928
Буряадай хатарай колледжын түрүүшынгээ шабинарые ажабайдалай үргэн харгыдаа үдэһэшэһэнэй удаа тэбхэр 50 жэл үнгэршэбэ. Мүнөө тэдэнэр түрэл һургууулидаа дахинаа сугларжа, ойн баярай хэмжээ ябуулгада хабаадахань.
Буряадай хатарай һургуулиин түрүүшын хүмүүжэмэлнүүд, түрүүшын шабинар, улас дотороо шэнэ һалбариин түрүүшын мэргэжэлтэд уян нугархай хатараар олоной зүрхэ сэдьхэл буляажа, үндэр амжалтануудые туйлаһан байна. Гадна тэдэнэр ургажа ябаа залуу хатаршадта аргагүй сэнтэй һургаал заабаринуудые хэлэжэ, тэдэниие һургажа, урмашуулжа, далижуулжа ябадаг . 50 жэлэй саана Буряадай хатарай колледж дүүргэһэн шабинар уласай соёлой һалбариин хүгжэлтэдэ сэгнэшэгүй хубитаяа оруулһан нэрэ солотой хүнүүд юм.
Буряадай хатарай колледждо июниин 16-да эдэ хүнүүдтэ зорюулагдаһан ойн баярай үдэшэ үнгэргэгдэхэ. Энэ хэмжээ ябуулгада Буряад Уласай Засагай газар болон Арадай Хурал түрүүшын шабинарые амаршалха. Тиихэдэ 2017 ондо Буряадай хатарай колледж дүүргэжэ байһан баледэй һалбариин хатаршадтай уулзаха юм.
Буряадай хатарай колледж 1967 ондо дүүргэгшэд:
Виктор Александрович Ганженко – Ородой Холбоото Уласай арадай артист. Тэрэ Буряад Уласай болон Санкт-Петербург хотын тайзан дээрэ ялас гэмэ рольнуудые гүйсэдхэжэ, олоной зүрхэ сэдьхэлдэ мартагдашагүй мүр сараа үлөөһэн байха юм. Виктор Гаженко Словени болоон Хорвати гүрэнүүдтэ багшалһан, Буряадай Оперо болон баледэй, “Молодой балет” театрнуудта уран һайханай хүтэлбэрилэгшөөр ажаллаһан намтартай. Мүнөө тэрэ Белгород хотодо доцент, хатарай кафедрын профессор.
Екатерина Балдановна Самбуева – Ородой Холбоото Уласай арадай артистка. Арад зон тэрэнэй уян нугархай хатар хараха гэжэ зорюута тоглолтонуудта ябадаг байһан юм. Тэрэ “Земля Санникова” гэһэн фильмдэ Аннуирай роль гүйсэдхөө. Екатерина Самбуева Хатарай колледжын, Хальмагай “Элиста” гэһэн баледэй театрай, Буряадай Оперо болон баледэй театрнуудай уран һайханай хүтэлбэрилэгшэ байһан. Мүнөө тэрэ Коми Уласай Оперо болон баледэй театрай ахамад балетмейстер юм.
Юрий Фролович Муруев – Ородой Холбоото Уласай артист. Тэрэ олон тоото харагшадайнгаа зүрхэ сэдьхэл буляажа шадаа. Балед зааха һалбариин дээдэ гарай мэргэжэлтэн олон шабинарые һургаһан байна. Тэдэниинь уласхоорондын хатарай мүрысөөнүүдтэ шанда хүртэжэ, жюриин гэшүүд тэдэнэй бэлиг шадабариие онсолон тэмдэглэдэг юм. Юрий Муруев Буряадай оперо болон баледэй театрай уран һайханай хүтэлбэрилэгшэ байһан, Бээжэн хотын ехэ һургуулиин хүндэтэ профессорой нэрэ зэргэдэ хүртэһэн байна. Мүнөө тэрэ Буряадай хатарай колледжын эрэшүүлэй классай хүтэлэгшэ багша юм.
Алексей Николаевич Павленко – Ородой Холбоото Уласай артист. Тэрэ оло дахин Лариса Сахьяноватай хамта тайзан дээрэ гараһан. Алексей Павленко Красноярск хотын Оперо болон баледэй театрай захиралаар хүдэлһэн юм. Алексей Николаевичай табиһан хатарнууд уласхоорондын мүрысөөнүүдтэ нэгэнтэ бэшэ түрүү һууринуудые эзэлээ. Алексей Павленко “Дуэтнэ-классическа хатар” гэһэн шэглэлээр һуралсалай программа зохёогоо. Мүнөө тэрэ Красноярск хотын хатарай колледжын эрэшүүлэй класай хүтэлэгшэ методист, багша.
Татьяна Михайловна Муруева – Ородой Холбоото Уласай соёлой габьяата хүдэлмэрилэгшэ, Буряад Уласай арадай артистка. Тэрэ Буряадай Оперо болон баледэй театрай хүтэлэгшэ балерина ябаһан, Красноярскын болон Буряадай хатарай һургуулинуудта багшалһан намтартай юм. Татьяна Муруева Бээжэн хотын ехэ һургуулиин хүндэтэ профессорой нэрэ зэргэдэ хүртэһэн байна. Тэрэ “Классическа хатарай һургуули” гэһэн һуралсалай программа зохёогоо. Татьяна Муруевагай шабинар уласхоорондын мүрысөөнүүдтэ түрүү һууринуудые эзэлдэг юм.
