882
Аркадий Батомункуевай гэрэл зураг.
Мүнөөдэр, июлиин 12-то, үдэшын 19.00 сагта Соведүүдэй талмайда “Хор Турецкого” гэһэн арт- группа Буряад уласай ажаһуугшадта болон айлшадта тоглолто харуулха юм.
Мүнөө үглөөгүүр дуушад Улаан-Үдэдэ буужа, Ородой Холбоото Уласай арадай артист, Гүрэнэй шангай лауреат, арт-бүлэг байгуулагша Михаил Турецкий пресс-конференцидэ хабаадаба.
“Улаан-Үдэ би түрүүшынхиеэ ерээб. Тиигээшье һаа Буряад Улас тухай дуулаһан байнаб. Эрхүүгэй талаһаа Байгал оло дахин харааб. Листвянка тухай һайн мэдэнэб, тэндэ хүрөөшье һаа гэхэдэ, арга боломжо олдоногүй”, - гэжэ Михаил Турецкий хөөрэнэ.
Юундэб гэхэдэ, үглөөдэртөө дуушад Москва, саашаа Караганда хүрэтэр хүрэжэ, тэндэ “Дуунай һайндэр” гэһэн хэмжээ ябуулгада хабаадаха юм.
“26 жэлэй саана сугларжа, бүлэг байгуулһанһаа хойшо, мүнөө болотор бидэ сугтаа ябанабди. Манай репертуарта мянганһаа дээшэ дуунууд бии. Дэлхэй арадуудай олон яһатанай хэлэн дээрэ дуунуудые гүйсэдхэдэгбди. Бидэ дууша зон хадаа, дуулаха бэлиг талаангаа таанадта дүүрэн харуулхабди. Манай бүлэгтэ эхэнэрнүүдэй аринуудые дууладаг сопрано хоолойтой хүнүүд бии”, - гэжэ “Хор Турецкого” арт-бүлэгэй хүтэлбэрилэгшэ хэлэбэ.
Буряад хэлэн дээрэ дуунууд зэдэлхэ гү гэжэ сурбалжалагшадай асуухада, “Буряад Улас бидэ түрүүшынхиеэ ерээбди, тиимэһээ буряад арадай соёл, дуунуудые шэнжэлжэ хэрэгтэй. Дахяад ерэхэдээ, заатагүй буряад хэлэн дээрэ дуу гүйсэдхэхэбди”, - гэжэ Михаил Турецкий харюусаһан байна.
“Хор Турецкого” бүлэгтэй хамта “SOPRANO Турецкого” гэһэн эхэнэрнүүдэй бүлэг ерэлсээ.
“SOPRANO” бүлэгэй байгуулагдаһаар 7 жэл болобо. Эдэнэр баһал бүхы дэлхэйдэ мэдээжэ болонхой. Эдэ хоёр бүлэгүүдэй нэгэ тоглолтодо хабаадахань ехэ хомор юм”, - гэжэ дуушан хөөрэнэ.
“Дуунай һайндэртэ” харагшадые урихадаа, хүнүүдтэ зорюулжа, тэдэнэртэй хамта дууладагбди гэжэ Михаил Турецкий тэмдэглэбэ. Тиихэдэ дуушад тоглолтын үедэ тайзанһаа буужа, арад зонтой суг дуулаха.
Бүхы дэлхэйдэ болон Ородой Холбоото Улас дотор мэдээжэ бүлэг Буряад Уласта Москва хотын үдэрнүүд гэһэн хэмжээ ябуулгада дашарамдуулан, “Дуунай һайндэр” гэһэн программа бэлдэжэ ерэһэн байна. Энэ программа Ород, Казахстан, Белорусси гүрэнүүдэй 35 хотонуудта амжалтатайгаар эмхидхэгдээ. “Дуунай һайндэр” гэһэн хэмжээ ябуулга Ростов-на-Дону хотодо эгээл олон, 106 мянган, зоной хабаадалгатайгаар үнгэргэдэһэн байна.
Хүхэ номин тэнгэри доро эмхидхэгдэдэг хэмжээ ябуулга Улаан-Үдэдэ Соведүүдэй талмайда үнгэргэгдэхэ юм. Тиихэдэ гэрэлэй, абяанай тусхай түхеэрэлгэнүүд тодхогдожо, тайзан бэлдэгдэбэ.
Елена Капустинагай гэрэл зураг.
“Дуунай һайндэр” гэһэн түсэл хүн зониие нэгэдүүлжэ, баярлуулжа, хужарлуулжа, Эхэ орондоо үнэн сэхэ байха мэдэрэл түрүүлдэг. Ородой Холбоото Уласай Юрэнхылэгшэ Владимир Путинтай Михаил Турецкий уулзаһанай удаа энэ түсэл мүндэлһэн байна. Май һарада Владимир Путин Эб найрамдалай орден “Хор Турецкого” гэһэн арт-бүлэгэй байгуулагша, хүтэлбэрилэгшэдэ барюулһан юм.
