​Ариунбаатарай шэнэ илалта

“Кардиффын аялганууд” гэһэн дуушадай уласхоорондын урилдаан 1983 ондо эхилhэн юм. Валлийска Үндэһэтэнэй Оперын ба Кардифф хотын засагай дэмжэлтээр энэ хэмжээ ябуулга Великобританиин Уэльс можын Кардифф хотодо 2 жэлэй нэгэ удаа үнгэргэгдэдэг юм. Дуушад 18-һаа 32 наһан хүрэтэр наһатай байха ёһотой. Дэлхэйн алдар суута оперын дуушад “Кардиффын аялганууд” гэһэн тэмсээндэ хабаадажа, илалта туйлахые эрмэлзэн хүсэдэг юм. Буряадай гүрэнэй оперо болон баледэй театрай гол дуушан Ганбаатарын Ариунбаатар мүнөө жэлдэ “Кардиффын аялгануудта” хабаадажа, “Романс” гэжэ номинацида илалта туйлаба гэһэн мэдээсэл бидэ олониие тон ехээр баярлуулба.

Энэ урилдаанда Ганбаатарын Ариунбаатар өөрынгөө Монгол Уласаа түлөөлһэн байна. Оперо гэһэн номинацида Г.Ариунбаатар табан янзын хэлэн дээрэ дуулаа. Тэрэ итальян хэлэн дээрэ “Дон Карлос” (Джузеппе Верди) оперын Родриго гэгшын парти дуулаа. Урилдаанай түгэсхэлдэ “Монголын тала нютаг” (хүгжэмынь Б.Шаравай, үгэнь З.Тумэнжаргалай) гэhэн дуу дуулажа, дуунда дуратайшуулые гайхуулһан, уяруулһан байна. Бүхэдэлхэйн тэмсээндэ Г.Ариунбаатар гурбан ехэ шагнал абажа шадаа.

Шүүгшэдэй зүбшэгшэ Мэри Кинг гэгшын, англи яhанай эхэнэр, нюдэнһөө нулимса унагаажа, уярһандаа үгэ хэлэжэ ядажа байхыень хараад, Ариунбаатарай энэ илалтаар бахархамаар, омогорхомоор. Мэри Кинг гэгшэтэй сэтгүүлшын хэһэн хөөрэлдөөн, хүндэтэ уншагшад, танай анхаралда.

-Танда үнэхөөр Монголой сэбэр агаар хэрэгтэй шэнгеэр харагдажа байгаа гү?- гэжэ сэтгүүлшэн асууба.

- Би дуугаржа ядажа байнаб (уйлан алдана). Энэ гайхамшаг дуушан үнэхөөрөө сэдьхэлыемни хүдэлгөө. Өөрынгөө түрэл хэлэн дээрэ дуулажа, уужам сэдьхэлэйнгээ гүнзэгые бидэнтэй хубаалдажа, дуугаараа элирхэйлжэ байхадань бахархамаар лэ. Түрэл байгаалинь хүсэ үгэhэн шэнги байгаа. Хоолойнь гайхалтай абьяасыень харуулна. Гансахан хоолойнь бэшэ, өөрэйнгөө дуунда маанадые татажа оруулха шадабарииень сэгнэхэ хэрэгтэй.Энэ дуушан томо тайзан дээрэ симфоническа оркестртэй хамта гансаараа дуулабал, эсэхэ гээшые мэдэхэгүй байнал даа. Энээндэнь маргахааршье бэшэ, шадаха,- гэжэ Мэри Кинг харюусаба.

- Урилдаанай эхиндэ тэрэнэй дуулаһан Шубертын дуун тухай та юун гэжэ бодонобта?

- Үнэхөөрөө зүрхэ сэдьхэлэй доһолтор дуулажа шадана гээд дабтаад хэлэһүү. Тэрэнэй дуулахые соносоходо, аргагүй гое байгаа. Хэрбээ Ариунбаатар дэлхэйн түрүү дуушан болохоёо хүсэжэ байгаа hаа, нарин нягтаар, нэтэрүүгээр ажаллаха ёhотой гэжэ нэмэхэ байнаб.

- Харин тэрэнэй хоёрдохи дуун болохо Чайковскиин дуун тухай юу хэлэхэ байнабта?

- П.Чайковскиин дуун тэрэнэй хоолойдо тон һайнаар таарана, аялгалан дуулахадань, хэнэйшье сэдьхэл хүдэлгэмэ. Энэ дуушаниие үндэр амжалтанууд хүлеэнэ гэжэ би хэлэхэ байнаб,- гээд шүүгшэдэй зүбшэгшэ Мэри Кинг онсолон тэмдэглээ.

Ямар һайхан үгэнүүд гээшэб!

Монгол һайхан ороноо, монгол арад зоноо, аба эжын алдар нэрэ дэлхэй дүүрэн суурхуулжа ябаһан Ганбаатарай Ариунбаатарай манай Буряад театрай дуушан байһанда омогорхон баярланабди! Алдарта дуушанда амжалта, аза жаргал, баяр баясхалан, элүүр энхые хүсэнэбди!