1014
2017 оной апрелиин 23-24-нэй үдэрнүүдтэ Челябинск хотодо үнгэргэгдэһэн Бүхэроссиин арадай театрнуудай фестивальда Буряад Уласай Аха аймагай Өөрлигэй театр хабаадажа, лауреадай нэрэ зэргэдэ хүртэбэ.
Хоёрдохи жэлээ эмхидхэгдэһэн тус фестивальда Ородой Холбоото уласай 11 һайн дуранай театрнууд хабаадаа. Манай Буряад Уласһаа Хэжэнгэ, Хурамхаан, Аха аймагай театрнууд хабаадаха тухайгаа мэдүүлжэ, зүжэгэйнгөө видео-буулгабаринуудые эльгээһэн байна. Удаань Өөрлигэй театр фестивальда хабаадахаяа уригдаа.
“Две маски” гэһэн Бүхэроссиин һайн дуранай театрнуудай 2-дохи фестиваль Ородой Холбооной Уласай соёлой яаман, Челябинск можын соёлой яаман, Ородой Холбооной Гүрэнэй арадай уран бүтээлэй түб эмхидхэбэ.
Фестивальда Өөрлигэй театр “Буряад үнэн” сониной сурбалжалагша Цырегма Сампиловагай “Найдалай хүсэн” гэһэн зүжэг табиһан байна. Ородой Холбоото Уласай арадай артист, Нина Токуренова энэ зүжэг найруулан табиба. Аймагай захиргаанай соёлой таһагай дарга Дарима Литвинцева энэ түсэл хүтэлбэрилбэ. Нютагайнгаа арадай театрай хабаадагшадта аймагай захиргаан, Ахаһаа уг гарбалтан туһа хүргэһэн байна.,
Өөрлигэй театр лауреат болохоһоо гадна “Зүжэгшэдэй эрхим ансамбль” гэһэн шанда хүртэбэ. “Эхэнэрэй эрхим роль” гэһэн шан театрай артист Надежда Самаевада олгогдоо.
Фестивалиин тусхай “Эрхим хүтэлбэрилэгшэ-эмхидхэгшэ” гэһэн шан Аха аймагай захиргаанай соёлой таһагай дарга Дарима Литвинцева гэгшэдэ барюулагдаа. Дарима Литвинцева хадаа Аха аймагай соёлой һалбариин дээдэ гарай мэргэжэлтэн юм. Урагшаа һанаатай, эдэбхи ехэтэй Дарима Литвинцевагай оролдолгоор, мүн театрай найруулагша Нина Токуреновагай ашаар, Аха аймагай нютаг зоной дэмжэлгээр үндэр амжалта туйлагдаба.
Өөрлигэй арадай театр 1968 ондо байгуулагдаһан юм. 1970 ондо тэрээндэ арадай гэһэн нэрэ зэргэ олгогдоо. Өөрлигэй арадай театр зүжэгүүдые табихаһаа гадна, бүхэроссиин, уласай болон аймагай хэмжээ ябуулгануудта эдэбхитэйгээр хабаададаг юм.
Буряад Уласай Соёлой яаманай сайтһаа гэрэл зураг абтаба.
