​Эртэ урданай уран бүтээлнүүдэй суглуулбари

«Буряадай эртэ урданай урлаг» гэhэн үзэсхэлэн Буряад Уласай Yндэhэтэнэй музейдэ нээгдэбэ.

Буряад ороной ажаhуугшад болон айлшад июниин 30-hаа Yндэhэтэнэй музейн археологическа суглуулбаринуудай шухаг экспонадуудые хараха аргатай. Малтагдажа гү, али юрэ хаанашьеб олдожо, 1923 онhоо музейдэ суглуулагдаhан, хадагалагдаhан hонирхолтой зүйлнүүд эндэ харуулагдаха. Эдэ хадаа Байгал шадархи Сибириин эртэ урда сагай соёл болбосоролой уг дамжаха сэнтэй зөөринүүд болоно.

Эртэнэй шулуун зэбсэгтэ үеhөө (палеолит) мүнөө саг болотор шулуугаар, яhаар, шабараар хэгдэhэн 100-гаад бүтээлнүүд харуулагдахаар түсэблэгдэнэ: Мальта ба Буреть (Эрхүү можо) нютагуудта олдоhон палеолидай үеын гараар бүтээhэн онсо шухаг дүрэнүүдэй буулгабаринууд; уран гоеор бүтээгдэhэн hүхэнүүд, сахаригууд, бэhэлигүүд; яhаар угалзатуулан хэгдэhэн гоёолтонууд, тэдэнэй тоодо Фосфановско хүүрhээ олдоhон, магад, хүгжэмэй түрүүшын зэмсэг.

Хүрэл зуун жэлэй, гуннуудай, дунда зуун жэлнүүдэй үеын hиилэгдэhэн яhан, хубсаhанай гоёолтонууд ба мориной тоног зэмсэг, шабараар, хүлэрөөр бүтээгдэhэн уран hайханай зүйлнүүд харуулагдана.

Музейдэ табигдаhан зүйлнүүд гоё hайханаараа, өөрcэ түхэлөөрөө гайхуулна, тэрэ холын эртэ урда сагай уран бүтээлшэдэй hанаа бодол дамжуулна.

Биледэй сэн: наhаа хүсэhэн хүнүүд – 100 түхэриг; пенсионернүүд – 80 түхэриг; hурагшад, эрэмдэг бэетэй хүнүүд – 50 түхэриг.

М.Н. Хангаловай нэрэмжэтэ Буряадай түүхын музей, Профсоюзна үйлсэ, 29-дэхи байшан. Утаhан: 21-40-08, 21-44-88.