үргэһэн далаймнай
Тэнгис нэрэтэй, алдартай –
Тэнсүүриимнай олгодог лэ.
***
Хүхсөөн уула, яахадаа
Хүрөөгүй байгаабиб Тандаа -
Хүгшэн төөдэйнгөө буусада?
***
Удалхын хүбшэ тайга,
Удхалаад, уудалыш
Урдын сагай домогуудые.
***
Тайгын хоморой сэсэгүүд
Таамаг гоёнууд, найгас гээ,
Тайлбаряа хэлыт, жэрэгэс гээд...
***
Амаа ангалзуулна
Ангаахай дальбараанууд
Бамбаахай уурхай соогоо.
***
Доржи-Ханда нэрыем
Даржаганаса дабтаа гүш,
Далда нюусгай шубуухай?
***
Һурамал жэрхи эдеэ эринэ
Һамар ябууд сэмээд шэдэнэ,
Һабарайнь хөөрхэниие ... дөө.
***
Жэрхиин монсог нюдэн соо
Жэрэгэс гэнэ хүбшэмнай,
Зэргэлээ зогсоһон бидэшье.
***
Бахын дууниинь замхашагүй
Баян абяан таһалдашагүй –
Бахархалай гэршэ гү?
***
Галуута нуурай оршониинь –
Галуунай үдэ суглуулдаг
Домогто сагай сууряаниинь ха.
***
Огторгойдо һалбарһан
Одбол үзэмжэтэ сэсэгынь –
Олоной гү, али минии гү?
***
Хабсагайнуудни, эгсэнүүдни,
Хүлгүүлдэг бэлэйт зүүдыем
Хүнхинэмэ, гүндүү абяагаар...
***
Дэльбэеэ һэгсэрнэш шүүдэрһээ,
Дэнзэеэ янзалнаш һалхинһаа –
Дэншье гоёмсуу сэсэг хаш...
***
Далайн эзэнэй субад эрдэнеэ,
Дайдын эзэнэй номин шэмэгээ
Дам үршөөбэлынь – яахабта?
***
Мүнгэнэй барлаг... хайран даа
Мүшэтэ замаа тохируулба гү,
Мүнхын удхаяа хайлуулба гү?..
***
Эрын дүрэеэ олохом гэбэл,
Эмниг моридые һургахам гэбэл,
Эреэн гүрөөһэ эмээллэхэм гэбэл...
***
Ялалзанал даа, алтан зоос
Яаха аргын – тэнсэлгүй,
Яагаадшье, хурисалаал дарамаар ха.
***
Арбаа – тарбаа һахал соогоо,
Аляа һамбагар һүүл соогоо
Аяа нюунхайл миисгэйхэн.
***
Хээрын шуурганда сохюулаа бол,
Талын һалхинда нэшүүлээ бол -
Талархал эрие наранһаа.
***
Тулижа, үлдэжэ ябаашада
Талада дайралдаһан
Талхатай тулам – алтан лэ!
***
Эршэгэнүүр һалхинһаа хоросогоон,
Эрьелдэжэ-һөөргэдэжэ байнгүй
Эзэн-тарнияа уншаарайт.
***
Хабарай урин буубал даа,
Халуу бутарма галай ошон
Хабатай амархань гээбы.
***
Арсалан, Амгалан, Ардан –
Алиниинь хүндэб, даашагүй?
Амгаланиинь аятай гэлсэбэ.
***
Арсаланай аржаганахаһаа гү,
Али хулганаанай абяанһаа
айлтай гү?
Али янзын байха даа...
***
Байгалай оршон дайда
Мүндэлүүлһэн баатарнуудайнгаа
Бусажа ерэхынь хүлеэһээр гү?
***
Боолон Түмэр гээшэмнай
Бата һэлмын һүлдэтэй
Буумал түмэр байбалтай?
***
Монголшуудай дайдын нюдэн –
Миралаа долгито Байгалнай
Минаа ташуур бүһэтэй гү?
***
Бүхэли замбиин бодомжо
Бүри мүһэн толотоһоор лэ
Байгал далайн толи соо.
***
Далай соохи нөөсые
Дараса мэтээр һанажа,
Дэмыл даа, ухашалхань.
***
Хогоосон шанартай дэлхэйе
Хосоролһоо абарха арга бии –
Хуугай табингүй, мэгзэмээрээ...
***
Заргаша хааншье бай,
Зараса богоолшье бай –
Замбиин жамаһаа зайлашагүй.
***
Турлааг, туляаб бү гыш,
Торгон хара самсаяа
Торосолгүйхэн угаагыш.
***
Амин хайрата юумэн –
Али алинда ондо ондоо,
Ая шүтэлгэнь элил һаа...
***
Мии, а, миисгэйхэн
Мэхэтэй ногоон нюдэндөө
Мээхэй галхан носоогыш...
***
Шуурганай болоходо,
Шуяа далайһаа шэдүүлһэн
Мэлхэйн байдал ямар бэ?
***
Бахада худаг сэнтэй гү?
Мэлхэйдэ далай хэшэгтэй гү?
Бага, ехын ойлгосо ондоо.
***
Галаб сагуудай урасхал -
Ганга мүрэнэй эльһэн мэтэ
Гардажа ахихын хизааргүй.
***
Оһолтой зарим ушар тухай
Ололтой гү, үнэн харюу -
Одоол Бурхан мэдэхэ гэлсэдэг.
***
Тоншуул, ажалша тоншуул,
Тэрлигшни гоо, үнгэтэл
Дэрэшни теэд лэ, ямар хаб?
***
Эгсэ байса хабсагай дээрэ
Ээрэмшээжэ наададаг
Эшэгэхэн хэниие һануулнаб?
***
Талын ганса модые
Тайража, хухалжа болохогүй –
Тодхор дайраха гэлсэдэг.
***
Ерээдүйе тааха шэдитэй
Егүүзэр гэгээн түрэхэ гү?
Ехын лүндэн мүндэлхэ гү?
***
Хуралнуудай удаа
Хуряагдаһан архи ундые
Хубаари домто наншад гэдэг.
***
Харанхы һүниие һануулһан
Хаб хара хөөшхэхэн
Хубадал шара нюдэтэй.
***
Хоб жэбээр садаалтай?
Хогшол мэтээр суглуулан
Хормой дүүрэн бүридхөөд...
***
Елүүр мэтэ хальтируухайл -
Ербэдэжэ унангүй
Ерэһэн наһаяа наһалаа һаа...
***
Сахюусан хуралай удаа
Саанаһаа эльгээгдэһэн мэтэ –
Сартуулай булаг дэлбэрээ.
***
Бурхан багшые бэдэржэ,
Бүхы Замбиие уудалмаар гү?
Бурхан өөрынш досоо ха юм.
***
Үрмэдэһэндэ дарагдаһан буусамни,
Үрбыхэдэһэн гэрхэмни –
Үнгэрһэн сагай харуулшад лэ.
***
Хуһанай бүлсэгэр гүлгэ
Хүнэгөөр дүүрэн түүһэмнай
Хэндээ туһа асараа һэм?
***
Үндэгөө хаяжархиха Хүхы,
Уурхайгаа заһадаггүй Бэгсэргэ –
Улад соошье ушардаг.
***
Мүнгэтэй һаа, сүлөө ябахаш
Мүнхэ дэлхэйн ёһон даа –
Мүнгэеэ шоо бү үзэе.
***
Толгой дээрэнь дүлэн бадараа,
Титим мэтээр толороо –
Түрэл ехэтын тэмдэг гү?
***
Хуса унаад бүмбэрүүлбэ,
Хашараг зайдаад бүгтэгэнэбэ,
Хатаршадаал одоошье мордохонь ха.
***
Гэсэрэй юһэн һалаае
Гэрдэн байжа уншахадань,
Гэрэлээр дүүрэбэ Замбимнай.
***
Үльгэрэйнь ордон хаана юм?
Үндэр Тэнгэриин хаашуулай
Үүлэн-мүнгэн байрань гү?
Байсын эзэдэй суглаанда
Болзорто сагтань үрдихэм гээд,
Бүргэд унаад, зорибол даа...
***
Аабагар жаахан абаалзай
Абхай дангина гээшэб гээд,
Аляалан бэеэ мэхэлнэ гүш?
***
Монгол хатанай шарайда
Жэнхэни талын аялга бии,
Жэнгинэмэ уянга бии.
***
Тэнгис гэһэн нэрэтэйл даа,
Тэнгээ үгэһөө эхитэйл даа
Тэнгэриин тулга Байгалнай.
***
Монгол дайдын сэсэгы –
Магтаал солотой Байгалнай
Мэшэеэн дууланал буряадаар.
***
Адагай барлаг бэшэбди,
Абари бэлиг хоёртомнай
Алтанай шэнжэ бүрин бии.
***
Эзэдэй захиралта хүлеэгээд,
Эгтээ миин лэ һуугаа һаа,
Эрдэниин солоёо алдахабди.
***
Һүнэһэеэ дуудуулха гээшэ
Һүүдэр болошохогүйн тула
Һүлдэеэ үргэһэнтэй адли гү?
***
Даяаншын үльмыдэ мүргөө һаа,
Дабхар шүтэн һүзэглөө һаа -
Даамай хүсэлнүүд бэелхэ гү?
***
Егүүзэрнүүдэй һургаал,
Ехын зоной һорилго –
Ерээдүйн түлөө мүргэл лэ.
***
Сахилдаг сэсэгэй
Сэнхирхэн дэльбэ соо
Сэлэнгэ таламнай тунашоо.
***
Эсэгын дайнай үедэ
Элинсэгыем абараа бэлэйш,
Энэрил үрэтэй улаалзай.
***
Түби дэлхэйн
Тэгэн дунда зогсоноб –
Тэнсүүреэ олохоо һэдэһэндэл...
***
Зэрэб мэдээ асарагша
Жэгтэй үнгэтэ шубуухай
Зэргэшээ дэлхэйн элшэ гүш?
***
Шаажанай бутархайгаар
Шабар гэрээ гоёодог
Шалюухай хаһамнай, хаанабши?
***
“Зэлэ тата, зэлэ тата!” –
Жэгтэй энэ уряаһаа
Жэгүүр далитан хушуураа.
***
Эрье дээрэ наадаһамнай,
Элһэн ордон бариһамнай -
Эхин зурхайн бэшэг һэн.
***
Мууе дары мартаха,
Һайе һааргүй үргэхэ –
Һанаанай заршам бэшэ гү?
***
Адаряатай бодол,
Адаалхай хараса –
Абаһаар эзэндээ бусадаг гү?
***
Эхын энхэрэл хараса –
Энэ наһанай заяаша
Эсэс хүрэтэрнай хамгаалхал.
***
Бата этигэл үгы һаа,
Бурханай урда тангариглал
Буруу үйлэ болохол даа.
***
Шаазгай шаханана,
Шашаг үгэ бэшэл ха –
Сасали үргыт гэнэ гү?
Абарал үршөөдэг,
Арюусхадаг, һэргээдэг
Аригуун сэсэг бэдэрнэб.
***
Үлэмжэ ялагарынь,
Үзэмжэ гэрэлтэйнь
Үдэшын ганса одон мүн.
***
Багшанараа хүндэлөө һаа,
Багшанараа дурдаа һаа,
Бараг ябаха ёһо бии.
***
Үбэр жалга, байса соо
Үхибүүн наһанайм үльгэрэй
Уурхайлһые мэдэрнэб.
***
Ринчинжаб таабайн
Энэрил аятай магтаалынь
Эржэн-буржан долгитой һэн.
***
Зэдын долгидой хашарһан
Зэнхэгэр зэрэлгээн соогуур
Зэд толидол яларна.
***
Хабарай уя элшэ соо
Хабатай, аятай шунганаб,
Замбитай ниилэн ниидэнэ гүб?
***
Тоонтоёо дүхэриглэн
Тоглон наадахаһаа
Тэнтэй жаргал үгы бэлэй.
***
Ара Монголой дайдые
Абарагша, хамгаалагша,
Аршалагша Үндэр Баабай.
***
Бата үргэн һуудалынь
Баатарай үргөө һануулна,
“Баро-баро” дуудуулна.
***
Үндэр буурал Баабайн
Үбсүү талмагар сээжэдэ
Үнгын эрдэни ялалзаа.
***
Гурбан тобхогор болдогынь
Гушан гурбан нюусатай –
Гулидхан таахын аргагүй юм.
***
Орьел һаргаама оройнь
Одон хээтэй угалзатай,
Олдошогүй шухаг үзэмжэтэй.