1101
2017 оной июлиин 8-да Буряад Уласай Кабанск аймагай Корсаково һууринда эхирид угтай зоной можо хоорондын үндэһэн соёлой “Угай ехэ һахюуһад”гэһэн фестиваль үнгэргэгдэхэ юм. Энэ хэмжээ ябуулгада Эрхүү можын, Буряад Уласай, Алтайн хизаарай болон Монгол гүрэнэй эхиридүүд, Кабанск аймагай ахамадууд, нютаг газарай эблэлнүүд, соёлой һалбариин түлөөлэгшэд хабаадаха.
Мүнөө дээрээ эхирид угай хүн зон Эрхүү можодо, Буряад Уласта (Кабанск, Баргажан, Ивалга, Сэлэнгэ аймагуудта), Монгол гүрэндэ ажаһуудаг юм. Үргэн дайдаар эхиридүүд таранхайшье һаа, тэдэнэр элинсэг хулинсагайнгаа абажа ябаһан ёһо заншал, шажан мүргэл, арадай аман зохёолоо алдаагүй. Үндэһэн соёлойнгоо баялиг хүгжөөхэ, дэлгэрүүлхэ зорилготой “Угай ехэ һахюуһад” гэһэн можо хоорондын хэмжээ ябуулга эмхидхэгдэнэ.
Буряад арадай шагай наадан, һур харбалга, һээр шаалга, эхирид угай эрхим һарбаалжан бэшэгэй мүрысөөнүүд фестивалиин үедэ үнгэргэгдэхэ. Тиихэдэ “Эхиридүүдэй нэгэдэл” гэһэн ахамадуудай суглаан, “Эхиридүүдэй үндэһэн хубсаһан”, “Эхирид угай нүүдэлэй түүхэһээ” гэһэн дүхэриг шэрээнүүд үнгэргэгдэхөөр түсэблэгдэнхэй.
“Эхиридүүдэй нэгэдэл” гэһэн олониитын хүдэлөөн, Бүгэдэ Буряадай үндэһэн соёлой түб энэ фестиваль байгуулба. Кабанск аймагай нютагай засагай байгууламжын соёлой болон залуушуулай хэрэгүүдээр хороон, Корсаково һууринай нютагай засагай байгууламжа, Кабанск аймагай нютагаархидай эблэл, Байгал-Худариин буряадуудай үндэһэн соёлой түб хэмжээ ябуулга эмхидхэнэ.
