​"Байгал" сэтгүүлдэ зорюулга

Буряад Уласай үндэһэтэнэй 1-дэхи лицей-интернадта Улаан-Үдэ хотын И.Калашниковай нэрэмжэтэ номой сангай үүсхэлээр “Байгал” сэтгүүлэй 70 жэлэй ойн баяртай дашарамдуулан, “Байгал” сэтгүүлэй редактор - Буряад Уласай арадай поэт, Я.Гашегай нэрэмжэтэ шангай лауреат, “Сибирь – территория надежд” гэһэн можо хоорондын конкурсын лауреат, Ородой Хэблэлэй алтан жасын дипломант, Монголой Уран зохёолшодой эблэлэй шагналта Галина Хандуевна Базаржапова-Дашееватай уулзалга үнгэрбэ. 

Уулзалгада һургуулиин 8-дахи, 9-дэхи ангинуудай һурагшад хабаадаа. Галина Хандуевна ургажа ябаһан “улаан бургааһадта” “Байгал” сэтгүүлэй булагай эхи, һүл һүлдые үргэһэн, үргэн замда гаргаһан редакторнууд Никифор Рыбко, Цыден Галсанов, Африкан Бальбуров, Сергей Цырендоржиев болон уран зохёолшод-сурбалжалагшадые дулаан үгөөр дурсажа, һурагшадай анхарал татамаар хөөрэжэ үгөө. Һурагшадые зохёол бэшэжэ хэблүүлхыень уряалба. Һүүлэй дугаарта гараһан зохёолнуудые дурдажа, хабаададаг зониие нэрлээ. 

Монгол Уластай, Үбэр Монголтой холбоо харилсажа, урданай буряад хэлэнэйнгээ сэсэн бодолнуудые, уян нугархай хэлые һэргээжэ байһан тухайгаа хэлэбэ. Һурагшад асуудалнуудые һураа. Хэд бэ гэхэдэ, Зомонова Альбина, Горда Иван, Таханова Янжина номин хадагаар хүндэтэ айлшанаа золгожо, бэлэг барюулаа. 

Байгал далай мэтэ 

Буурал һамбай һахалтай, 

Байгалай уһанда адли 

Бурьяма сэбэр сагаан сэдьхэлтэй. 

Бадарһан зулын ошон шэнги 

Буряадтаа һалбарнаш хэтын хэтэдэ, 

Бурхан Багшын заяагаар 

Буряад зоноо баясуулнаш. 

Сэсэгүүдэй буурсагтал олошоржо, 

Сэгээн тала нугануудаараа 

Сэсэн үгэнүүдэй гоё һайханиие 

Сэнгүүлэн арадтаа мэдүүлнэш. 

Оршомто юртэмсые бэедээ багтаан, 

Олон гүлмэрхэн ухаануудые 

Олоной дунда мэдүүлжэ, 

Ошор замда гаргаһан зандааш.

“Байгал” манай, “Байгал” – Баглаа манай сэтгүүл, 

Байра байдалыемнай гоёогоошо

“Байгал” манай, “Байгал” сэтгүүл!