994
Санкт-Петербург хотодо ородой хасагуудай соёлой Уласхоорондын “Казачье нашествие – 2017” гэһэн 3- дахияа үнгэргэгдэһэн фестивальда Зэдэ аймагай Гурьян Кавелин түрүү һуури эзэлбэ. Байгша оной туршада Гурьян уласхоорондын фестиваль-мүрысөөнүүдтэ 4 дахин илалта туйлаһан байна.
Хүгжэм дуунда дуратай Гурьян Кавелин 3 наһатайһаа хойшо тайзан дээрэ гаража эхилһэн юм. Түрүүшын амжалта тэрэ 2012 ондо хасагуудай соёлой Уласай 4-дэхи фестивальда туйлаа. Саашадаа тэрэ олон тоото мүрысөөнүүдтэ хабаадажа, лауреат, дипломантын нэрэ зэргэдэ хүртэдэг юм.
“Казачье нашествие” гэһэн мүрысөөнэй түрүүшын шатада видеобуулгабари эльгээжэ, Гурьян эрхим 10 дуушадай тоодо ороо. Удаань, Санкт-Петербургдэ үнгэргэгдэхэ мүрысөөнэй түгэсхэлэй шатада уригдаһан байна. Тэрэнтэй хамта Ородой Холбоото Уласай болон Армени, Грузи, Молдави, Абхази, Казахстан, Осети, Белорусси, Приднестровиин зохёохы бүлэгүүд болон дуушад фестивалиин түгэсхэлэй шатада хабаадаа.
“Лучший сольный исполнитель казачьей песни” гэһэн номинацида 1-дэхи шангай лауреат болон фестивалиин дүнгүүдээр баһа 1-дэхи шангай лауреадай нэрэ зэргэдэ Гурьян Кавелин хүртэбэ.
- Гурьян бидэ хоёр олон юумэ хаража, үшөө удаан саг соо энэ мүрысөөн тухай һанажа, хараһанаараа хубаалдажа байхабди, -гэжэ эдир дуушанай эжы, уран һайханай талаар хүтэлбэрилэгшэ Юлия Кавелина хэлэбэ.
Буряад Уласай Соёлой яаманай сайтһаа гэрэл зураг абтаба.
