833
“Красавица Ангара” гэһэн балет Москва хотодо намартаа үнгэргэгдэхэ “Видеть музыку” гэһэн фестивалиин программада оруулагдаба.
Үнгэрһэн долоон хоногто Санкт-Петербургда хүгжэмэй театрнуудай эблэлэй гэшүүдэй суглаан үнгэргэгдэбэ. Энэ хэмжээ ябуулгада Ородой Холбоото Уласай театрнуудай захирал, уран һайханай хүтэлбэрилэгшэ болон театр шэнжэлэгшэд хабаадаһан байна. Буряадай оперо болон баледэй театр харагшадтай ажал ябуулха талаар захиралай орлогшо Давид Дондупов түлөөлбэ.
Суглаанай үедэ 2016 ондо эблэлэй ябуулһан ажалай дүнгүүд согсологдожо, 2017 оной түсэбүүд, “Видеть музыку” фестивальда бэлэдхэл, “Легенда” гэһэн шанда хүртэхэ хүнүүдые элирүүлхэ тухай хэлсэбэ. 2016 оной намар үнгэргэгдэһэн “Видеть музыку” гэһэн түрүүшын фестиваль тухай хэлсэһэн байна. Тиихэдэ Буряадай оперо болон баледэй театр Большой театрай тайзан дээрэ “Тоска” гэһэн оперо харуулһан байна. Тэдэнэр амжалтатайгаар хабаадажа, харагшадай, шэнжэлэгшэдэй болон суг хүдэлдэг нүхэдэйнгөө үндэр сэгнэлтэдэ хүртэжэ, хоёрдохиёо үнгэргэгдэхэ фестивальда хабаадаха болобо. 2017 оной намар эмхидхэгдэхэ хэмжээ ябуулгада хабаадаха тухай Ород гүрэнэй театрнуудһаа 50 мэдүүлгэ ороод байна. Буряадай оперо болон баледэй театрай “Красавица Ангара” гэһэн балет фестивалиин программада оруулагданхай юм. К. С. Станиславский болон Вл.И. Немирович-Данченко гэгшэдэй нэрэмжэтэ Москвагай хүгжэмэй театрай тайзан дээрэ балет табигдаха.
Буряадай оперо болон баледэй театр ганса уласай хэмжээндэ бэшэ, үшөө тиихэдэ федеральна хэмжээндэ үндэр амжалтануудые туйлаһан байна. 2017 ондо Буряадай оперо болон театрай артистнар ондоо хотонуудта эмхидхэгдэһэн фестиваль, тоглолтонуудта эдэбхитэйгээр хабаадана.
Хүгжэмэй театрнуудай эблэл байгуулха талаар шиидхэбэри 2004 ондо абтаһан юм. Энэ эблэлдэ Ород гүрэнэй гушаад театрнууд ороһон байна.
