1068
Майн 18-да хабарай сагай мартагдашагүй хэмжээ ябуулгануудай нэгэн “Мүзейн һүнинүүд” үнгэргэгдэхэ. Жэл бүри энэ түсэл олоной һонирхол татадаг.
Ородой Холбоото Уласта 2017 он байгаали хамгаалгын жэл гэжэ соносхогдонхой. Тиимэһээ музейнүүдтэ эмхидхэгдэхэ акци байгаали хамгаалгада зорюулагдана. Үндэһэтэнэй музейдэ нэгэ һүниин туршада ажаһуугшад бусад үдэрнүүдтэ үнгэргэгдэдэгүй хэмжээ ябуулгануудые хараха юм. Тэдэнэр музейдэ сай ууха, мастер-классуудта хабаадаха, хүгжэм шагнаха, һонирхолтой юумэнүүдые худалдан абаха, дефиле хараха, конкурс, викторинада хабаадаха, дэлгэгдэнхэй үзэсхэлэнгүүдые хараха арга боломжотой юм. Нэгэ билет худалдан абажа, эдэ бүгэдые хараха аргатай.
Залуушуулые музейнүүдэй ажаябуулгатай танилсуулха, һонирхуулха, дурлуулха зорилготойгоор хэмжээ ябуулга эмхидхэгдэнэ. Мартагдашагүй һүниин онсо шэнжэ гэхэдэ, эндэ наһатай зон, үхибүүд, залуушуул һанаандаа таараһан, һонирхолтой үйлэ хэрэгтэ хабаадаха аргатай. Майн 18-да үглөөнэй 11.00 сагһаа 16.00 саг болотор Үндэһэтэнэй музейн бүхы түбүүд түлбэригүйгөөр ажалаа ябуулха. Удаань үдэшын 19.00 сагһаа һүниин 23.00 болотор һонирхолтой хэмжээ ябуулга зуун түхэриг түлэжэ, хаража болохо.
Ц.С. Сампиловай нэрэмжэтэ Уран һайханай музейдэ Буряад Уласай Байгаалиин музей һонирхолтой хэмжээ ябуулгануудые үнгэргэхэ юм. Ородой Холбоото Уласта дархан газарнуудай бии болоһоор, Баргажанай дархан газарай мүндэлһөөр 100 жэлэй ойн баярнуудта зорюулагдаһан “Заповедная Бурятия” гэһэн үзэсхэлэн дэлгэгдэхэ. Үшөө тиихэдэ, олон тоото мастер-классууд, үхибүүдтэ болон томошуулда зорюулагдаһан викторинанууд эмхидхэгдэхэ. Гэрэл зурагаа буулгаха дуратайшуулда “Лежбище нерп”, “Семь чудес России” гэһэн талмайнууд бэлдэгдэхэ юм.
Уран һайханай музей шэнэ үзэсхэлэнгүүдтэй харагшадаа танилсуулха. Уран зурагаар, элһээр зуралгаар, хатараар мастер классууд болон байгаали хамгаалгын “Интуиция” гэһэн квест эндэ эмхидхэгдэхэ. Энэ үдэшын шэмэг боложо, “Lakers” гэһэн бүлэг дуу, хүгжэм наадаха. Үшөө тиихэдэ, “Азияфилмс” гэһэн кинокомпани кастинг үнгэргэхэ юм. Музейдэ мартагдашагүй һүни энээгээр дүүрэхэгүй, үшөө олон һонирхолтой хэмжээ ябуулганууд түсэблэгдэнхэй.
М.Н. Хангаловай нэрэмжэтэ түүхын музейдэ “Заповедная Бурятия. Создай свою историю” гэһэн һонирхолтой программа бэлдэнхэй. Эндэ “Шэмээшэгүүдэй эко-ёһо заншал”, “Шэнэхээн буряадуудай эко-ёһо заншал” болон “Эвенк арадай эко-ёһо заншал” гэһэн үзэсхэлэнгүүдые дэлгэхэ юм. Байшанай 2-дохи дабхарта хүүхэлдэйн “Үльгэр” театр зүжэг бэлдэнэ.
Үбэр Байгалай шэмээшэгүүдэй дуунуудые шагнаха, һэеы гэртэ буряад арадай заншалта эдеэ бэлдэхэ арга байха. Верхнеудинск хотын түүхын хуудаһануудые иража, аяншалга эмхидхэгдэхэ. Квестнүүд болон байгаали хамгаалгын асуудалнуудаар нааданууд, викторинанууд үнгэргэгдэхэ юм. Кадедүүдэй һургуулиин шабинар болон багшанарай колледжын дуушад энэ хэмжээ ябуулгада хабаадалсаха.
Майн 18-да Новоселенгинск һууринда Декабристнуудай музейдэ бэлдэгдэһэн “Байгаали, бидэ шинии нүхэдбди!” программа хараха арга байха. Эндэ хүхюу мүрысөөнүүд, мастер-классууд болон бусадшье хэмжэ ябуулганууд үнгэргэгдэхөөр хараалагдана.
Музейн ажалшад бэлэдхэлэй ажал ябуулжа, олон тоото харагшадаа баярлуулха хүсэлэнтэй.
Буряад Уласай Соёлой яаманай сайтһаа гэрэл зураг абтаба.
