1314
Буряад Уласай Үндэһэтэнэй музей элитэ поэт Александр Сергеевич Пушкинай түрэһэн үдэртэ зорюулагдаһан хэмжээ ябуулгануудые июниин 6-да үргэн дэлисэтэйгээр үнгэргэхэ тухай дуулгана.
Үдэр бүриин оршон тойронхиин олон тоото хэрэгүүдһээ амарха гэбэл, Новоселенгинскдэ оршодог Декабристнуудай музейдэ эмхидхэгдэхэ “И вновь июнь! Шестое. Пушкин. И целый день звучат его стихи …” гэһэн ирагуу найрагай һайндэртэ хабаадахые Үндэһэтэнэй музей урина.
Энэ үдэр “А. С. Пушкинай онтохонуудай харгыгаар” гэһэн квест эмхидхэгдэхэ. Эндэ хабаадаха команданууд тусхай даабаринуудые дүүргэжэ, элитэ зохёолшын наһанай намтар болон 19-дэхи зуун жэлэй соёл тухай асуудалнуудта харюусаха юм. Жэшээлбэл, “Шэдитэ юумэнэй музей” гэһэн буудалда нааданда хабаадагшад А. С. Пушкинай онтохонууд дотор хэлэгдэһэн алибаа юумэнүүдые бэдэржэ олохо. Удаадахи буудалда команданууд үхибүүдэй зурагуудай удхаар суута поэдэй зохёолнуудые тааха болоно гэхэ мэтэ һонирхолтой даабаринууд бэлдэгдэхэ.
Үшөө тиихэдэ, харагшад 19-дэхи зуун жэлэй хатарнуудые хараха, “Полонез” хатарта хабаадаха, А. С. Пушкинай шүлэгүүдые уншаха юм.
