​"Байгал" театрай бахархама амжалта

Майн 7-до Буряад оронойнгоо ажаһуугшадые “Байгал” театрай хатаршад маша ехээр баярлуулба. “Россия-1” телеканалай эмхидхэһэн “Танцуют все!” гэһэн бүхэроссиин түсэлдэ түрүү һуури эзэлжэ, нэгэ миллион түхэриг шанда хүртэһэн байна. Һүүлшын шатада орожо шадаһан уран бэлигтэнээ дэмжэхын түлөө Буряадаймнай таба мянга гаран хүн Соведүүдэй талмай дээрэ сугларжа, сэхэ дамжуулга хараба. Энээниие эмхидхэхэ тухай даабари үгэһэн Буряад Уласай Толгойлогшын уялгануудые дүүргэгшэ Алексей Цыденов олоной дунда байлсажа, бултантай адли баярлаба.

Анна Огороднигой гэрэл зураг

Буряад Уласай Толгойлогшын уялгануудые дүүргэгшэ Алексей Цыденов арад зонтоёо суг хамта "Байгал" театраа дэмжэлсээ

Анна Огороднигой гэрэл зураг

"Танцуют все!" урилдаанай түгэсхэлэй шатада "Байгал" театрай хабаадахыень харахаяа аргагүй олон зон суглараа 

Анна Огороднигой гэрэл зураг

Буряад Уласай Толгойлогшын уялгануудые дүүргэгшэ Алексей Цыденов зоной дунда 

Байгуулагдаһаар 75 жэлэйнгээ ойн баярые байгша ондо угтахаяа байһан дуу, хатарай “Байгал” театр нэгэшье дахин телевидениин томо түсэлнүүдтэ хабаадажа үзөөгүй байгаа. Театрай уран һайханай талаар хүтэлбэрилэгшэ Жаргал Жалсановай хэлэһээр, “Россия-1” гэһэн федеральна телеканалай үүсхэһэн “Танцуют все!” урилдаанда бэеэ туршаха гэһэн шиидхэбэри театрай хатаршад абаһан байна. Хоёр һарын урда энэ түсэл эхилһэн юм. Эмхидхэгшэдэй һанамжаар, бүхы Ород гүрэнэй хэдэн хотонуудай 11 бүлэг шэлэгдээ. Москва, Петрозаводск, Красноярск, Новокузнецк, Тюмень, Белгород, Новосибирск болон Севастополь хотонуудай бэлигтэй, шадамар бэрхэ, өөрын онсо маягтай хатаршад эндэ хабаадаа. 

- Булта нютаг нютагтаа мэдээжэ бүлэгүүд юм. Тэдэ хатарай элдэб жанраар хүдэлдэг байна. Хип-хоп, контемпорари, джаз, бальна болон арадай хатарнууд, вог, стомпдэнс гэхэ мэтэ хатарай бүхы янзануудые гүйсэдхэжэ шададаг артистнууд тус урилдаанда хабаадана, - гэжэ түсэл тухай мэдээсэл дотор бэшэгдэнхэй. 

Хабаадагша бүхэн эмхидхэгшэдэй даабари үгэһэн нэгэ хатар бэлдэжэ, амаралта бүхэндэ “Россия-1” телеканалаар сэхэ дамжуулгада харуулха түсэбтэй байгаа. Тэдээниие гурбан шүүгшэд сэгнэжэ, эгээл бага дүн абаһаниинь гэртээ бусаха байгаа. Шүүгшэд – Ородой Холбоото Уласай габьяата артистка Алла Сигалова, кино болон театрай актёр Егор Дружинин болон баледэй артист Владимир Деревянко гэгшэд – долоон шатада манай “Байгал” театрта нэгэшье муу сэгнэлтэ табяагүй. Тиимэһээ финалай үедэ Соведүүдэй талмай дээрэ сугларһан хүн зон ехэ найдажа, хатаршадаа дэмжэхэеэ ерээ гэхэдэ, алдуу болохогүй. Мүн тиихэдэ шүүгшэд шата бүхэндэ манай хатаршадые магтажа, һайхан үгэнүүдые хэлэжэ байгаа бшуу. Хахад финалай шатада “Байгал” театр «вог» гэһэн өөрсэ янзын хатар уранаар гүйсэдхэжэ, 30 балл абаа. Түсэлэй үргэлжэлһэн бүхы хугасаада иимэ ехэ сэгнэлтэ нэгэшье бүлэг абаагүй бшуу. 

Финалай үедэ Соведүүдэй талмай дээрэ гурбан томо экран табигдажа, бүхы сугларагшад “Танцуют все!” гэһэн дамжуулга сэхэ хараха аргатай байгаа. Дамжуулгын эхилхын урда тээ “Байгал” театраа дэмжэхэеэ ерэһэн уласай мэдээжэ дуушад, хатаршад эндэ сугларагшадта уран бэлигээ харуулжа хужарлуулаа. Сэхэ дамжуулгын эхилхэдэ, талмай дээрэ сугларагшадай, мүн “Байгал” театрай хатаршадай һонорто һонин мэдээн соносхогдобо: шүүгшэд сэгнэлтэ табихагүй, танхим соо һууһан харагшад илагшадые өөһэдөө элирүүлхэ. Зарим зон һанаагаа зобошоо. Тиигэбэшье “Байгал” театрнай ялас гэмэ амжалта туйлаба гээшэ: тэдэ түрүүлхэһээ гадна нэгэ миллион түхэриг шанда хүртэбэ.

Анна Огороднигой гэрэл зураг

Буряадаймнай мэдээжэ дуушад, хатаршад "Байгал" театрайхидые дэмжэлгын тоглолто эмхидхээ

“Вконтакте” гэһэн ниитын холбооной һайшаалда хүртөө. Шүүгшэдэй нэгэн Алла Сигалова “Байгал” театрые “супер-мэргэжэлтэд” гэжэ нэрлээ. Егор Дружининай тэмдэглэһээр, һүүлшын шатада хатарай иимэ олон янзануудһаа бүридэһэн бүтээл гүйсэдхэхэ гээшэ ехэ харюусалгатай.

- Иимэ хатар гүйсэдхэхын тула ехэ шадал, зориг, шанга зүрхэн хэрэгтэй. Танай бүтээл бултанай нюдэнэй шэмэг болоо, хараад баярлажа һуугаабди, - гэжэ Егор Дружининай хэлэхэдэнь, Соведүүдэй талмай дээрэ альга ташалган нэершоо бэлэй.

Үнэхөөрөөшье, һүүлшын шатын хатартаа брейк данс, вальс, танго, vogue, контемпорари, балет гэхэ мэтые - бултыень “Байгал” театрайхид харуулаа. Мүн тиихэдэ хатараа өөһэдынгөө үндэһэн хатар - ёохороор түгэсхөө. Һүүлшын үгэ абахадаа, Жаргал Жалсанов хүбүүд, басагадтаа найдажа байһанаа мэдүүлээ.

- Манай артистнууд ехэ бэлиг шадабаритай гэжэ мэдэжэ ябадаг байгааб. Тиигэбэшье шүүгшэд ямараар маанадта хандахаб гэжэ зүрхэ алдаһан байгаабди. Манай хатаршад бүхы бэрхэшээлнүүдые дабажа шадаа! Эгээл эрхим артистнуудтай хүдэлнэб гэжэ һанагдана, - гэжэ баярлаһан хүтэлбэрилэгшэ Жаргал Жалсанов онсо тэмдэглээ.

Эрхим хатаршадаа нэрлэе: Ирина Баторова, Юлия Замоева, Донара Балданцэрэн, Тумэн Цыбиков, Даба Дашинорбоев, Аюр Догданов, Баир Табхаров, Сэсэгма Даиндарова, Виктория Кожага, Амголон Цыремпилов, Филипп Ойнаров, Фёдор Кондаков, Чингис Цыбикжапов, Чагдар Будаев, Тумун Раднаев, Екатерина Осодоева, Инна Сагалеева, Евгений Чойдонов, Галина Бадмаева, Гырылма Дондокова, Валентина Юндунова, Валентина Жаргалова, Арюна Цыдыпова, Арсалан Санданов, Алексей Раднаев, Анастасия Дашинорбоева, Александр Петров, Александра Санданова. Омогорхонобди танаараа, манай одод! 

Буряад Уласай Толгойлогшын уялгануудые дүүргэгшэ Алексей ЦЫДЕНОВ:

- Гүрэн дотороо эгээл эрхим театр гэжэ манай “Байгал” гэршэлбэ. Буряад Уласта ерэхэдээ, иимэ түрүү артистнууд эндэ бии гэжэ мэдэхэгүй байгааб. Тиимэһээ эдэ амжалтанууд минии зосоо аргагүй ехэ омогорхол түрүүлнэ. Тус хэмжээ ябуулгада “Байгал” театрай хабаадахаяа ошохын урда тээ хэдэн үдэрэй үлөөд байхада, мүнгэ һомолжо шадаабди. Энэ алхам манай уласые холо ойгуур суурхуулхын түлөө хэгдээ, тиигэжэ тэдэ үндэр дүнгүүдые туйлажа, бултыемнай баярлуулба. “Байгал” театр Буряадаймнай ёһотойл омогорхол болоно. Манай нютагай хүн зон элдэб шэглэлээр шалгарна. Тэдэнэй дунда мүнөөдэрэй энэ амжалта онсо һуури эзэлнэ гээшэ.

Буряад Уласай Соёлой яаманай сайдай уялгануудые дүүргэгшэ Тимур ЦЫБИКОВ:

-Һүүлшын шатада ороһон бүлэгүүдэй дунда манай театрай түрүүлжэ гараһандань, ехэ баяртай байнабди. Түсэлэй алишье шатада “Байгалайхид” эрхимүүдэй тоодо орожо, бэлиг талаантай байһанаа гэршэлээ. Бүхы хабаадагшадай дунда манай хатаршад өөрын онсо хэлбэритэй байгаа. Хатарай элдэб янзануудые тэгшэ бэрхээр гүйсэдхэхыень хараабди. “Танцуют все!” гэһэн түсэлдэ хабаадахань гэжэ дуулаад, баярлаа һэмди. Юуб гэхэдэ, иимэ ушар ходо тохёолдодог бэшэ. Шадалтай һаа, бэеэ туршаха хэрэгтэй. Мүн тиихэдэ манай уласай соёл, ёһо заншал холо ойгуурхи хүн зон мэдэхэ болоно ха юм.

Анна Огороднигой гэрэл зураг

Буряад Уласай Соёлой яаманай сайдай уялгануудые дүүргэгшэ Тимур ЦЫБИКОВ, Буряад Уласай Толгойлогшын уялгануудые дүүргэгшэ Алексей ЦЫДЕНОВ

Анна Огороднигой гэрэл зураг

Хүн зон "Байгал" театрай амжалтаар ехэ баярлаа