983
2017 оной июниин 1-һээ 10 болотор Италиин Бергамо хотодо дэлхэйн үндэһэн арадуудай “LO SPIRITO DEL PIANETA” (“Дух Планеты”) гэһэн Уласхоорондын фестиваль үнгэргэгдэнэ. Энэ хэмжээ ябуулгада Буряад Уласай зохёохы бүлэг хабаадана.
Фестиваль эмхидхэгшэд Латин Америкэ, Африка, Ази гүрэнүүдэй үндэһэн арадуудтай ажал ябуулдаг. Жэл бүри Ородой Холбоото Уласай үсөөн тоото арадуудай зохёохы бүлэгүүдые энэ хэмжээ ябуулгын захирал Ивано Каркано уридаг юм. Инди, Бразили, Шотланди, Турци, Эквадор гүрэнүүдэй үндэһэн арадууд мүнөө жэлэй фестивальда хабаадаха юм.
Фестивалиин үедэ зохёохы бүлэгүүд угсаата арадайнгаа байра байдал түхеэржэ, хэр угһаа абажа ябаһан зэр зэмсэг, гэр доторхи бараа гэхэ мэтэ хэрэгсэлнүүдые тусхай талмайнуудта дэлгээжэ харуулха. Энээнһээ урда жэлнүүдтэ Ород гүрэнэй Камчатка, Тыва, Алтай, Таймыр можо нютагуудай түлөөлэгшэд энэ хэмжээ ябуулгада хабаадаһан байна. Буряад Уласай “Тоонто” гэһэн арадай аман зохёолой ансамбль, дуу хүгжэм наадагшад болон Уласай уран бүтээлэй түбэй ахамад мэргэжэлтэн Д. Дашиева гэгшэд мүнөө жэлэй фестивальда арадайнгаа ажабайдал тухай харуулна.
Энэ хэмжээ ябуулгын үедэ манай нютагаархид Италиин хотонуудта тоглолтонуудые харуулжа, пресс-конференцинуудта хабаадажа, ондоо үндэһэн арадуудай соёл, урлагтай танилсана.
- Фестивалиин үедэ олон хүнүүдээр танилсажа, нэгэ ехэ гэр бүлэ мэтэ байнабди, - гэжэ Буряад Уласай түлөөлэгшэд хэлэнэ.
Буряад Уласай Соёлой яаманай сайтһаа гэрэл зураг абтаба.
