​Тоонтын хүсэн ехэ

Буряадай оперо болон баледэй театрай дуушан Доржи Шагдуров элитэ дуушан болохо болбосоролой замаар дабшажа ябахаһаа гадна Захаамин нютагайнгаа эблэлэй эгээл эдэбхитэй гэшүүдэй нэгэниинь юм. 

Нигүүлэсхы туһаламжын концертдэ хабаадаха гү, али хүтэлхэ гү – нэгэтэшье арсажа байдаггүй, хамтын хэрэгтэ хам оролсоод ябадаг. 

- Уран Дүшэ уулада гаралгые манай санагаархин эмхидхээ юм. Хоёр дабаа дабаад, Зэдэ голоо зубшан ошоходоо, жалга хабшал тойрон годирон бэдирһэн Зэдэеэ 33 дахин гаталаа һэмди. Тусгаар тооложо ябаа хүм. Эхин тээшээ Зэдэмнай багашаг, доошоо уруудаха бүринь, жалга тохойнуудһаа уһан нэмэжэ, ехэ болодог, - гээд, энэ аяншалга тухайгаа Доржи хэдышье хөөрэхөөр бэлэн янзатай. 

Мэдээжэ дуушан Санага нютагта түрэһэн намтартай. Улаан-Үдын хүгжэмэй училищи, удаань Новосибирскын консерватори дүүргээ. Новосибирскын оперо болон баледэй театрта 3 жэл хүдэлөөд, Буряадай театрай заһабарида байхадань, Санага нютагтаа нэгэ хэды соо хүдэлөө юм.

- Абамни Павел Долгорович нютагайнгаа “Ажалай сууряан”, удаань “Санага” гэһэн арадай дуу, хатарай ансамбльда дууладаг байһан. Теэбиимни Янжиндулма һайхан хоолойтой бэлэй. 2008 ондо “Санага” ансамбльтайгаа Франци ошоо һэмди. Эдэ жэлнүүд намда ехэ сэнтэй, - гэжэ дуушан сэдьхэлэйнгээ хүбшэргэй сэлинэ. 

Мүнөө бэлигтэй артист оперын 20-ёод парти гүйсэдхэнэ. Бородинай “Князь Игорь” соо Игорь тайжын, С.Рахманиновай “Алеко” соо Алекын, П. Чайковскиин “Пиковая дама” соо Елецкиин, «Иоланта» соо Робертын, Римский-Корсаковой «Царская невеста» соо Грязнойн, Вердиин «Аида» соо Амонасро хаанай, Пуччиниин «Тоска» соо Барон Скарпьягай, бусадшье партинуудые дууладаг юм.

- Олон текст сээжэ мэдэхэ хэрэгтэй. Нилээн орёо ёһотой…

- Ородооршье яалай, үшөө француз, итальян хэлэн дээрэ дуулана ха юмбибди. Дуулаха табисууртай хадаа орёо гэнгүй, оролдохол хэрэгтэйл даа. 

- Буряад дуунуудаа ямар гоёор гүйсэдхэдэг гээшэбта...

- Ринчин Бальжуровай үгэ, хүгжэм дээрэ “Сагаан дали” гэһэн дуун гол дуумни гэлтэй... “Сагаан дали” (үсөөншэг хэһэгээр), “Наһанай зүргэ” гэһэн диск-альбомуудые бэлдэжэ гаргааб. Захааминай поэдүүдэй, композиторнуудай бүтээлнүүд эндэ оролсоо. “Баян һайхан Санага нютаг”, “Үлгы тоонто Захаамин” гэһэн видеоклипүүдые гаргааб, үнгэтэ һайхан, үзэмжэтэй гоё зурагуудтай. Байгаалимнай – байһанаараа харуулаатай. “Үлгы тоонто Захаамин” гэһэн Светлана Санжитовагай зохёоһон дуу Ирина Шагдурова, Владислав Намдаков, би, Светлана гээд дүрбүүлэн гүйсэдхэнэбди. 

- Нэгэ үгөөр хэлэбэл, Захаамин хангайтайгаа суг зохёохы дабаануудые дабажа ябана ха юмта даа. 

- Тиимэ. Тоонтын хүсэн ехэ... – гээд, Доржи Павлович лаблан нэмэбэ. 

Аяншалгада хабаадагшад