1039
Буряад Улас болон Москва хотын хоорондохи харилсаа бэхижүүлхэ зорилготой июлиин 12-13-най үдэрнүүдтэ Ородой Холбоото Уласай ниислэл хотын үдэрнүүд Улаан-Үдэдэ үнгэргэгдэхэ юм.
2016 ондо Москва хотодо Улаан-Үдын үдэрнүүд амжалтатайгаар тэмдэглэгдэжэ, удаадахи жэлдэ манай түб хотодо Ород гүрэнэй ниислэлэй үдэрнүүдые үнгэргэхэ тухай хэлсэгдэһэн байгаа.
Июлиин 12-то үглөөнэй 11 сагта Илалтын хүшөөгэй дэргэдэ хэмжээ ябуулганууд үнгэргэгдэжэ, удаань Эсэгэ ороноо хамгаалгын Агууехэ дайнда Москва шадархи байлдаанда хабаадаһан Буряад Уласта ажаһуугшадта сертификадууд барюулагдаха. Удаань Москва хото болон Буряад Улас хоорондохи эдэй засагай, соёлой, ниигэмэй удха шанартай харилсаануудые хүгжөөхэ талаар дүхэриг шэрээнүүд, эрдэмэй-практическа бага хуралнууд эмхидхэгдэхэ.
- Москва хотын Үндэһэтэнэй хоорондын бодолгын болон можо хоорондын департаментын хүтэлбэрилэгшэ Виталий Сучков, Москвагай Засагай газарай, тэрэнэй тоодо болбосоролой болон курортын һалбари хүгжөөлгын түлөөлэгшэд, олзын хэрэг эрхилэгшэд Буряад Уласта бууха, - гэжэ Буряад Уласай Засагай газарай болон Толгойлогшын захиргаанай Үндэһэтэнэй хоорондохи харилсаанай болон эрхэтэдэй эдэбхи үүсхэлэй хорооной түрүүлэгшын орлогшо Доржо Бадмацыренов хэлэбэ.
Буряад Уласта Москва хотын үдэрнүүдэй үедэ һонирхолтой соёлой программа бэлдэгдэнхэй. Энэ хэмжээ ябуулгануудай үедэ 2 можо нютагуудай соёл, урлагай һалбариин түлөөлэгшэдэй уулзалганууд эмхидхэгдэхэ.
- Сампиловай нэрэмжэтэ музейдэ Москва хотын Мультимедиа арт-музей эмхидхэһэн “Отоваренная мечта” гэһэн совет үеын хүнүүдэй юумэнэй хомор байһан сагые һануулһан гэрэл зурагуудай үзэсхэлэн дэлгэгдэхэ юм, - гэжэ Буряад Уласай Соёлой сайдай уялгануудые дүүргэгшэ Тимур Цыбиков хэлэбэ.
Тиихэдэ Москвагай түүхэ, соёл, архитектурада зорюулагдаһан 300-аад номууд Үндэһэтэнэй номой санда дамжуулагдаха юм.
Кабанск аймагай Селенгинск һууринда Москва хотын үдэрнүүдтэ зорюулагдаһан “ТенорА ХХI века” гэһэн хэмжээ ябуулга эмхидхэгдэхэ. Энэ түсэл Ород гүрэн дотор 10-аад жэлдэ бэелүүлэгдэжэ, оперын дуушадые нэгэдүүлнэ гэжэ Тимур Цыбиков тэмдэглэнэ.
Июлиин 12-то үдэшын 19 сагта Буряад Уласта Москва хотын үдэрнүүдэй нээлгын баяр ёһолол үнгэргэгдэжэ, “Хор Турецкого” гэһэн мэдээжэ арт-бүлэгэй тоглолто харуулагдаха юм.
