1185
Буряад Уласта Москва хотын үдэрнүүд гэһэн хэмжээ ябуулгада дашарамдуулан эмхидхэгдэһэн, “Минии Москва” гэһэн онлайн-мүрысөөнэй илагшад элирүүлэгдэбэ.
“Минии Москва” гэһэн онлайн-мүрысөөн Москва хотын Засагай газарай Үндэһэтэнэй бодолгын болон можо хоорондын харилсаануудай департамент эмхидхэһэн юм. Ород гүрэн дотор аяншалга хүгжөөхэ, ниислэл хотын булюу талануудые олондо мэдүүлхэ, һурталшалха гэһэн зорилгонуудые мүрысөө эмхидхэгшэд табиһан байна.
2017 оной июниин 5-һаа июлиин 6 болотор Буряад Уласай ажаһуугшад 7 наһатайһаа эхилжэ, мүрысөөндэ хабаадаха аргатай байгаа. Энэ мүрысөндэ хабаадагшад 5 номинацида хаба шадалаа туршаба. “Нарисуй Москву” гэһэн уран зурагай номинацида түрүүшын һуурида Татьяна Сажинова, 2-дохи һуурида – Юлия Лумбунова, 3-дахи һуурида Алтана Хилханова гэгшэд хүртэбэ. “Дни Москвы” гэһэн гэрэл зурагай номинацида Дарья Васильева, Надежда Симонова, Елена Неманова гэгшэд түрүүлбэ. “Стихи о Москве” гэһэн уран найрагай номинацида Ирина Эрмиль, Ольга Алсыева, Тамир Дамбаев гэгшэд түрүү һууринуудые эзэлбэ. “Московские истории” гэһэн викторинада Марина Цыгунова, Алдар Гуруев, Сэсэг Молонова гэгшэд шалгарба. Олондо мэдээсэл тараадаг хэрэгсэлнүүдэй түлөөлэгшэдэй дунда эмхидхэгдэһэн мүрысөөндэ Алла Мальцева, Елена Буерачная, Мария Красикова гэгшэд түрүүлбэ.
Номинаци бүхэндэ 3 илагшадта гурбан үдэрэй туршада Москва хотоор хоёр хүнэй аяншалхаар путёвконууд барюулагдаха юм. Тиихэдэ Москва хүрэтэр самолёдоор гү, али поездоор ошохо, ерэхэ харгы, аэропортһоо гү, али түмэр замай вокзалһаа гостиница хүрэтэр, Москва хотодо байрлаха үнэ сэн путёвкодо оруулагданхай.
18 наһа хүсөөгүй, конкурсдо илаһан үхибүүд Москва хүрэтэр ошоходоо, заатагүй хуулиин наһа хүсэһэн хүнэй харууһатай ябаха болоно. Үгы гэбэл, тэдэнэр конкурсын эрилтэнүүдые хүсэд дүүргэбэгүй гэжэ тоологдохо. Тиимэһээ тэдэнэй шан удаадахи хабаадагшада дамжуулагдаха юм.
2017 оной июлиин 11-һээ 13 болотор Буряад Уласта Москва хотын үдэрнүүд гэһэн хэмжээ ябуулга үргэн дэлисэтэйгээр эмхидхэгдэхэ гэжэ һануулнабди. Тиихэдэ “Хор Турецкого” гэһэн бүлгэмэй тоглолто, “Отоваренная мечта” гэһэн гэрэл зурагуудай үзэсхэлэн, Үндэһэтэнэй номой санда номуудые барюулха болон бусад хэмжээ ябуулганууд үнгэргэгдэхэ.
