​"Хүхюу буряад" хүнүүдые хүхеэбэ

Үнгэрэгшэ долоон хо­ногой гарагай табан­да заншалта ёһоороо «Хүхюу буряад» гэһэн шог зугаатай хөөрөөнүүдэй урилдаан табадахияа эм­хидхэгдэбэ.

Буряад театрай танхим соо хүн зон олоороо суглар­жа, амаралтын үдэрнүүдэй урда тээхи үдэшые ехэл хүхюутэйгээр үнгэргэбэ хаш. Буряад хэлэнэй найр шэнги удхатай энэ хэмжээ ябуул­га олоной анхарал татадаг болонхой. Бага үхибүүдһээ эхилээд, буурал толгой­той үбгэд, хүгшэд хүрэтэрөө түрэл хэлэн дээрээ шог зу­гаа дүрбэн сагай туршада шагнаха арга байба ха юм. Урилдаанай урда тээ бу­ряад үзэсхэлэнгүүд эндэ дэлгээгдэһэн байна: «Най­дал» жасын, һуралсалай «Амар мэндэ» түбэй гэхэ мэтэ.

Урда үдэрынь худалдаа наймаанай «СAPITAL MOLL» гэһэн түбтэ шэлэн абалгын мүрысөөн үнгэрөө. Эндэ ха­баадагшад хоёр номинаця­ар, ңаһанай дүрбэн бүлэгөөр буряад уран үгынгөө баялиг харуулһан байна.

Хоёрдохи үдэр Буряад те­атрай байшан соо түгэсхэлэй шатын урилдаанда хабаадаг­шад бэлиг шадабарияа ха­руулжа, хурса хэлэнэй, шог зугаагай талаар туршалса­ба. Урда жэлнүүдтэ орходоо, үхибүүд бүри нюурамгай, хүн зоной урда хөөрэхэ дадалтай болоһон байна гэжэ тэмдэглэ­мээр. Нэгэниинь нүгөөдэһөө бүри энеэдэтэй байхые оролдонод. Эдэ үхибүүдые бэлдэһэн баг­шанарай, гэртэхинэй үүргэ сэгнэмээр. Хүүгэд тоб-яб байса, тогтон торонгүй, шог зугаатай хөөрөөгөө дэлгээ­нэд. Уласай гол тайзануудай нэгэнһээ олон зоной урда үгэ хэлэһэнээ һурагшад томо болоходоо, һанажа ябаха бай­ха. Тэдэнэй хүгжэлтэдэшье туһатай үйлэ хэрэг ха юм. Ганса интернет, компьютер­на наада бүхы наһаараа хара­жа ябахагүй гүб даа.

Тус урилдаанда хоёрдохи­ёо хабаадаһан Зэдэ аймагай Инзагата нютагай Чимит-До­ржо Раднаев энэ удаа Гран-при шанда хүртэбэ. Ерээдүй сагта артист болоошье һаа, ядахагүй хүбүүн гэжэ тэмдэ­глэхээр.

Баһал Зэдын «Шэнэ үе» гэһэн театральна студи энэ удаа «Эжын эрхэ хүбүүн» гэһэн зүжэг харуулжа, да­хин нэгэдэхи һуурида гара­ба. Хяагта аймагай Аса-Ар­галтайн соёлой байшанай хүдэлмэрилэгшэ эмээлтэ хазаартын дефиле харуулжа, энэ үдэшэдэ онсо маяг янза оруулба.

Элдэб конкурснуудта хабаадаһан, нёдондо шан­гай һуури эзэлһэн Мужы­хын клубай хүдэлмэрилэгшэ Ринчин-Доржо Санданов энэ удаа буряад дуунууд тухай шог зугаатайгаар, үгтэһэн са­гай хэмжээн соо хөөрэбэ.

Һайшаалтайнь юун бэ гэ­хэдэ, ород яһанай үхибүүд Васильев Виталий, Титов Даниил, Григорьева Арина, Трунёва Полина гэгшэд уһан буряад хэлэн дээрэ моноло­гуудые яһала уран шадама­раар уншаа. «Хүхюу буряад» урилдаанһаа гадна, элдэб мүрысөөнүүдтэ хабаадаһан һурагшад хүн зон соо ябажа һурамхи, абааштайнууд бо­лонхой.

Томошуулшье баһа ондоо хүнэй гү, али өөһэдынгөө зохёоһон найруулгануудые хөөрэжэ, харуулжа, сугларһан зониие энеэлгэһэн, хүхеэһэн байна. «Халзан толгойтын хараалнууд» гэһэн мэдээжэ ябаган зугаае Ярууна айма­гай Иисэнгын түлөөлэгшэ Доржиева Должит Дабаевна ехэл шадамараар гүйсэдхэжэ, бултанай дура буляажа шадаһан байна. Тэрэ «32 шүдэн» гэһэн номинацида олоной дуугаар илаба.

Ородой Холбоото Уласай арадай артист Нина Току­реновагай хүтэлбэри доро хүдэлһэн шүүгшэд гала-то­глолтын үедэ зүбшэжэ, зүб дүнгүүдые гаргаа гэжэ хэлэ­мээр. Буряад Уласай арадай артист Любовь Цыдыпова урилдаанай түгэсхэлдэ үгэ хэлэжэ, харагшадые олоороо хабаадагты гэжэ уряалба.

Зүб лэ даа, иимэ хэмжээ ябуулгануудта олоороо ха­баадахадаа, түрэл хэлэеэ һайнаар мэдэхэ, хүн зоной урда дуугаржа, хөөрэжэ ша­даха зоноймнай тоо олошор­хо байһаниинь дамжаггүй.

Гран-при шанда хүртэгшэ Чимит-Доржо Раднаев

Харагшадта һайшаагдаһан Должит Доржиева

Борис Балдановай гэрэл зурагууд