971
“Голос кочевникOFF” гэһэн тусхай программаар Буряадай филармонидо Испаниин “Гранада” гэһэн фламенко театр хүгжэм дуу, зүжэг наада харагшадта дурадхаха юм.
Гоё һайхан Гранада хотын зүжэгшэд ёһотой фламенко харуулха. Эртэ урдын сагһаа хойшо гитараар наадажа, дуун, хатар нэгэ доро гүйсэдхэгдэжэ, хүнэй зүрхэ сэдьхэл доһолгомо фламенко табигдадаг байгаа. Урданайнгаа заншал алдаагүй Давид Сорроче дуушан, Хорхе Санчес гитараар наадагша, уян нугархай Мария Бертос болон Франциско Фернандез гэгшэд испан арадай фламенко дуу, хатар харуулжа, харагшадые хужарлуулха.
Буряад Уласай ажаһуугшад болон айлшадай һонорто зарзуэлла гэһэн испан арадай хүгжэмэй-драматическа жанрай зүжэг дурадхагдаха. Иимэ дуу, хатарай зүжэгүүд анха түрүүшынхиеэ 17-дохи зуун жэлэй Мадрид хотодо табигдаһан юм. Тиимэһээ харагшад үнгэрһэн жэлнүүдэй испан арадай соёл урлагтай танилсаха аргатай.
Фламенко гэһэн дуу, хатарай һалбариие бүхэдэлхэйн соёлой баялиг гэжэ ЮНЕСКО эмхи тэмдэглэһэн юм.
рixabay.com сайтһаа гэрэл зураг абтаба
