1324
Москва хотодо үнгэргэгдэхэ «Бидэ хамтадаа Ородой Холбоото Улас болонобди» гэhэн Арадай зохеохы уран бүтээлэй бүхэроссиин фестивальда Буряад Уласай коллективүүд хабаадаха болобо.
Тус фестивалиин «арадай хатар» гэhэн номинацида Буряадай гүрэнэй ехэ hургуулиин оюутадай дуу хатарай «Байгалай долгинууд» (хүтэлбэрилэгшэнь А. С. Цыремпилов), «фольклорно ансамбль» гэhэн номинацида «Аядон» этно-студи (хүтэлбэрилэгшэнь О. Д. Шарапова) шэлэгдэбэ.
Ородой Холбоото Уласай Юрэнхылэгшын даабаряар, «Ород гүрэнэй соёл (2012-2018)» гэhэн Федеральна тусхай зорилготой программатай зохилдуулан, тус фестиваль үнгэргэгдэнэ.
Ород гүрэнэй олон үндэһэ яhатанай эбтэй эетэй ажаhууха, ёhо заншалаа баяжуулха, үндэhэ яhатанай хоорондохи харилсаа бэхижүүлхэ хэрэгтэ энэ хэмжээ ябуулга нүлөөлхэ зорилготой.
Ородой Холбоото Уласай Соёлой яаман энэ фестиваль эмхидхэн байгуулhан юм, эмхидхэгшэнь – «В. Д. Поленовэй нэрэмжэтэ Ородой Холбооной гүрэнэй арадай уран бүтээлэй байшан».
Фестиваль дүрбэн шэглэлээр хоёр шатада үнгэргэгдэнэ: фольклорно ансамбльнууд, арадай дуунай ансамбльнууд, арадай хүгжэм, арадай хатар. 2017 оной февралиин 15-hаа майн 15 болотор хабаадагшад видеобуулгабаринуудаа эльгээжэ, шэлэн абалгын шата гараа. Түрүүшын шатада Ородой Холбоото Уласай 55 можо нютагуудhаа 186 мэдүүлгэнүүд ороhон байна.
2017 оной ноябриин 1-hээ 4-эн болотор Арадуудай һаналаа нэгэдэлгын үдэртэй дашарамдуулан, Москвада фестивалиин хоёрдохи шата – конкурс, түгэсхэлэй гала-концерт үнгэргэгдэхэ.
Жюриин бүридэлдэ соёлой, урлагай талаар мэдээжэ мэргэжэлтэд ороно. Эгээл бэрхэ гэжэ тоологдоhон уран hайханай коллективүүдтэ фестивалиин түгэсхэлэй шатада хабаадаха урилга үгтэhэн байна.
Башкортостан, Хальмаг, Карели, Мордови, Тыва, Саха (Яхад), Удмурти, Чечен, Чуваш уласуудай; Белгород, Курск, Ленинград, Москва, Свердловск можонуудай; Үбэр Байгалай хизаарhаа болон Астрахань, Тверь хотонуудhаа, 21 коллективүүд, тэрэ тоодо дээрэ нэрлэгдэһэн манай 2 ансамбль, түгэсхэлэй шатада шэлэгдээ.
Буряадай гүрэнэй ехэ hургуулиин сайтhаа гэрэл зурагууд абтаба.
Автор: Александр Дамбаев
