​Хатарай одод "Һүниин ёохорто" хабаадаха

Ерэхэ амаралтын үдэрнүүдтэ Улаан-Үдэдэ заншалта “Һүниин ёохор” гэжэ наадан эмхидхэгдэхэ юм. 

Үбэр Байгалай арадуудай угсаата зүйн музейн газар дээрэ тус наадан арбадахияа үнгэргэгдэхэнь гээшэ.

- Бидэ мүнөө жэлдэ түрүүшынхиеэ ёохор хатар элдэб хүгжэмэй – рок, регги, диско – гэһэн шэглэлнүүдээр туршаха түсэбтэйбди. Энэ хэмжээ ябуулгын үедэ хэдэн талмайнууд ажалладаг, тэрэнэй нэгэндэ энэ туршалга үнгэргэгдэхэ, - гэжэ “Байгал” театрай тоглолтын талаар хүтэлбэрилэгшэ Александр Малханов хөөрэбэ. 

Арадай фольклорно бүлгэмүүд “Эрхим ёохор гүйсэдхэгшэ” гэһэн харалгада мүрысэхэ юм. Мүн лэ элдэб һонин хэмжээ ябуулганууд үнгэргэгдэхөөр хараалагданхай. 

“Һүниин Ёохорто” жэл ерэхэ бүри улам олон зон хабаадалсадаг болонхой. Мүнөө жэлдэ Ород гүрэнэй хатарай одод, «Танцуют все!» гэһэн түсэлэй жюри болоһон Ородой Холбооной габьяата артист, профессор Алла Сигалова, хореограф Егор Дружинин гэгшэд ерэхэ юм.