871
Буряад Уласай “Үльгэр” театрай мүндэлһөөр 50 жэлэй ойн баярта дашарамдуулан, “Нүүдэлшын зам” гэһэн Уласхоорондын 3-дахи фестиваль 2017 оной сентябриин 3-һаа 7 хүрэтэр Улаан-Үдэдэ үнгэргэгдэхэ юм. Ородой Холбоото Уласай болон хари гүрэнүүдэй мэдээжэ хүүхэлдэйн театрнууд Буряад Уласай ниислэл хото ерэхэ.
Фестивалиин программаар Х. Намсараевай нэрэмжэтэ Буряад драмын, Н. Бестужевай нэрэмжэтэ Ород драмын болон “Үльгэр” театрнуудай тайзан дээрэ зүжэгүүд табигдахаһаа гадна, гудамжануудта һонирхолтой спектакльнууд харуулагдаха юм. Энэ фестиваль хадаа Ази болон Европын соёлой хүдэлмэрилэгшэдэй хорондоо харилсаха, дүй дүршэлөөрөө хубаалдаха, хүүхэлдэйн театрнуудай шэнэ юумэнтэй танилсаха гэһэн гол зорилгонуудтай.
Япон, Монгол гүрэнүүдэй, Татарстан, Тыва, Яхад уласуудай, Шэтэ, Братск, Железногорск, Южно-Сахалинск, Санкт-Петербург хотонуудай хүүхэлдэйн театрнууд хэмжээ ябуулгада хабаадаха тухайгаа дуулганхай.
“Үльгэр” театрай уран һайханай хүтэлбэрилэгшэ Эрдэни Жалцановай хэлэһээр, хүүхэлдэйн театрнууд олон жанрай зүжэгүүдые харуулха. Жэшээнь, Япон гүрэнэй артистка Юки Кудо 3 минутын туршада моноспектакль нэгэ харагшада харуулха.
- Минии һанахада, манай харагшад ехэтэ һонирхохо,- гэжэ Эрдэни Жалцанов хэлэбэ.
Фестивальда хабаадагшад “Эрхим зүжэг”, “Эрхим режиссура” болон “Уран зураашын эрхим хүдэлмэри” гэһэн 3 номинацида мүрысэхэ юм. Конкурсһоо гадуур Монголой болон Япон гүрэнүүдэй хүүхэлдэйн театрнууд зүжэгүүдые харуулха. Үшөө тиихэдэ, “КонтАрт” гэһэн продюсерскэ түбэй, “Кукольный формат” театрай суг бэлдэһэн түсэл – “Колино сочинение” гэһэн зүжэг табигдаха юм. Энэ түсэл “Эрхим спектакль”, “Эрхим роль” гэһэн номинацида “Алтан баг” шанда хүртэһэн байна.
Хитад болон Солонгос гүрэнүүдэй хүүхэлдэйн театрнууд ерэхээр хараалагдана.
Буряад Уласай Соёлой яаманай сайтһаа гэрэл зураг абтаба.
